ಈ ವರ್ಷ ಕಾಶ್ಮೀರದಲ್ಲಿ ನಡೆದ ಎನ್‌ಕೌಂಟರ್‌ ಗಳಲ್ಲಿ ಹತರಾದ ಉಗ್ರರೆಷ್ಟು?

ಉಗ್ರರ ದಾಳಿಗೆ 3 ಕಾಶ್ಮೀರಿ ಪಂಡಿತರು ಸೇರಿ 15 ಮುಸ್ಲಿಮರೂ ಬಲಿ

Team Udayavani, Dec 31, 2022, 4:23 PM IST

ಶ್ರೀನಗರ : 2022 ರಲ್ಲಿ ಕಾಶ್ಮೀರದಲ್ಲಿ ಭದ್ರತಾ ಸಿಬಂದಿಯೊಂದಿಗೆ ನಡೆದ ಎನ್‌ಕೌಂಟರ್‌ನಲ್ಲಿ 42 ವಿದೇಶಿ ಭಯೋತ್ಪಾದಕರು ಸೇರಿದಂತೆ ಒಟ್ಟು 172 ಭಯೋತ್ಪಾದಕರು ಹತರಾಗಿದ್ದಾರೆ ಎಂದು ಕಾಶ್ಮೀರ ಹೆಚ್ಚುವರಿ ಪೊಲೀಸ್ ಮಹಾನಿರ್ದೇಶಕ ವಿಜಯ್ ಕುಮಾರ್ ಶುಕ್ರವಾರ ತಿಳಿಸಿದ್ದಾರೆ.

ಕಾಶ್ಮೀರದಲ್ಲಿ 93 ಯಶಸ್ವಿ ಎನ್‌ಕೌಂಟರ್‌ಗಳಲ್ಲಿ ಈ ಭಯೋತ್ಪಾದಕರು ಹತರಾಗಿದ್ದರು. ನಿಷೇಧಿತ ಭಯೋತ್ಪಾದಕ ಸಂಘಟನೆಯಾದ ದಿ ರೆಸಿಸ್ಟೆನ್ಸ್ ಫ್ರಂಟ್ (ಟಿಆರ್‌ಎಫ್)/ಲಷ್ಕರ್-ಎ-ತೈಬಾ (ಎಲ್‌ಇಟಿ) ಯಿಂದ ಗರಿಷ್ಠ 108 ಭಯೋತ್ಪಾದಕರನ್ನು ಹತ್ಯೆಗೈಯಲಾಗಿದೆ. ಜೈಶ್-ಎ-ಮೊಹಮ್ಮದ್ (ಜೆಎಂ) ನಿಂದ 35 ಮಂದಿಯನ್ನು, ತಟಸ್ಥಗೊಳಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.

“ಈ ವರ್ಷ ಉಗ್ರರ ದಾಳಿಯಲ್ಲಿ 21 ಸ್ಥಳೀಯರು (3 ಕಾಶ್ಮೀರಿ ಪಂಡಿತರು, 15 ಮುಸ್ಲಿಮರು, 6 ಹಿಂದೂಗಳು) ಮತ್ತು ಇತರ ರಾಜ್ಯಗಳ 08 ಸೇರಿ ಮಂದಿ ಒಟ್ಟು 29 ನಾಗರಿಕರು ಹತ್ಯೆಗೀಡಾಗಿದ್ದಾರೆ. 14 ಮಂದಿ ಜಮ್ಮು ಮತ್ತು ಕಾಶ್ಮೀರ ಪೊಲೀಸ್ ಸಿಬಂದಿಗಳು ಸೇರಿದಂತೆ ಒಟ್ಟು 26 ಭದ್ರತಾ ಪಡೆಗಳ ಸಿಬಂದಿ ಭಯೋತ್ಪಾದಕ ದಾಳಿ ಮತ್ತು ಎನ್‌ಕೌಂಟರ್‌ಗಳ ವೇಳೆ ಹುತಾತ್ಮ ರಾಗಿದ್ದಾರೆ. ಈ ಭಯೋತ್ಪಾದಕ ಅಪರಾಧಗಳಲ್ಲಿ ಭಾಗಿಯಾಗಿರುವ ಎಲ್ಲಾ ಭಯೋತ್ಪಾದಕರನ್ನು ಬಸಿತ್ ದಾರ್ ಮತ್ತು ಆದಿಲ್ ವಾನಿ ಹೊರತುಪಡಿಸಿ ಹತ್ಯೆ ಗೈಯಲಾಗಿದೆ ಎಂದು ಅವರು ಹೇಳಿದರು.

ಎಚ್‌ಎಂ ಮುಖ್ಯಸ್ಥ ಫಾರೂಕ್ ನಲಿ ಮತ್ತು ಎಲ್‌ಇಟಿ ಕಮಾಂಡರ್ ರಿಯಾಜ್ ಸೆಟ್ರಿ ಅವರನ್ನು ಹೊರತುಪಡಿಸಿ ಎಲ್ಲಾ ಭಯೋತ್ಪಾದಕ ಸಂಘಟನೆಗಳ ಮುಖ್ಯಸ್ಥರು ಮತ್ತು ಟಾಪ್ ಕಮಾಂಡರ್‌ಗಳನ್ನು ತಟಸ್ಥಗೊಳಿಸಲಾಗಿದೆ ಎಂದು ಎಡಿಜಿಪಿ ಹೇಳಿದ್ದಾರೆ.

ಈ ವರ್ಷ ಗರಿಷ್ಠ 74 ಭಯೋತ್ಪಾದಕರು ಲಷ್ಕರ್-ಎ-ತೊಯ್ಬಾ (ಎಲ್‌ಇಟಿ) ಸೇರಿದ್ದಾರೆ ಎಂದು ಎಡಿಜಿಪಿ ಕುಮಾರ್ ಹೇಳಿದ್ದಾರೆ, ಅದರಲ್ಲಿ 18 ಭಯೋತ್ಪಾದಕರು ಇನ್ನೂ ಸಕ್ರಿಯರಾಗಿದ್ದಾರೆ.

“ಕಾನೂನು ಮತ್ತು ಸುವ್ಯವಸ್ಥೆಯಲ್ಲಿ, ನಾವು ಶಾಂತಿ ಮತ್ತು ಸ್ಥಿರತೆಯಲ್ಲಿ 100 ಪ್ರತಿಶತ ಯಶಸ್ಸನ್ನು ಸಾಧಿಸಿದ್ದೇವೆ. 2016 ರಲ್ಲಿ 2897 ಕಾನೂನು ಮತ್ತು ಸುವ್ಯವಸ್ಥೆಯ ಘಟನೆಗಳಿಂದ 2022 ರಲ್ಲಿ 26 ಸಣ್ಣ ಪ್ರಕರಣಗಳು. ಕಳೆದ 3 ವರ್ಷಗಳಲ್ಲಿ ಕಾನೂನು ಮತ್ತು ಸುವ್ಯವಸ್ಥೆ ಸಮಸ್ಯೆಗಳನ್ನು ನಿಭಾಯಿಸುವಾಗ ಗುಂಡಿನ ದಾಳಿಯಲ್ಲಿ ಯಾವುದೇ ನಾಗರಿಕರು ಪ್ರಾಣ ಕಳೆದುಕೊಂಡಿಲ್ಲ ಎಂದು ಎಡಿಜಿಪಿ ಹೇಳಿದ್ದಾರೆ.

ಎಚ್‌ಎಂ ಮುಖ್ಯಸ್ಥ ಫಾರೂಕ್ ನಲಿ ಮತ್ತು ಎಲ್‌ಇಟಿ ಕಮಾಂಡರ್ ರೆಯಾಜ್ ಸೆಟ್ರಿ ಹೊರತುಪಡಿಸಿ ಎಲ್ಲಾ ಭಯೋತ್ಪಾದಕ ಸಂಘಟನೆಗಳ ಮುಖ್ಯಸ್ಥರು ಮತ್ತು ಉನ್ನತ ಕಮಾಂಡರ್‌ಗಳನ್ನು ಹೊಡೆದುರುಳಿಸಲಾಗಿದೆ ಮತ್ತು ಇಬ್ಬರನ್ನೂ ಶೀಘ್ರದಲ್ಲೇ ತಟಸ್ಥಗೊಳಿಸಲಾಗುವುದು ”ಎಂದು ಕುಮಾರ್ ಹೇಳಿದ್ದಾರೆ.

ಹರತಾಳ ಇಲ್ಲ, ಬೀದಿ ಹಿಂಸಾಚಾರ, ವಿಶೇಷವಾಗಿ ಎನ್‌ಕೌಂಟರ್ ಸ್ಥಳಗಳಲ್ಲಿ ಕಲ್ಲು ತೂರಾಟ, ಇಂಟರ್ನೆಟ್ ಸ್ಥಗಿತ, ಹತ್ಯೆಗೀಡಾದ ಭಯೋತ್ಪಾದಕರ ಶವಯಾತ್ರೆ, ಭಯೋತ್ಪಾದಕರಿಗೆ ಮೆರುಗು ನೀಡದಿರುವುದು ಸಮಾಜದ ಎಲ್ಲಾ ವರ್ಗಗಳಿಗೆ ಪ್ರಯೋಜನಕಾರಿಯಾಗಿದೆ ಎಂದು ಕುಮಾರ್ ಹೇಳಿದರು.