ಮೇ 7ಕ್ಕೆ ಯುಜಿ ನೀಟ್‌ ಪರೀಕ್ಷಾ ದಿನಾಂಕ ಪ್ರಕಟ

Team Udayavani, Dec 17, 2022, 7:25 AM IST

ಹೊಸದಿಲ್ಲಿ: ಪ್ರಸಕ್ತ ಶೈಕ್ಷಣಿಕ ವರ್ಷದ ಯುಜಿ ನೀಟ್‌ ಮೇ 7ರಂದು ನಡೆಯಲಿದೆ. ರಾಷ್ಟ್ರೀಯ ಪರೀಕ್ಷಾ ಏಜನ್ಸಿ (ಎನ್‌ಟಿಎ) ಪರೀಕ್ಷಾ ದಿನಾಂಕ ಪ್ರಕಟಿಸಿದೆ.

ನೀಟ್‌ (ಯುಜಿ)-2023 ಅರ್ಜಿ ಸ್ವೀಕಾರ ಪ್ರಕ್ರಿಯೆ ಆರಂಭವಾದ ಬಳಿಕ ಆಸಕ್ತ ವಿದ್ಯಾರ್ಥಿಗಳು ಆನ್‌ಲೈನ್‌ ಅರ್ಜಿ ಸಲ್ಲಿಸಬಹುದು. ಅರ್ಜಿಗಳನ್ನು ಎನ್‌ಟಿಎಯ ಅಧಿಕೃತ ವೆಬ್‌ಸೈಟ್‌ನಲ್ಲಿ ಮಾತ್ರವೇ ಸಲ್ಲಿಸಬೇಕು. ಪ್ರತೀ ವಿದ್ಯಾರ್ಥಿಗೆ ಒಂದು ಬಾರಿ ಮಾತ್ರ ಅರ್ಜಿ ಸಲ್ಲಿಸಲು ಅವಕಾಶವಿದೆ.

ಮೇ 21-31ರ ವರೆಗೆ ಸಿಇಯುಟಿ
ರಾಷ್ಟ್ರೀಯ ಪರೀಕ್ಷಾ ಪ್ರಾಧಿಕಾರ (ಎನ್‌ಟಿಎ)ವು ಸಾಮಾನ್ಯ ವಿಶ್ವವಿದ್ಯಾನಿಲಯ ಪ್ರವೇಶ ಪರೀಕ್ಷೆ (ಸಿಯುಇಟಿ) – 2023ರ ವೇಳಾಪಟ್ಟಿಯನ್ನು ಪ್ರಕಟಿಸಿದೆ.

ಪರೀಕ್ಷಾ ದಿನಾಂಕಗಳು
ಮೇ 21- ಮೇ 31,  2023
ಮೀಸಲು ದಿನಾಂಕಗಳು: ಜೂ. 1, ಜೂ. 7

ಜೆಇಇ ಮೈನ್‌ ನೋಂದಣಿ ಆರಂಭ
2023-24ನೇ ಸಾಲಿನ ಎಂಜಿನಿಯ ರಿಂಗ್‌ ಕೋರ್ಸ್‌ ಪ್ರವೇಶಾತಿಗಾಗಿ ಇರುವ ಜೆಇಇ ಮೈನ್‌ನ ವೇಳಾಪಟ್ಟಿಯನ್ನೂ ಎನ್‌ಟಿಎ ಪ್ರಕಟಿಸಿದ್ದು, ಡಿ. 15ರಿಂದ ನೋಂದಣಿ ಆರಂಭಗೊಂಡಿದೆ. ಜ. 12ರ ವರೆಗೆ ನೋಂದಣಿಗೆ ಅವಕಾಶ ಇದೆ.

ಜೆಇಇ-ಮೈನ್‌ ಪರೀಕ್ಷಾ ದಿನಾಂಕ l ಜನವರಿ 24- 31, 2023

ಸಿಇಟಿ ದಿನಾಂಕ ಚರ್ಚಿಸಿ ನಿರ್ಧಾರ
ಉಡುಪಿ: ನೀಟ್‌ ದಿನಾಂಕ ಪ್ರಕಟವಾಗಿರು ವುದು ಗಮನಕ್ಕೆ ಬಂದಿದೆ. ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ನಡೆಸುವ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ) ಸಂಬಂಧ ಸರಕಾರ ಮತ್ತು ಉನ್ನತ ಶಿಕ್ಷಣ ಸಚಿವರೊಂದಿಗೆ ಚರ್ಚಿಸಿ ಶೀಘ್ರ ದಿನಾಂಕ ನಿಗದಿಪಡಿಸಲಾಗುವುದು ಎಂದು ಪ್ರಾಧಿಕಾರದ ಉನ್ನತ ಮೂಲಗಳು ತಿಳಿಸಿವೆ.