ಅಕ್ಷರ ಜಾತ್ರೆಯಲ್ಲಿ ಪುನೀತ ಭಾವ

Team Udayavani, Jan 8, 2023, 5:45 AM IST

ಹಾವೇರಿ: ಏಲಕ್ಕಿ ಕಂಪಿನ ನಾಡಲ್ಲಿ ನಡೆಯುತ್ತಿರುವ ಅಕ್ಷರ ಜಾತ್ರೆಯಲ್ಲೂ ಸಾಹಿತ್ಯಾಭಿಮಾನಿಗಳು ಕರ್ನಾಟಕ ರತ್ನ, ಪವರ್‌ ಸ್ಟಾರ್‌ ಪುನೀತ್‌ ರಾಜಕುಮಾರ್‌ರನ್ನು ಸ್ಮರಿಸಿ, ಪುನೀತಭಾವ ಪ್ರದರ್ಶಿಸಿದರು.

ಫಲಪುಷ್ಪ ಪ್ರದರ್ಶನದಲ್ಲಿ ಕಲಾವಿದ ಶಿವಲಿಂಗಪ್ಪ ಅವರ ಪುನೀತ್‌ ಚಿತ್ರ ನೋಡುಗರನ್ನು ಸೆಳೆಯಿತು. ಅದೇ ರೀತಿ, ಕಲಾವಿದೆ ಸರೋಜಾ ಬಡಿಗೇರ ಶ್ಯಾವಿಗೆಯಲ್ಲಿ ವಿಶಿಷ್ಟ ರೀತಿಯಲ್ಲಿ ರಚಿಸಿದ ಪುನೀತ್‌ ಮೂರ್ತಿ ಅಭಿಮಾನಿಗಳ ಕಣ್ಮನ ಸೆಳೆಯಿತು.

ಉತ್ಸವ ರಾಕ್‌ ಗಾರ್ಡನ್‌ನವರು ಶಿಲ್ಪದಲ್ಲಿ ರಚಿಸಿದ ಪುನೀತ್‌ ಕಲಾಕೃತಿಗಳ ಎದುರು ಫೋಟೋ ತೆಗೆಸಿಕೊಳ್ಳಲು, ಸೆಲ್ಫಿ ತೆಗೆದುಕೊಳ್ಳಲು ಜನ ಮುಗಿಬಿದ್ದರು. ಪುಸ್ತಕ ಮಳಿಗೆ, ವಾಣಿಜ್ಯ ಮಳಿಗೆ ಅಷ್ಟೇ ಅಲ್ಲ, ತೆರೆದ ಮಾರುಕಟ್ಟೆಯಲ್ಲೂ ಪುನೀತ್‌ ಭಾವಚಿತ್ರ ಪ್ರದರ್ಶನ, ಫೋಟೋ ಹಾಗೂ ಪುನೀತ್‌ ಭಾವಚಿತ್ರವಿರುವ ಕ್ಯಾಲೆಂಡರ್‌ಗಳ ಮಾರಾಟ ಜೋರಾಗಿತ್ತು. ಕವಿಗೋಷ್ಠಿಯಲ್ಲೂ ಪುನೀತ್‌ ಕುರಿತ ಕವಿತೆಗಳು ಅನುರಣಿಸಿದ್ದವು.