ಮತಾಂತರ: ಸ್ಥಿತಿಗತಿ ತಿಳಿಸಿ; ಸುಪ್ರೀಂಕೋರ್ಟ್‌

Team Udayavani, Jan 3, 2023, 6:15 AM IST

ಹೊಸದಿಲ್ಲಿ: ದೇಶದ ವಿವಿಧ ರಾಜ್ಯಗಳಲ್ಲಿ ಜಾರಿಯಾಗಿರುವ ಮತಾಂತರ ನಿಗ್ರಹ ಕಾನೂನು ಪ್ರಶ್ನಿಸಿ, ವಿವಿಧ ಹೈಕೋರ್ಟ್‌ಗಳಲ್ಲಿ ಇತ್ಯರ್ಥಗೊಳ್ಳಲು ಬಾಕಿ ಉಳಿದಿರುವ ಅರ್ಜಿಗಳ ಸ್ಥಿತಿಗತಿಯನ್ನು ತಿಳಿಸುವಂತೆ ಸುಪ್ರೀಂಕೋರ್ಟ್‌ ಸೂಚನೆ ನೀಡಿದೆ.

ಸಿಟಿಜನ್‌ ಫಾರ್‌ ಜಸ್ಟೀಸ್‌ ಆ್ಯಂಡ್‌ ಪೀಸ್‌ ಎನ್ನುವ ಸರ್ಕಾರೇತರ ಸಂಸ್ಥೆ, ಉತ್ತರ ಪ್ರದೇಶ, ಮಧ್ಯ ಪ್ರದೇಶ, ಉತ್ತರಾಖಂಡ ಹಾಗೂ ಹಿಮಾಚಲ ಪ್ರದೇಶ ರಾಜ್ಯಗಳಿಗೆ ಹೈಕೋರ್ಟ್‌ಗಳ ಮುಂದೆ ಉಳಿದಿರುವ ಬಾಕಿ ಅರ್ಜಿಗಳ ವಿಚಾರಣಾ ಹಂತ-ಸ್ಥಿತಿಗತಿಯನ್ನು ತಿಳಿಸುವಂತೆ ಸುಪ್ರೀಂ ಮುಖ್ಯ ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್‌ ನೇತೃತ್ವದ ನ್ಯಾಯಪೀಠ ಸೂಚಿಸಿದೆ.

ಅರ್ಜಿಗಳ ಬಗ್ಗೆ ಗಮನಹರಿಸಲು ಸಿದ್ಧವಾಗಿದ್ದು, ಎಲ್ಲಾ ಅರ್ಜಿಗಳು ಒಂದೇ ವಿಚಾರಕ್ಕೆ ಸಂಬಂಧಿಸಿದ್ದಾಗಿದ್ದರೆ ಅವುಗಳನ್ನು ವರ್ಗಾಯಿಸುವ ಅಥವಾ ಹೈಕೋರ್ಟ್‌ಗಳಲ್ಲೇ ಮುಂದುವರಿಸುವ ಬಗ್ಗೆ ತೀರ್ಮಾನ ಕೈಗೊಳ್ಳುವುದಾಗಿ ನ್ಯಾಯಪೀಠ ತಿಳಿಸಿದೆ.