ಪುರುಷರ ಹಾಕಿ ವಿಶ್ವಕಪ್‌ಗೆ ವೈಭವದ ಆರಂಭ

Team Udayavani, Jan 11, 2023, 11:15 PM IST

ಕಟಕ್‌: ಇಲ್ಲಿನ ಬಾರಾಬತಿ ಕ್ರೀಡಾಂಗಣದಲ್ಲಿ ಬುಧವಾರ ಸಂಜೆ ನಡೆದ ವರ್ಣರಂಜಿತ ಉದ್ಘಾಟನ ಸಮಾರಂಭದಲ್ಲಿ ಪುರುಷರ ಹಾಕಿ ವಿಶ್ವಕಪ್‌ ಕೂಟಕ್ಕೆ ಅಧಿಕೃತ ಚಾಲನೆ ನೀಡಲಾಯಿತು. ದೇಶ ಮತ್ತು ವಿದೇಶದ ಸಾವಿರಾರು ಹಾಕಿ ಪ್ರೇಮಿಗಳು ಈ ವೈಭವವನ್ನು ಕಣ್ತುಂಬಿಕೊಂಡರು.

ಕೇಂದ್ರದ ಕ್ರೀಡಾ ಸಚಿವ ಅನುರಾಗ್‌ ಠಾಕೂರ್‌, ಒಡಿಶಾ ಮುಖ್ಯಮಂತ್ರಿ ನವೀನ್‌ ಪಟ್ನಾಯಕ್‌, ಅಂತಾರಾಷ್ಟ್ರೀಯ ಹಾಕಿ ಫೆಡರೇಶನ್‌ನ ಅಧ್ಯಕ್ಷ ತಯ್ಯಬ್‌ ಇಕ್ರಮ್‌ ಮತ್ತು ಹಾಕಿ ಇಂಡಿಯಾ ಅಧ್ಯಕ್ಷ ದಿಲೀಪ್‌ ಟಿರ್ಕಿ ಅವರು ಸಮಾರಂಭದಲ್ಲಿ ಉಪಸ್ಥಿತರಿದ್ದು ಕೂಟದಲ್ಲಿ ಭಾಗವಹಿಸುವ 16 ತಂಡಗಳ ಸದಸ್ಯರನ್ನು ಸ್ವಾಗತಿಸಿದರು.
ಸತತ ಎರಡನೇ ಬಾರಿ ಈ ಮಹಾನ್‌ ಕೂಟವನ್ನು ಆಯೋಜಿಸಿದ ಒಡಿಶಾ ರಾಜ್ಯವನ್ನು ಮುಕ್ತಕಂಠದಿಂದ ಹೊಗಳಿದ ಇಕ್ರಮ್‌ ಅವರು ರಾಜ್ಯವು ಹಾಕಿಯ ಭೂಮಿ ಎಂದು ಬಣ್ಣಿಸಿದರು. ರಾಜ್ಯವು 2018ರಲ್ಲಿಯೂ ಹಾಕಿ ವಿಶ್ವಕಪ್‌ ಕೂಟವನ್ನು ಆಯೋಜಿಸಿತ್ತು.

ಈ ಕೂಟವನ್ನು ಯಶಸ್ವಿಯಾಗಿ ಆಯೋಜಿಸಿ ದ್ದಕ್ಕಾಗಿ ಒಡಿಶಾ ಸರಕಾರಕ್ಕೆ ಕ್ರೀಡಾ ಸಚಿವ ಠಾಕೂರ್‌ ಧನ್ಯವಾದ ಅರ್ಪಿಸಿದರು ಮತ್ತು ಭಾರತ ಮತ್ತು ರಾಜ್ಯದ ಜನರ ಉತ್ಸಾಹವು ಆಟದ ಮೇಲಿನ ಅವರ ಪ್ರೀತಿಯನ್ನು ತೋರಿಸುತ್ತದೆ ಎಂದು ಹೇಳಿದರು. ಇಂತಹ ಕೂಟಗಳನ್ನು ಆಯೋಜಿಸಲು ರಾಜ್ಯಗಳಿಗೆ ಕೇಂದ್ರವು ಯಾವಾಗಲೂ ಬೆಂಬಲವನ್ನು ನೀಡುತ್ತದೆ ಎಂದವರು ಈ ಸಂದರ್ಭ ಹೇಳಿದರು.

ಆತಿಥ್ಯಕ್ಕೆ ಹೆಸರುವಾಸಿ
ಒಡಿಶಾ ತನ್ನ ಆತಿಥ್ಯಕ್ಕೆ ಬಹಳ ಹಿಂದಿನಿಂದಲೂ ಹೆಸರುವಾಸಿಯಾಗಿದೆ ಮತ್ತು ಪ್ರತಿಯೊಬ್ಬ ಸಂದರ್ಶಕರು ರಾಜ್ಯದಲ್ಲಿ ತಮ್ಮ ವಾಸ್ತವ್ಯದ ಉತ್ತಮ ನೆನಪುಗಳನ್ನು ಮರಳಿ ಪಡೆಯುತ್ತಾರೆ ಎಂದು ಪಟ್ನಾಯಕ್‌ ಹೇಳಿದರು. ಸತತ ಎರಡು ಬಾರಿ ಪುರುಷರ ಹಾಕಿ ವಿಶ್ವಕಪ್‌ ಆತಿಥ್ಯ ವಹಿಸಲು ಒಡಿಶಾಗೆ ಬೆಂಬಲ ನೀಡಿದ ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಸರಕಾರಕ್ಕೆ ಅವರು ಕೃತಜ್ಞತೆ ಸಲ್ಲಿಸಿದರು.

ಒಂದು ಗಂಟೆಯ ಅವಧಿಯ ಉದ್ಘಾಟನ ಸಮಾರಂಭದ ಪೂರ್ವಭಾವಿಯಾಗಿ ನಡೆದ ವರ್ಣರಂಜಿತ ಸಾಂಸ್ಕೃತಿಕ ಕಾರ್ಯಕ್ರಮಗಳು ತುಂಬಿದ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿತು. ಬುಡಕಟ್ಟು ನೃತ್ಯ ಕಲೆಯೊಂದಿಗೆ ಸಮಾರಂಭ ಪ್ರಾರಂಭವಾಯಿತು, ಇದಕ್ಕೆ ನೃತ್ಯ ಗುರು ಅರುಣಾ ಮೊಹಂತಿ ಅವರಿಂದ ಕೊರಿಯೋಗ್ರಫಿ ಮಾಡಿದ್ದರು. ಒಡಿಯಾ ಗಾಯಕಿಯರಾದ ಸ್ನಿತಿ ಮಿಶ್ರಾ, ರಿತುರಾಜ್‌ ಮೊಹಂತಿ, ಲೀಸಾ ಮಿಶ್ರಾ ಮತ್ತು ನಟ-ದಂಪತಿಗಳಾದ ಸಬ್ಯಸಾಚಿ ಮಿಶ್ರಾ ಮತ್ತು ಅರ್ಚಿತಾ ಸಾಹು ಸೇರಿದಂತೆ ಇತರ ಕಲಾವಿದರು ಪ್ರೇಕ್ಷಕರನ್ನು ಆಕರ್ಷಿಸಿದರು.

16 ಕಡೆ ಫ್ಯಾನ್‌ ಪಾರ್ಕ್‌
ನಗರದಾದ್ಯಂತ ಪ್ರಮುಖ ಸ್ಥಳಗಳಲ್ಲಿ 16 ಫ್ಯಾನ್‌ ಪಾರ್ಕ್‌ಗಳನ್ನು ಸ್ಥಾಪಿಸಲಾಗಿದ್ದು, ಅಲ್ಲಿ ಸಾವಿರಾರು ಹಾಕಿ ಪ್ರೇಮಿಗಳು ಮತ್ತು ಉತ್ಸಾಹಿಗಳು ದೈತ್ಯ ಪರದೆಯ ಮೇಲೆ ಉದ್ಘಾಟನ ಸಮಾರಂಭವನ್ನು ವೀಕ್ಷಿಸಿದರು. ಬಾಲಿವುಡ್‌ನ‌ ನೂರಾರು ಗಾಯಕರು ಮತ್ತು ಸ್ಥಳೀಯ ಕಲಾವಿದರು ಹಾಕಿ ವಿಶ್ವಕಪ್‌ ಥೀಮ್‌ ಹಾಡನ್ನು ಹಾಡಿದರು, ಇದನ್ನು ಸಂಗೀತ ನಿರ್ದೇಶಕ ಪ್ರೀತಮ್‌ ಸಂಯೋಜಿಸಿದ್ದರು. ಅವರು ಇತರ ಕೆಲವು ಗಾಯಕರೊಂದಿಗೆ ವೇದಿಕೆಯಲ್ಲಿ ಪ್ರದರ್ಶನ ನೀಡಿದರು.