ತಿರುಮಲ: ಹಲವು ಮಾರ್ಪಾಡುಗಳಿಗೆ ಮುಂದಾದ ಟಿಟಿಡಿ

Team Udayavani, Feb 24, 2023, 6:42 AM IST

ತಿರುಪತಿ: ತಿರುಮಲ ಶ್ರೀ ವೆಂಕಟೇಶ್ವರ ಸ್ವಾಮಿ ದೇಗುಲದ ಆವರಣವನ್ನು ಗರಿಷ್ಠ ಪ್ರಮಾಣದಲ್ಲಿ ಸದ್ಬಳಕೆ ಮಾಡುವ ನಿಟ್ಟಿನಲ್ಲಿ ಕೆಲವು ಪ್ರಮುಖ ಮಾರ್ಪಾಡುಗಳನ್ನು ಮಾಡಲು ತಿರುಮಲ ತಿರುಪತಿ ದೇವಸ್ಥಾನ (ಟಿಟಿಡಿ) ಟ್ರಸ್ಟ್‌ ಮುಂದಾಗಿದೆ.

ಕೊರೊನಾ ಅನಂತರ ತಿರುಮಲಕ್ಕೆ ಭೇಟಿ ನೀಡುವ ಭಕ್ತರ ಸಂಖ್ಯೆ ಗಣನೀ­ಯವಾಗಿ ಹೆಚ್ಚಳವಾ­ಗಿದೆ. ಹೀಗಾಗಿ ಇರುವ ಸ್ಥಳವನ್ನೇ ಪೂರ್ಣ ಪ್ರಮಾಣದಲ್ಲಿ ಬಳಸುವಂ­ತಾಗಲು ಕೆಲವು ಬದಲಾವಣೆಗಳನ್ನು ಟಿಟಿಡಿ ಮಾಡುತ್ತಿದೆ.

ಲಡ್ಡು ಪ್ರಸಾದ ಮಾಡುವ ಅಡುಗೆ ಮನೆಯನ್ನು ದೇಗುಲದ ಆವರಣದ ಹೊರಗೆ ಸ್ಥಳಾಂತರಿಸಲು ಟಿಟಿಡಿ ಮುಂದಾಗಿದೆ. ಕೇವಲ ದೇವರಿಗೆ ಅರ್ಪಿಸುವ ನೈವೇದ್ಯ ಮಾತ್ರ ದೇಗುಲದೊಳಗೆ ತಯಾರಿಸಲಾಗುವುದು. ಈ ಸ್ಥಳದಲ್ಲಿ ಭಕ್ತರು ಕುಳಿತು ಕೆಲವು ಹೊತ್ತು ಧ್ಯಾನ ಮಾಡುವಂತಾಗಲು ಸ್ಥಳಾವಕಾಶ ಕಲ್ಪಿಸಲಾಗುತ್ತದೆ. ಇನ್ನೊಂದೆಡೆ ಸದ್ಯ ಧ್ವಜಸ್ತಂಭದ ಸಮೀಪ ಭಕ್ತರಿಗೆ ಪೊಂಗಲ್‌, ಪುಳಿಯೊಗರೆ ಸೇರಿದಂತೆ ಅನ್ನ ಪ್ರಸಾದ ವಿತರಿಸಲಾಗುತ್ತಿದೆ. ಈ ಸ್ಥಳ ಚಿಕ್ಕದಾಗಿರುವುದರಿಂದ ಇದನ್ನು ದೇಗುಲದ ಈಶಾನ್ಯಕ್ಕೆ ಸ್ಥಳಾಂತರಿಸ­ಲಾಗುವುದು. ಈ ಹಿಂದೆ ಲಡ್ಡು ಸಂಗ್ರಹಿಸಿ ಇಡುತ್ತಿದ್ದ ದೊಡ್ಡ ಹಾಲ್‌ನಲ್ಲಿ ಅನ್ನ ಪ್ರಸಾದ ವಿತರಿಸಲಾಗುತ್ತದೆ. ಇದರಿಂದ ಜನಸಂದಣಿ ಚದುರಲಿದೆ ಎಂದು ಟಿಟಿಡಿ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಲಾಡು ಸಂಗ್ರಹ ಹಾಲ್‌ ಕೆಲವು ದಶಕದ ಹಿಂದೆ ನಿರ್ಮಿಸಿದ್ದು, ಇದು ದೇಗುಲದ ವಾಸ್ತುಗೆ ವಿರುದ್ಧವಾಗಿದೆ. ಇದನ್ನು ಸಂಪೂರ್ಣವಾಗಿ ಕೆಡವಿ, ದೇಗುಲದ ವಾಸ್ತುಗೆ ತಕ್ಕಂತೆ ನಿರ್ಮಿಸಲಾಗುವುದು. ಆದರೆ ಈ ಎಲ್ಲ ತೀರ್ಮಾನಗಳು ಅಂತಿಮಗೊಳಿಸುವ ಮೊದಲು ದೇಗುಲದ ಪುರೋಹಿತರು ಮತ್ತು ಪ್ರಮುಖ ಧಾರ್ಮಿಕ ವ್ಯಕ್ತಿಗಳೊಂದಿಗೆ ಚರ್ಚಿಸಿ ನಿರ್ಧಾರಿಸಲಾಗುವುದು ಎಂದು ಟಿಟಿಡಿ ತಿಳಿಸಿದೆ.