ಇನ್ನು ಮುಖ ತೋರಿಸಿ  ಏರ್‌ರ್ಪೋರ್ಟ್‌ ಒಳಗೆ ಹೋಗಿ… ಏನಿದು ವ್ಯವಸ್ಥೆ?

Team Udayavani, Dec 15, 2022, 7:30 AM IST

ಬೆಂಗಳೂರು, ಹೊಸದಿಲ್ಲಿ ಮತ್ತು ವಾರಾಣಸಿ ವಿಮಾನ ನಿಲ್ದಾಣಗಳಲ್ಲಿ ಡಿಜಿಯಾತ್ರಾ ಎಂಬ ಫೇಸಿಯಲ್‌ ರೆಕಗ್ನಿಶನ್‌ ವ್ಯವಸ್ಥೆ ಜಾರಿಗೆ ಬಂದಿದೆ. ಅಂದರೆ ಇನ್ನು ಮುಂದೆ ಗೇಟ್‌ಗಳಲ್ಲಿ ಮುಖ ತೋರಿಸಿ, ಸೆಕ್ಯುರಿಟಿ ಚೆಕ್‌  ಮುಗಿಸಿ ಒಳಗೆ ಹೋಗಬಹುದು. ಹಾಗಾದರೆ ಏನಿದು ವ್ಯವಸ್ಥೆ? ಹೇಗೆ ಕಾರ್ಯ ನಿರ್ವಹಿಸಲಿದೆ? ಇಲ್ಲಿದೆ ಮಾಹಿತಿ…

ಏನಿದು ಡಿಜಿಯಾತ್ರಾ
ಇದೊಂದು ಫೇಸಿಯಲ್‌ ರೆಕಗ್ನಿಶನ್‌ ವ್ಯವಸ್ಥೆ. ಮುಖವನ್ನೇ ದಾಖಲಾತಿಯಂತೆ ಬಳಸಿಕೊಳ್ಳಬಹುದು. ಇದರಿಂದಾಗಿ ಏರ್‌ಪೋರ್ಟ್‌ಗಳ ಗೇಟ್‌ಗಳಲ್ಲಿ ಬೋರ್ಡಿಂಗ್‌ ಪಾಸ್‌ ಮತ್ತು ಐಡಿ ಕಾರ್ಡ್‌ ತೋರಿಸುವ ಅಗತ್ಯವಿರುವುದಿಲ್ಲ. ಗೇಟ್‌ಗಳಲ್ಲಿನ ಉದ್ದದಕ್ಯೂ ತಪ್ಪಿಸುವುದೇ ಇದರ ಪ್ರಮುಖ ಉದ್ದೇಶ.

ಹೊಸ ವ್ಯವಸ್ಥೆ ಕೆಲಸ ಮಾಡುವುದು ಹೇಗೆ?
1.ಮೊದಲಿಗೆ ಮೊಬೈಲ್‌ನಲ್ಲಿ ಡಿಜಿಯಾತ್ರಾ ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಂಡು ನೋಂದಣಿ ಮಾಡಿಕೊಳ್ಳಿ.
2.ನೋಂದಣಿಗೆ ಆಧಾರ್‌ ಅಥವಾ ಡಿಜಿಲಾಕರ್‌ ಅನ್ನು ಲಿಂಕ್‌ ಮಾಡಬಹುದು.
3.ಸೆಲ್ಫಿ ಮೂಲಕ ನಿಮ್ಮ ಮುಖಚಹರೆಯನ್ನು ನೋಂದಣಿ ಮಾಡಿಕೊಳ್ಳಿ.

ಪ್ರಯಾಣಿಕರು ಏನು ಮಾಡಬೇಕು?
ಎಂಟ್ರಿ ಗೇಟ್‌
ಇ-ಗೇಟ್‌ ಬಳಿ ನಿಂತು ನಿಮ್ಮ ಬೋರ್ಡಿಂಗ್‌ ಪಾಸ್‌ ಸ್ಕ್ಯಾನ್‌ ಮಾಡಿ. ಬಳಿಕ ನಿಗದಿತ ಜಾಗದಲ್ಲಿ ನಿಂತರೆ ನಿಮ್ಮ ಮುಖ ಸ್ಕ್ಯಾನ್‌ ಆಗುತ್ತದೆ. ಬಳಿಕ ಗೇಟ್‌ ತನ್ನಿಂತಾನೇ ಓಪನ್‌ ಆಗುತ್ತದೆ.

ಟರ್ಮಿನಲ್‌
ನಿಮ್ಮ ಏರ್‌ಲೈನ್‌ ಕೌಂಟರ್‌ಗೆ ಹೋಗಿ ನಿಮ್ಮ ಬ್ಯಾಗೇಜ್‌ ಚೆಕ್‌ ಇನ್‌ ಮಾಡಿಸಿ. ಬಳಿಕ ಅಲ್ಲಿಯೂ ನಿಮ್ಮ ಫೇಸ್‌ ರೆಕಗ್ನಿಶನ್‌ ಮೂಲಕ ಬೋರ್ಡಿಂಗ್‌ ಪಾಸ್‌ ದೃಢೀಕರಿಸಿ.

ಸೆಕ್ಯುರಿಟಿ ಟೆಕ್‌ ಮತ್ತು ಬೋರ್ಡಿಂಗ್‌
ನಿಗದಿತ ಜಾಗದಲ್ಲಿ ನಿಂತುಕೊಳ್ಳಿ. ಕೆಮರಾ ಮೂಲಕ ನಿಮ್ಮ ಫೇಸ್‌ ಸ್ಕ್ಯಾನ್‌ ಆಗುತ್ತದೆ. ನಿಮ್ಮ ಮುಖ ಮ್ಯಾಚ್‌ ಆದ ಕೂಡಲೇ ಇ-ಗೇಟ್‌ ಓಪನ್‌ ಆಗುತ್ತದೆ.