ಹೊಸಬರ ‘ಅಂತರಂಗ’ ಅನಾವರಣ

Team Udayavani, Dec 25, 2022, 5:16 PM IST

ಬಹುತೇಕ ಹೊಸ ಪ್ರತಿಭೆಗಳೆ ಸೇರಿ ನಿರ್ಮಿಸಿರುವ “ಅಂತರಂಗ’ ಸಿನಿಮಾದ ಮೊದಲ ಟೀಸರ್‌ ಮತ್ತು ಹಾಡುಗಳು ಇತ್ತೀಚೆಗೆ ಬಿಡುಗಡೆಯಾಯಿತು. ಹಿರಿಯ ನಿರ್ದೇಶಕ ಎಸ್‌. ನಾರಾಯಣ್, ನಟಿ ರೂಪಿಕಾ, ನಟ ಚಂದ್ರಕೀರ್ತಿ ಸೇರಿದಂತೆ ಚಿತ್ರರಂಗದ ಹಲವು ಗಣ್ಯರು “ಅಂತರಂಗ’ ಸಿನಿಮಾದ ಟೀಸರ್‌ ಮತ್ತು ಹಾಡುಗಳ ಬಿಡುಗಡೆ ಕಾರ್ಯಕ್ರಮದಲ್ಲಿ ಹಾಜರಿದ್ದು, “ಅಂತರಂಗ’ ಚಿತ್ರತಂಡಕ್ಕೆ ಶುಭ ಹಾರೈಸಿದರು.

ಅಂದಹಾಗೆ, “ಅಂತರಂಗ’ ಸಸ್ಪೆನ್ಸ್‌-ಥ್ರಿಲ್ಲರ್‌ ಶೈಲಿಯ ಸಿನಿಮಾವಾಗಿದ್ದು, “ಎಲ್.ಎನ್‌.ಆರ್‌ ಪ್ರೊಡಕ್ಷನ್ಸ್‌’ ಬ್ಯಾನರಿನಲ್ಲಿ ಲಕ್ಷ್ಮೀನಾರಾಯಣ ರಾಜು ಅರಸ್‌ ನಿರ್ಮಿಸಿರುವ “ಅಂತರಂಗ’ ಸಿನಿಮಾಕ್ಕೆ ವಿಜಯಸೂರ್ಯ ನಿರ್ದೇಶನವಿದೆ.

ನಟ ದಿ. ಉದಯ್‌ “ಅಂತರಂಗ’ ಚಿತ್ರದಲ್ಲಿ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಲಕ್ಷ್ಮೀನಾರಾಯಣ ರಾಜು ಅರಸು, ಅವಿನಾಶ್‌, ಮಾಸ್ತಿ, ಶ್ರೇಯಾ ಪಾವನಾ, ಮೋಹನ್‌ ಜುನೇಜಾ ಮೊದಲಾದವರು ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಇದೇ ವೇಳೆ ಮಾತನಾಡಿದ ನಟ ಮತ್ತು ನಿರ್ಮಾಪಕ ಲಕ್ಷ್ಮೀನಾರಾಯಣ ರಾಜು ಅರಸ್‌, “ಸಿನಿಮಾದ ಹೆಸರೇ ಹೇಳುವಂತೆ, ಮನುಷ್ಯನ “ಅಂತರಂಗ’ವನ್ನು ತೆರೆದಿಡುವ ಕಥೆ ಈ ಸಿನಿಮಾದಲ್ಲಿದೆ. ಗಂಡ-ಹೆಂಡತಿ ನಡುವಿನ ಸಂಬಂಧದಲ್ಲಿ ಮೂರನೇ ವ್ಯಕ್ತಿಯ ಮಧ್ಯ ಪ್ರವೇಶವಾದರೆ ಏನೆಲ್ಲ ನಡೆಯುತ್ತದೆ. ತುಂಬಿದ ಮನೆಯಲ್ಲಿ ಯಾರೋ ಒಬ್ಬರು ಮಾಡಿದ ತಪ್ಪಿಗೆ ಇಡೀ ಕುಟುಂಬ ಹೇಗೆ ಪರಿತಪಿಸುತ್ತದೆ ಎಂಬುದನ್ನು ಸಿನಿಮಾದ ಕಥೆಯ ಒಂದು ಎಳೆ. ನಟ ದಿ. ಉದಯ್‌ ಈ ಸಿನಿಮಾದ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಸಿನಿಮಾದ ಬಹುತೇಕ ಕೆಲಸಗಳು ಪೂರ್ಣಗೊಂಡಿದ್ದು, ಜನವರಿ ಅಂತ್ಯದೊಳಗೆ ಸಿನಿಮಾವನ್ನು ಬಿಡುಗಡೆ ಮಾಡುವ ಯೋಚನೆಯಿದೆ’ ಎಂದರು.

“ನಟ ಉದಯ್‌ ಅವರ ನಿಧನ ಮತ್ತು ಕೋವಿಡ್‌ನಿಂದಾಗಿ ಸಿನಿಮಾ ಬಿಡುಗಡೆ ತಡವಾಯಿತು. ಇಂದಿನ ಜನರೇಶನ್‌ ಆಡಿಯನ್ಸ್‌ಗೆ ಇಷ್ಟವಾಗುವಂತಹ ಹಲವು ಅಂಶಗಳು “ಅಂತರಂಗ’ ಸಿನಿಮಾದಲ್ಲಿದೆ. ಇದರಲ್ಲಿ ಒಂದು ಸಂದೇಶವನ್ನೂ ಹೇಳಿದ್ದೇವೆ’ ಎಂಬುದು ಚಿತ್ರದ ನಿರ್ದೇಶಕ ವಿಜಯ್‌ ಸೂರ್ಯ ಮಾತು.

“ಅಂತರಂಗ’ ಚಿತ್ರಕ್ಕೆ ಮಾಸ್ತಿ ಸಂಭಾಷಣೆ, ಹರೀಶ್‌ ಜಿಂದೆ ಛಾಯಾಗ್ರಹಣ, ಅರವಿಂದ ಸ್ವಾಮಿ ಸಂಕಲನವಿದೆ. ಚಿತ್ರದ ಹಾಡುಗಳಿಗೆ ಚೇತನ್‌ ಸಾಸ್ಕಾ ಸಂಗೀತ ಸಂಯೋಜಿಸಿದ್ದು, ಡಾ ವಿ ನಾಗೇಂದ್ರ ಪ್ರಸಾದ್‌, ಕವಿರಾಜ್‌ ಸಾಹಿತ್ಯವಿದೆ. ರಾಜೇಶ್‌ ಕೃಷ್ಣನ್‌, ಅನುರಾಧಾ ಭಟ್‌ ಮೊದಲಾದವರು ಹಾಡುಗಳಿಗೆ ಧ್ವನಿಯಾಗಿದ್ದಾರೆ. ಚಿತ್ರಕ್ಕೆ ಹರ್ಷ ಕೋಗೋಡು ಹಿನ್ನೆಲೆ ಸಂಗೀತವಿದೆ.