ಮರವೂರು: ರಸ್ತೆ ಕಾಮಗಾರಿಗೆ ತೊಡಕು… ಸೇತುವೆ ಪೂರ್ಣವಾದರೂ ಸಂಚಾರಕ್ಕಿಲ್ಲ ಅವಕಾಶ

Team Udayavani, Dec 30, 2022, 6:20 AM IST

ಮಹಾನಗರ: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಸಂಪರ್ಕಿಸುವ ಮುಖ್ಯ ರಸ್ತೆಯ ಮರವೂರಿನಲ್ಲಿ ಫಲ್ಗುಣಿ ನದಿಗೆ ಅಡ್ಡಲಾಗಿ ನೂತನ ಸೇತುವೆ ನಿರ್ಮಾಣ ಕಾಮಗಾರಿ ಪೂರ್ಣಗೊಂಡರೂ ಸಂಪರ್ಕ ರಸ್ತೆ ಕಾಮಗಾರಿ ಪೂರ್ಣಗೊಳ್ಳದೆ ವಾಹನ ಸಂಚಾರಕ್ಕೆ ಅವಕಾಶ ಸದ್ಯಕ್ಕಿಲ್ಲ !

ಮರವೂರಿನಿಂದ ವಿಮಾನ ನಿಲ್ದಾ ಣದ ಕೆಂಜಾರು ಪ್ರವೇಶ ದ್ವಾರದ ವರೆಗೆ 2 ಕಿ.ಮೀ. ಚತುಷ್ಪಥ ರಸ್ತೆ ಸಹಿತ ಸೇತುವೆಯನ್ನು ಸುಮಾರು 50 ಕೋಟಿ.ರೂ. ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಲು ಲೋಕೋಪಯೋಗಿ ಇಲಾಖೆಯಿಂದ ಉದ್ದೇಶಿಲಾಗಿದೆ. ಅದರಂತೆ ಮೊದ ಲಾಗಿ ಸೇತುವೆ ಕಾಮಗಾರಿ ಪೂರ್ಣ ಗೊಂಡಿದ್ದು, ಚತುಷ್ಪಥ ರಸ್ತೆ ಕಾಮಗಾರಿ ಪ್ರಗತಿಯಲ್ಲಿದೆ. ಮೇ ತಿಂಗಳಾಂತ್ಯದ ವೇಳೆಗೆ ರಸ್ತೆ ಕಾಮಗಾರಿ ಮುಗಿಸಲು ಉದ್ದೇಶಿಸಲಾಗಿದ್ದು, ಆ ಬಳಿಕ ಸೇತು ವೆಯಲ್ಲಿ ವಾಹನ ಸಂಚಾರಕ್ಕೆ ಅವಕಾಶ ಸಿಗುವ ನಿರೀಕ್ಷೆಯಿದೆ.

198 ಮೀ. ಉದ್ದದ ಸೇತುವೆ
198 ಮೀ. ಉದ್ದ ಮತ್ತು 12 ಮೀ. ಅಗಲದ ಸೇತುವೆಯಾಗಿದ್ದು, ಒಂದು ಬದಿಯಲ್ಲಿ (ಪಶ್ಚಿಮ) 1.5 ಮೀ. ಫುಟ್‌ಪಾತ್‌ ನಿರ್ಮಾಣವಾಗಿದೆ. 8 ಆಧಾರ ಸ್ತಂಭಗಳ ಮೇಲೆ ಸೇತುವೆ ನಿರ್ಮಿಸಲಾಗಿದೆ. ಒಟ್ಟು 50 ಕೋಟಿ ರೂ. ವೆಚ್ಚದಲ್ಲಿ ಸೇತುವೆಗೆ ಸುಮಾರು 13 ಕೋಟಿ. ರೂ. ವೆಚ್ಚ ಅಂದಾಜಿಸಲಾಗಿದೆ. ಚತುಷ್ಪಥ ರಸ್ತೆ ಪೂರ್ಣಗೊಂಡ ಬಳಿಕ ಹೊಸ ಸೇತುವೆ ಮಂಗಳೂರಿನಿಂದ ವಿಮಾನ ನಿಲ್ದಾಣಕ್ಕೆ ತೆರಳಲು ಬಳಕೆಯಾಗಲಿದೆ. ಹೊಸ, ಹಳೆಯ ಸೇತುವೆ ನಡುವೆ 5 ಮೀ. ಅಂತರವಿದೆ.

ರಸ್ತೆ ಕಾಮಗಾರಿ ಪ್ರಗತಿ
ಪ್ರಸ್ತುತ ವಿಮಾನ ನಿಲ್ದಾಣ ಪ್ರವೇಶ ದ್ವಾರದ ಬಳಿಯಿಂದ ಸೇತುವೆ ವರೆಗೆ ರಸ್ತೆ ನಿರ್ಮಾಣ ಕಾಮಗಾರಿ ನಡೆಯುತ್ತಿದೆ. ಕಡಿದಾದ ಜಾಗವನ್ನು ಅಗ ಯ ಲಾ ಗಿದ್ದು, ತಗ್ಗು ಪ್ರದೇಶಗಳಲ್ಲಿ ಮಣ್ಣು ತುಂಬಿಸಿ ರಸ್ತೆ ಮಟ್ಟವನ್ನು ಎತ್ತರಗೊಳಿಸಲಾಗಿದೆ. ಮರವೂರು ಬಸ್‌ ತಂಗುದಾಣದ ಬಳಿ ರಸ್ತೆಗೆ ಅಡ್ಡಲಾಗಿ ರೈಲ್ವೇ ಸೇತುವೆ ಹಾದು ಹೋಗಿದ್ದು. ಇಲ್ಲಿ ಮಾತ್ರ ಕಾಮಗಾರಿಗೆ ಅಡ್ಡಿಯಾಗಲಿದೆ.

ಸುಮಾರು 60 ಮೀ. ರಸ್ತೆ ಯನ್ನು ರೈಲ್ವೇ ಇಲಾಖೆಯೇ ನಿರ್ಮಿಸಿ ಕೊಡುವ ನಿಟ್ಟಿನಲ್ಲಿ ಮಾತುಕತೆಗಳು ನಡೆಯುತ್ತಿದೆ.

ಭೂ ಸ್ವಾಧೀನ ವಿಳಂಬ
ಸೇತುವೆಗೆ ಬಜಪೆ ಭಾಗದಲ್ಲಿ ಸಂಪರ್ಕ ರಸ್ತೆ ನಿರ್ಮಿಸಲು ಸುಮಾರು 28 ಸೆಂಟ್ಸ್‌ ಗಳಷ್ಟು ಖಾಸಗಿ ಸ್ಥಳದ ಭೂ ಸ್ವಾಧೀನ ಪ್ರಕ್ರಿಯೆ ಸ್ವಲ್ಪ ವಿಳಂಬವಾಗಿದೆ. ಭೂ ಸ್ವಾಧೀನಕ್ಕೆ ಸಂಬಂಧಿಸಿದ ಕಡತ ಎಸಿ ಕಚೇರಿಗೆ ಜಿಲ್ಲಾಧಿಕಾರಿಯವರ ಕಚೇರಿಗೆ ಹೋಗಿದ್ದು, ಕೆಲವೇ ದಿನಗಳಲ್ಲಿ ಈ ಪ್ರಕ್ರಿಯೆ ಪೂರ್ಣಗೊಳ್ಳಲಿದ್ದು, ಬಳಿಕ ಕಾಮಗಾರಿಗೆ ವೇಗ ಸಿಗಲಿದೆ ರಸ್ತೆ ಅಲೈನ್ಮೆಂಟ್‌ ಒಂದೇ ರೀತಿಯಲ್ಲಿ ಇರಬೇಕಾದ ಕಾರಣ, ಮಧ್ಯಮಧ್ಯದಲ್ಲಿ ರಸ್ತೆ ನಿರ್ಮಾಣ ಮಾಡಲು ಸಾಧ್ಯವಿಲ್ಲ. ಒಂದು ಬದಿಯಿಂದಲೇ ಪೂರ್ಣಗೊಳಿಸುತ್ತಾ ಮುಂದುವರಿಯಬೇಕಿದೆ ಎನ್ನುತ್ತಾರೆ ಅಧಿಕಾರಿಗಳು.

ಮೇ ಅಂತ್ಯ ದೊಳಗೆ ಪೂರ್ಣ
ಮರವೂರಿನಲ್ಲಿ ಸೇತುವೆ ಕಾಮಗಾರಿ ಪೂರ್ಣಗೊಂಡಿದೆ. ಆದರೆ ಸೇತುವೆಗೆ ಸಂಪರ್ಕ ಕಲ್ಪಿಸುವ ರಸ್ತೆ ಕಾಮಗಾರಿ ಪ್ರಗತಿಯಲ್ಲಿದ್ದು, ಮಂಗಳೂರು ಭಾಗದಲ್ಲಿ ಕಾಂಕ್ರೀಟ್‌ ರಸ್ತೆ ನಿರ್ಮಿಸಿ ಕ್ಯೂರಿಂಗ್‌ ಆಗುತ್ತಿದೆ. ಬಜಪೆ ಭಾಗದಿಂದ ರಸ್ತೆ ನಿರ್ಮಾಣ ಕಾಮಗಾರಿ ಪ್ರಗತಿಯಲ್ಲಿದ್ದು, ಮೇ ಅಂತ್ಯದೊಳಗೆ ಪೂರ್ಣಗೊಳಿಸಿ, ವಾಹನ ಸಂಚಾರಕ್ಕೆ ಮುಕ್ತಗೊಳಿಸಲು ಉದ್ದೇಶಿಸಲಾಗಿದೆ.
-ಯಶವಂತ್‌, ಕಾರ್ಯನಿರ್ವಾಹಕ ಎಂಜಿನಿಯರ್‌

– ಭರತ್ ಶೆಟ್ಟಿಗಾರ್