ಹಲವು ವರ್ಷ ಪ್ರೀತಿಸಿದ್ದರೂ ಮದುವೆಗೆ ನಕಾರ; ಫೇಸ್ಬುಕ್‌ ಲೈವ್‌ ಮಾಡಿ ಜೀವವನ್ನೇ ಕೊನೆಯಾಗಿಸಿಕೊಂಡ ಯುವಕ.!

Team Udayavani, Dec 31, 2022, 1:16 PM IST

ಅಸ್ಸಾಂ: ಪ್ರೀತಿಸುತ್ತಿದ್ದ ಯುವತಿ ಮದುವೆಯ ಪ್ರಸ್ತಾಪವನ್ನು ತಿರಸ್ಕರಿಸಿದ ಕಾರಣ ಯುವಕನೊಬ್ಬ ದುಃಖದಿಂದ ತನ್ನ ಜೀವವನ್ನೇ ಕೊನೆಯಾಗಿಸಿಕೊಂಡ ಘಟನೆ ಕ್ಯಾಚಾರ್ಸ್ ಕಲಾಯಿನ್ ಪ್ರದೇಶದಲ್ಲಿ ನಡೆದಿದೆ.

27 ವರ್ಷದ ಜಯದೀಪ್ ರಾಯ್ ಕಳೆದ ಕೆಲ ವರ್ಷಗಳಿಂದ ಯುವತಿಯೊಬ್ಬಳನ್ನು ಪ್ರೀತಿಸುತ್ತಿದ್ದ. ಇತ್ತೀಚೆಗೆ ತನ್ನ ಪ್ರೇಯಸಿಗೆ  ಮದುವೆಯ ಪ್ರಸ್ತಾಪವನ್ನು ಮಾಡಿದ್ದ. ಎಲ್ಲರ ಮುಂದೆ ಮದುವೆಯ ಪ್ರಸ್ತಾಪವನ್ನು ಮಾಡಿದ್ದರೂ, ಆಕೆ ಅದನ್ನು ತಿರಸ್ಕರಿಸಿದ್ದಳು. ಇದಾದ ಬಳಿಕ ಯುವತಿ ಮನೆವರು ಕೂಡ ಯುವಕನಿಗೆ ಬೆದರಿಕೆ ಹಾಕಿ, ಆಕೆಯನ್ನು ಪ್ರೀತಿಸಿದರೆ ಸುಮ್ಮನೆ ಬಿಡುವುದಿಲ್ಲ ಒಂದು ಗತಿ ಕಾಣಿಸುತ್ತೇವೆ ಎಂದು ಯುವಕನಿಗೆ ಬೆದರಿಕೆ ಹಾಕಿದ್ದರು ಎಂದು ವರದಿ ತಿಳಿಸಿದೆ.

ಇದರಿಂದ ನೊಂದುಕೊಂಡಿದ್ದ ಯುವಕ ಇತ್ತೀಚೆಗೆ ಫೇಸ್‌ ಬುಕ್‌ ನಲ್ಲಿ ಲೈವ್‌ ನಲ್ಲಿ ಯುವತಿ ಮದುವೆ ಪ್ರಸ್ತಾಪ ತಿರಸ್ಕರಿಸಿದ ವಿಚಾರವನ್ನು ಹೇಳಿ, ನನ್ನಿಂದ ಆಕೆಗೆ ಯಾವ ಕಷ್ಟವೂ ಆಗಬಾರದೆಂದು, ಮನೆಯವರಲ್ಲಿ ಕ್ಷಮೆ ಕೇಳಿ, ಫೇಸ್‌ ಬುಕ್‌ ಲೈವ್‌ ಸ್ಟ್ರೀಮಿಂಗ್‌ ಇರುವಾಗಲೇ ಫ್ಯಾನಿಗೆ ಕೊರಳೊಡ್ಡಿ ದುರಂತ ಅಂತ್ಯ ಕಂಡಿದ್ದಾನೆ.

ಈ ರೀತಿ ಮಾಡಿಕೊಳ್ಳುವ ಯುವಕ ಸಹೋದರನಿಗೆ ಮೆಸೇಜ್‌ ಮಾಡಿದ್ದಾನೆ. ಆ ಬಳಿಕ ಮನೆಯವರ ಎಲ್ಲರ ಸಂಪರ್ಕವನ್ನು ಬ್ಲಾಕ್‌ ಮಾಡಿಕೊಂಡಿದ್ದ ಎಂದು ವರದಿ ತಿಳಿಸಿದೆ.