ಬುಲೆಟ್‌ಪ್ರೂಫ್ ಕಾರು ಬಿಟ್ಟು ಆಟೋ ಏರಿದರು!

Team Udayavani, Nov 24, 2022, 7:20 AM IST

ನವದೆಹಲಿ: ಅಮೆರಿಕದ ಈ ನಾಲ್ವರು ಮಹಿಳಾ ರಾಜತಾಂತ್ರಿಕ ಅಧಿಕಾರಿಗಳು ದೆಹಲಿಯಲ್ಲಿ ಆಟೋ ಓಡಿಸುತ್ತಿದ್ದಾರೆ! ಅಚ್ಚರಿಯಾಯಿತೇ? ತಮ್ಮ ಬುಲೆಟ್‌ ಪ್ರೂಫ್ ಕಾರುಗಳಿಗೆ ಗುಡ್‌ಬೈ ಹೇಳಿ ಆಟೋ ಖರೀದಿಸಿ, ತಾವೇ ಓಡಿಸುವ ಮೂಲಕ ತಮ್ಮದೇ ಆದ ಹೊಸ ರಾಜತಾಂತ್ರಿಕ ಶೈಲಿಗೆ ನಾಂದಿ ಹಾಡಿದ್ದಾರೆ.

ದೆಹಲಿಗೆ ಬಂದಿಳಿಯುತ್ತಿದ್ದಂತೆಯೇ ಮೂರು ಚಕ್ರಗಳ ಈ ವಾಹನವನ್ನು ನೋಡಿ ಖುಷಿಯಾಯಿತು. ಈ ಸವಾಲನ್ನು ಸ್ವೀಕರಿಸಿಯೇ ಬಿಡೋಣ ಎಂದು, ವಿಶಿಷ್ಟ ಸಾರಿಗೆಯಾದ ಆಟೋ ಖರೀದಿಸಿದೆವು ಎನ್ನುತ್ತಾರೆ ಆ್ಯನ್‌ ಮ್ಯಾಸನ್‌, ರುತ್‌ ಹೋಂಬರ್ಗ್‌, ಶರೀನ್‌ ಜೆ.ಕಿಟ್ಟರ್‌ಮನ್‌ ಮತ್ತು ಜೆನಿಫ‌ರ್‌. ವಿಶೇಷವೆಂದರೆ, ಈ ಪೈಕಿ ಶರೀನ್‌ ಅವರು ಕರ್ನಾಟಕದಲ್ಲಿ ಹುಟ್ಟಿ, ನಂತರ ಅಮೆರಿಕಕ್ಕೆ ವಲಸೆ ಹೋದವರು.

The U.S. Embassy’s #autogang is here! Check out our first #DostiMonth video and see these three diplomatic auto rickshaw women drivers hit the Delhi streets!

Tune in every Friday this month for #DostiMonth videos!#USIndiaAt75🇺🇸🇮🇳 pic.twitter.com/0ggfwyokqy

— U.S. Embassy India (@USAndIndia) September 9, 2022

ನಾವು ಯಾವತ್ತೂ ಕ್ಲಚ್‌ ಇರುವ ವಾಹನ ಓಡಿಸಿಯೇ ಇಲ್ಲ. ಆಟೋಮ್ಯಾಟಿಕ್‌ ಕಾರುಗಳನ್ನು ಬಿಟ್ಟು ಮೋಟಾರ್‌ಸೈಕಲ್‌ ಕೂಡ ಓಡಿಸಿಲ್ಲ. ಆದರೆ, ಹೊಸದನ್ನು ಕಲಿಯಬೇಕು ಎಂಬ ಉದ್ದೇಶದಿಂದ ಇಲ್ಲಿ ಆಟೋ ಖರೀದಿಸಿದ್ದೇವೆ ಎಂದೂ ಈ ಅಧಿಕಾರಿಗಳು ಹೇಳಿದ್ದಾರೆ.