ಏರ್‌ ಇಂಡಿಯಾಕ್ಕೆ 500 ಹೊಸ ವಿಮಾನ ಖರೀದಿ? ಏರ್‌ಬಸ್‌, ಬೋಯಿಂಗ್‌ ಜತೆಗೆ ಮಾತುಕತೆ

Team Udayavani, Dec 12, 2022, 7:10 AM IST

ಹೊಸದಿಲ್ಲಿ/ಪ್ಯಾರಿಸ್‌: ಏರ್‌ ಇಂಡಿಯಾದ ಹೊಸ ಮಾಲಕ ಸಂಸ್ಥೆ ಟಾಟಾ ಗ್ರೂಪ್‌ ಬರೋಬ್ಬರಿ 500 ಹೊಸ ವಿಮಾನಗಳನ್ನು ಖರೀದಿಸಲು ನಿರ್ಧರಿಸಿದೆ ಎಂದು ಹೇಳಲಾಗಿದೆ.

ಏರ್‌ಬಸ್‌ ಮತ್ತು ಬೋಯಿಂಗ್‌ ಸಂಸ್ಥೆಗಳ ಜತೆಗೆ ಈ ನಿಟ್ಟಿನಲ್ಲಿ ಮಾತುಕತೆ ನಡೆಸಲಾಗಿದೆ ಎಂದು ಹಲವು ಆಂಗ್ಲ ಮಾಧ್ಯಮಗಳು ವರದಿ ಮಾಡಿವೆ.

ಖರೀದಿ ಮಾಡುವ ವಿಮಾನಗಳ ಪೈಕಿ ಏರ್‌ಬಸ್‌ ಎ350 ಮತ್ತು ಬೋಯಿಂಗ್‌ 787 ಮತ್ತು 777ನ 100 ಮಾದರಿಯದ್ದು, 400 ಸಣ್ಣ ಪ್ರಮಾಣದ ವಿಮಾನಗಳು ಸೇರಿವೆ ಎಂದು ವರದಿಗಳು ತಿಳಿಸಿವೆ. ಈ ಬಗ್ಗೆ ಟಾಟಾ ಗ್ರೂಪ್‌ ಮತ್ತು 2 ವಿಮಾನ ಪೂರೈಕೆಯ ಕಂಪೆನಿಗಳು ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಈ ಒಟ್ಟು ಡೀಲ್‌ನ ಮೊತ್ತ 100 ಬಿಲಿಯನ್‌ ಡಾಲರ್‌ ಮೀರುವ ಸಾಧ್ಯತೆಯಿದೆ.ದಶಕಗಳ ಹಿಂದೆ ಅಮೆರಿಕದ ವಿಮಾನ ಸಂಸ್ಥೆಯೊಂದು 460 ವಿಮಾನಗಳನ್ನು ಖರೀದಿ ಮಾಡುವ ಬಗ್ಗೆ ಎರಡೂ ಕಂಪೆನಿಗಳ ಜತೆಗೆ ಮಾತುಕತೆ ನಡೆಸಿದ್ದು ಇದುವರೆಗಿನ ದಾಖಲೆಯಾಗಿತ್ತು.