ಜೈಶ್‌ ಎ ಮೊಹಮ್ಮದ್‌ ಸಹವರ್ತಿ ‘ಪ್ಯಾಫ್’ಗೆ ಕೇಂದ್ರ ನಿಷೇಧ

Team Udayavani, Jan 7, 2023, 9:39 PM IST

ನವದೆಹಲಿ: ಕೇಂದ್ರ ಸರ್ಕಾರ ಉಗ್ರ ಸಂಘಟನೆ ಜೈಶ್‌ ಎ ಮೊಹಮ್ಮದ್‌ನಿಂದ ನಿಯಂತ್ರಿಸಲ್ಪಡುತ್ತಿದ್ದ ಪ್ಯಾಫ್ (ಪೀಪಲ್ಸ್‌ ಆ್ಯಂಟಿ ಫ್ಯಾಸಿಸ್ಟ್‌ ಫ್ರಂಟ್‌) ಸಂಘಟನೆಯನ್ನು ನಿಷೇಧಿಸಿದೆ. ನಿಷೇಧಿತ ಜೈಶ್‌ನ ಇನ್ನೊಂದು ಮುಖ ಪ್ಯಾಫ್ ಎಂದು ಕೇಂದ್ರ ಗೃಹ ಸಚಿವಾಲಯ ಹೇಳಿದೆ.

ಇದೇ ವೇಳೆ ಲಷ್ಕರ್‌ ಎ ತೊಯ್ಬಾ ಉಗ್ರ ಸಂಘಟನೆಯ ಸದಸ್ಯ ಅರ್ಬಾಝ್ ಅಹ್ಮದ್‌ ಮಿರ್‌ನನ್ನು ಉಗ್ರ ಎಂದೂ ಘೋಷಿಸಿದೆ.

ಪ್ಯಾಫ್ ಸಂಘಟನೆ ಸತತವಾಗಿ ಜಮ್ಮು ಮತ್ತು ಕಾಶ್ಮೀರಕ್ಕೆ ಹೊರಗಿನಿಂದ ಬಂದ ನಾಗರಿಕರು, ಉದ್ಯೋಗಿಗಳು, ರಾಜಕಾರಣಿಗಳು, ಭದ್ರತಾಪಡೆಗಳಿಗೆ ಬೆದರಿಕೆ ಹಾಕುತ್ತಲೇ ಇದೆ. ಜಮ್ಮು ಮತ್ತು ಕಾಶ್ಮೀರ ಹಾಗೂ ದೇಶದ ಇತರೆ ಭಾಗಗಳಲ್ಲಿ ಉಗ್ರ ಚಟುವಟಿಕೆ ನಡೆಸಲು ಇದು ಸಕ್ರಿಯವಾಗಿ ಕುಮ್ಮಕ್ಕು ನೀಡುತ್ತಿದೆ.

ಯುವಕರನ್ನು ಉಗ್ರ ಸಂಘಟನೆಗಳಿಗೆ ಸೇರಿಸಿಕೊಂಡು, ತರಬೇತಿ ನೀಡಿ ಅವರನ್ನು ತೀವ್ರವಾದಿಗಳನ್ನಾಗಿಸುವುದಕ್ಕೆ ಪ್ರಯತ್ನ ಮಾಡುತ್ತಿದೆ ಎಂದು ಕೇಂದ್ರ ಗೃಹ ಸಚಿವಾಲಯ ಹೇಳಿದೆ.