ನೆರವು ದಾನವಲ್ಲ, ಜಾಗತಿಕ ಭದ್ರತೆಯ ಮೇಲಿನ ಹೂಡಿಕೆ: ಝೆಲೆನ್‌ಸ್ಕಿ

Team Udayavani, Dec 23, 2022, 6:15 AM IST

ವಾಷಿಂಗ್ಟನ್‌: ರಷ್ಯಾದ ಆಕ್ರಮಣದ ವಿರುದ್ಧದ ತನ್ನ ಹೋರಾಟಕ್ಕೆ ಸಹಾಯ ಮಾಡಲು ಅಮೆರಿಕ ಸಂಸತ್‌ ಹತ್ತಾರು ಶತಕೋಟಿ ಡಾಲರ್‌ ಮೊತ್ತದ ನೆರವು ನೀಡಲು ಅನುಮೋದನೆ ನೀಡಿದೆ. ಇದು ದಾನವಲ್ಲ, ಬದಲಾಗಿ ಜಾಗತಿಕ ಭದ್ರತೆಯ ಮೇಲಿನ ಹೂಡಿಕೆ ಎಂದು ಉಕ್ರೇನ್‌ ಅಧ್ಯಕ್ಷ ವೊಲೊಡಿಮಿರ್‌ ಝೆಲೆನ್‌ಸ್ಕಿ ಹೇಳಿದರು.

ರಷ್ಯಾ ಜತೆಗಿನ ಯುದ್ಧ ಆರಂಭವಾದ ನಂತರ ಎರಡನೇ ಬಾರಿಗೆ ಅಮೆರಿಕ ಪ್ರವಾಸ ಕೈಗೊಂಡಿರುವ ಅವರು, ಅಮೆರಿಕ ಸಂಸತ್‌ ಅನ್ನು ಉದ್ದೇಶಿಸಿ ಮಾತನಾಡಿ, “ಉಕ್ರೇನ್‌ಗೆ ಬೆಂಬಲ ನೀಡುವುದನ್ನು ಜಗತ್ತು ಮುಂದುವರಿಸುತ್ತದೆ ಎಂಬ ಆಶಾಭಾವ ನನಗಿದೆ,’ ಎಂದರು.

“ನಿಮ್ಮ ಹಣ ದಾನವಲ್ಲ. ಇದು ಜಾಗತಿಕ ಭದ್ರತೆ ಹಾಗೂ ಪ್ರಜಾಪ್ರಭುತ್ವದ ಮೇಲಿನ ಹೂಡಿಕೆಯಾಗಿದೆ. ಅನೇಕ ಕಹಿ ಘಟನೆಗಳ ನಡುವೆಯೂ ಉಕ್ರೇನ್‌ ಸೋತಿಲ್ಲ, ಇನ್ನೂ ಜೀವಂತವಾಗಿದೆ. ಯುದ್ಧದಲ್ಲಿ ನಾವು ರಷ್ಯಾವನ್ನು ಸೋಲಿಸಲಿದ್ದೇವೆ,’ ಎಂದು ಝೆಲೆನ್‌ಸ್ಕಿ ಭರವಸೆ ವ್ಯಕ್ತಪಡಿಸಿದರು. ಇದು ಅಮೆರಿಕಕ್ಕೆ ಝೆಲೆನ್‌ಸ್ಕಿ ಅವರ ಸರ್‌ಪ್ರೈಸ್‌ ಪ್ರವಾಸವಾಗಿದ್ದು, ಅವರ ಈ ಭೇಟಿಯನ್ನು ಬಹಿರಂಗಪಡಿಸದೇ ಗುಟ್ಟಾಗಿಡಲಾಗಿತ್ತು.