ನೀಟ್‌ ಪಿಜಿ ಪರೀಕ್ಷೆಗೆ ಪರ್ಯಾಯ ದಿನಾಂಕವಿಲ್ಲ

Team Udayavani, Feb 25, 2023, 7:35 AM IST

ನವದೆಹಲಿ: 2023ರ ನೀಟ್‌ ಪಿಜಿ ಪರೀಕ್ಷೆಗೆ ಸುಮಾರು 2.09 ಲಕ್ಷ ಅಭ್ಯರ್ಥಿಗಳು ನೋಂದಣಿ ಮಾಡಿಕೊಂಡಿದ್ದಾರೆ. ಫೆ.5ರಂದು ಪರೀಕ್ಷೆ ನಿಗದಿಯಾಗಿದೆ. ಪರೀಕ್ಷೆಯನ್ನು ಮುಂದೂಡಿದರೆ ಮುಂದಿನ ದಿನಗಳಲ್ಲಿ ಪರೀಕ್ಷೆಯನ್ನು ನಡೆಸಲು ಯಾವುದೇ ಪರ್ಯಾಯ ಸೂಕ್ತ ದಿನಾಂಕ ಲಭ್ಯವಿಲ್ಲ ಎಂದು ಸುಪ್ರೀಂ ಕೋರ್ಟ್‌ಗೆ ಶುಕ್ರವಾರ ರಾಷ್ಟ್ರೀಯ ಪರೀಕ್ಷಾ ಮಂಡಳಿ(ಎನ್‌ಬಿಇ) ತಿಳಿಸಿದೆ.

ಇಂಟರ್ನ್ಶಿಪ್‌ಗೆ ಕಟ್‌ ಆಫ್ ದಿನಾಂಕವನ್ನು ಆ.11ರವರೆಗೆ ವಿಸ್ತರಿಸಿರುವುದರಿಂದ ನೀಟ್‌ ಪಿಜಿ ಪರೀಕ್ಷೆಯನ್ನು ಮುಂದೂಡಬೇಕು ಎಂದು ಕೋರಿ ಸಲ್ಲಿಸಿರುವ ಎರಡು ಅರ್ಜಿಗಳ ವಿಚಾರಣೆ ನಡೆಸಿದ ನ್ಯಾ. ಎಸ್‌.ಆರ್‌.ಭಟ್‌ ಮತ್ತು ನ್ಯಾ. ದೀಪಂಕರ್‌ ದತ್ತ ಅವರನ್ನೊಳಗೊಂಡ ನ್ಯಾಯಪೀಠ, ಪರೀಕ್ಷೆ ಮುಂದೂ ಡದೇ ಇದ್ದರೆ ಎಷ್ಟು ಮಂದಿಗೆ ತೊಂದರೆಯಾಗಲಿದೆ ಎಂಬುದು ತಿಳಿಯಬೇಕಿದೆ ಎಂದು ಹೇಳಿತು.

ಎನ್‌ಬಿಇ ಪರವಾಗಿ ವಾದ ಮಂಡಿಸಿದ ಹೆಚ್ಚುವರಿ ಸಾಲಿಸಿಟರ್‌ ಜನರಲ್‌ ಐಶ್ವರ್ಯ ಭಾಟಿ, ಪರೀಕ್ಷೆ ನಡೆಸಲು ತಾಂತ್ರಿಕ ಸಹಭಾಗಿತ್ವ ಪಡೆಯಲಾಗಿದೆ. ಹಾಗೂ ಇದಕ್ಕಾಗಿ ಎಲ್ಲಾ ರೀತಿಯ ತಯಾರಿ ನಡೆಸಲಾಗಿದೆ. ಪರೀಕ್ಷೆ ಮುಂದೂಡಿದರೆ ಹತ್ತಿರದಲ್ಲಿ ಯಾವುದೇ ದಿನಾಂಕಗಳು ಲಭ್ಯವಿಲ್ಲ. ಏಕೆಂದರೆ ಈ ಅವಧಿಯಲ್ಲಿ ತಾಂತ್ರಿಕ ಪಾಲುದಾರರು ಲಭ್ಯವಿಲ್ಲ ಎಂದು ಹೇಳಿದರು.