ಆಸ್ಟ್ರೇಲಿಯನ್‌ ಓಪನ್‌: ಸಾನಿಯಾ ಮಿರ್ಜಾ ಗೆಲುವಿನ ಆರಂಭ

Team Udayavani, Jan 19, 2023, 10:35 PM IST

ಮೆಲ್ಬೋರ್ನ್:ಸಾನಿಯಾ ಮಿರ್ಜಾ ತಮ್ಮ ಕೊನೆಯ ಆಸ್ಟ್ರೇಲಿಯನ್‌ ಓಪನ್‌ ಸ್ಪರ್ಧೆಯನ್ನು ಗೆಲುವಿನೊಂದಿಗೆ ಆರಂಭಿಸಿದ್ದಾರೆ. ಕಝಕಸ್ತಾನದ ಅನ್ನಾ ಡ್ಯಾನಿಲಿನಾ ಅವರೊಂದಿಗೆ ವನಿತಾ ಡಬಲ್ಸ್‌ನಲ್ಲಿ ಕಣಕ್ಕಿಳಿದಿರುವ ಅವರು ಮೊದಲ ಸುತ್ತನ್ನು ಯಶಸ್ವಿಯಾಗಿ ದಾಟಿದ್ದಾರೆ. ಇಂಡೋ-ಕಝಕ್‌ ಜೋಡಿ ಸೇರಿಕೊಂಡು ಅಮೆರಿಕದ ಬರ್ನಾರ್ಡ್‌ ಪೆರಾ-ಹಂಗೇರಿಯ ದಲ್ಮಾ ಗಾಲ್ಫಿ ಅವರನ್ನು 6-2, 7-5 ಅಂತರದಿಂದ ಹಿಮ್ಮೆಟ್ಟಿಸಿತು.

ಸಾನಿಯಾ-ಡ್ಯಾನಿಲಿನಾ ದ್ವಿತೀಯ ಸುತ್ತಿನಲ್ಲಿ ಅನೆಲಿನಾ ಕಲಿನಿನಾ (ಉಕ್ರೇನ್‌)-ಅಲಿಸನ್‌ ವಾನ್‌ ಯುಟ್ವಾಂಕ್‌ (ಬೆಲ್ಜಿಯಂ) ಸವಾಲನ್ನು ಎದುರಿಸಲಿದ್ದಾರೆ. 36 ವರ್ಷದ ಸಾನಿಯಾ ಮಿರ್ಜಾ ಮಿಕ್ಸೆಡ್‌ ಡಬಲ್ಸ್‌ನಲ್ಲೂ ಆಡಲಿದ್ದು, ಇಲ್ಲಿ ಭಾರತದವರೇ ಆದ ರೋಹನ್‌ ಬೋಪಣ್ಣ ಜೋಡಿ ಆಗಿದ್ದಾರೆ.

ಪುರುಷರಿಗೆ ಸೋಲು:
ಪುರುಷರ ಡಬಲ್ಸ್‌ನಲ್ಲಿ ಭಾರತ ಸೋಲನುಭವಿಸಿದೆ. ಮೊದಲ ಸಲ ಗ್ರ್ಯಾನ್‌ಸ್ಲಾéಮ್‌ನಲ್ಲಿ ಜತೆಗೂಡಿ ಆಡಲಿಳಿದ ಯುಕಿ ಭಾಂಬ್ರಿ-ಸಾಕೇತ್‌ ಮೈನೆನಿ 14ನೇ ಶ್ರೇಯಾಂಕದ ಜಾನ್‌ ಪೀಯರ್ (ಆಸ್ಟ್ರೇಲಿಯ)-ಆ್ಯಂಡ್ರಿಯ ಮೀಸ್‌ (ಜರ್ಮನಿ) ವಿರುದ್ಧ 6-7 (5), 7-6 (4), 3-6 ಅಂತರದಿಂದ ಎಡವಿದರು. ಮೆಕ್ಸಿಕೊದ ಮಿಗ್ಯುಯೆಲ್‌ ಏಂಜೆಲ್‌ ರಿಯೆಸ್‌ ವರೇಲ ಅವರೊಂದಿಗೆ ಆಡಲಿಳಿದ ರಾಮ್‌ಕುಮಾರ್‌ ರಾಮನಾಥನ್‌ ಕೂಡ ಮೊದಲ ಸುತ್ತಿನಲ್ಲೇ ಮುಗ್ಗರಿಸಿದರು. ಸಿಸಿಪಸ್‌ ಸೋದರರಾದ ಸ್ಟೆಫ‌ನಸ್‌-ಪೆಟ್ರೋಸ್‌ ಈ ಪಂದ್ಯವನ್ನು 3-6, 7-5, 6-3ರಿಂದ ಗೆದ್ದರು.