ಟೆಸ್ಟ್‌ ಪಂದ್ಯ: ಹ್ಯಾರಿ ಬ್ರೂಕ್‌, ಜೋ ರೂಟ್‌ ಬೊಂಬಾಟ್‌ ಶತಕ

Team Udayavani, Feb 25, 2023, 6:26 AM IST

ವೆಲ್ಲಿಂಗ್ಟನ್‌: ಏಳನೇ ಓವರ್‌ ಮುಕ್ತಾಯಕ್ಕೆ ಇಂಗ್ಲೆಂಡ್‌ ಸ್ಕೋರ್‌ 3ಕ್ಕೆ 21 ರನ್‌… ದಿನದಾಟ ಮುಗಿ ಯುವಾಗ 3ಕ್ಕೆ 315 ರನ್‌! ಇದು ಆತಿಥೇಯ ನ್ಯೂಜಿಲ್ಯಾಂಡ್‌ ಎದುರು ಇಲ್ಲಿ ಮೊದಲ್ಗೊಂಡ ದ್ವಿತೀಯ ಟೆಸ್ಟ್‌ ಪಂದ್ಯದ ಮೊದಲ ದಿನದ ಆಟದಲ್ಲಿ ಇಂಗ್ಲೆಂಡ್‌ ಬ್ಯಾಟಿಂಗ್‌ ಚೇತರಿಸಿಕೊಂಡ ಪರಿ!

ಇಂಗ್ಲೆಂಡ್‌ ಸರದಿಯನ್ನು ಆಧರಿಸಿ ನಿಂತವರು ಜೋ ರೂಟ್‌ ಮತ್ತು ಹ್ಯಾರಿ ಬ್ರೂಕ್‌. ಇಬ್ಬರೂ ಪ್ರಚಂಡ ಶತಕ ಬಾರಿಸಿ ಕಿವೀಸ್‌ ಬೌಲರ್‌ಗಳಿಗೆ ಬೆವರಿಳಿಸಿದರು. ಮುರಿಯದ 4ನೇ ವಿಕೆಟಿಗೆ 294 ರನ್‌ ಪೇರಿಸಿದರು. ಬಿರುಸಿನ ಆಟವಾಡಿದ ಬ್ರೂಕ್ಸ್‌ 184 ರನ್‌ ಬಾರಿಸಿ ಬ್ಯಾಟಿಂಗ್‌ ಕಾಯ್ದು ಕೊಂಡಿದ್ದಾರೆ. ರೂಟ್‌ 101 ರನ್‌ ಗಳಿಸಿ ಆಡುತ್ತಿದ್ದಾರೆ.

ಬ್ರೂಕ್ಸ್‌ 6ನೇ ಟೆಸ್ಟ್‌ನಲ್ಲಿ ಬಾರಿಸಿದ 4ನೇ ಶತಕ ಇದಾಗಿದೆ. ಇದು ಅವರ ಜೀನವಶ್ರೇಷ್ಠ ಗಳಿಕೆಯೂ ಹೌದು. ಸ್ಫೋಟಕ ಆಟಕ್ಕೆ ಮುಂದಾದ ಬ್ರೂಕ್ಸ್‌ 184 ರನ್ನಿಗೆ ತೆಗೆದುಕೊಂಡದ್ದು 169 ಎಸೆತ ಮಾತ್ರ. ಸಿಡಿಸಿದ್ದು 24 ಬೌಂಡರಿ ಹಾಗೂ 5 ಸಿಕ್ಸರ್‌.

ಟೆಸ್ಟ್‌ ಕ್ರಿಕೆಟಿನ ನೂತನ ಪ್ರತಿಭೆ ಯಾಗಿರುವ ಬ್ರೂಕ್‌ 9 ಇನ್ನಿಂಗ್ಸ್‌ಗಳಲ್ಲಿ 804 ರನ್‌ ಪೇರಿಸಿದ್ದಾರೆ. ಇದರೊಂದಿಗೆ ಈ ಅವಧಿಯಲ್ಲಿ ಅತ್ಯಧಿಕ 798 ರನ್‌ ಹೊಡೆದಿರುವ ವಿನೋದ್‌ ಕಾಂಬ್ಳಿ ದಾಖಲೆಯನ್ನು ಮುರಿದರು.

ಜೋ ರೂಟ್‌ 129ನೇ ಟೆಸ್ಟ್‌ ಪಂದ್ಯದಲ್ಲಿ 29ನೇ ಶತಕ ದಾಖಲಿಸಿ ದರು. 101 ರನ್ನಿಗೆ 182 ಎಸೆತ ತೆಗೆದುಕೊಂಡಿದ್ದು, 7 ಬೌಂಡರಿ ಹೊಡೆ ದಿದ್ದಾರೆ. ರೂಟ್‌ ಎಚ್ಚರಿಕೆಯ ಆಟಕ್ಕೆ ಒತ್ತು ಕೊಟ್ಟರು.

ಜಾಕ್‌ ಕ್ರಾಲಿ (2), ಬೆನ್‌ ಡಕೆಟ್‌ (9) ಮತ್ತು ಓಲೀ ಪೋಪ್‌ (10) ಬೇಗನೇ ಪೆವಿಲಿಯನ್‌ ಸೇರಿಕೊಂಡರು. 2 ವಿಕೆಟ್‌ ಮ್ಯಾಟ್‌ ಹೆನ್ರಿ ಪಡೆದರೆ, ಇನ್ನೊಂದು ನಾಯಕ ಟಿಮ್‌ ಸೌಥಿ ಪಾಲಾಯಿತು.

ಇದು ಸರಣಿಯ ಅಂತಿಮ ಟೆಸ್ಟ್‌. ಮೌಂಟ್‌ ಮೌಂಗನಿಯಲ್ಲಿ ನಡೆದ ಮೊದಲ ಟೆಸ್ಟ್‌ ಪಂದ್ಯದಲ್ಲಿ ಇಂಗ್ಲೆಂಡ್‌ 267 ರನ್ನುಗಳ ಜಯಭೇರಿ ಮೊಳಗಿಸಿತ್ತು. ನ್ಯೂಜಿಲ್ಯಾಂಡ್‌ ಈಗ ಸರಣಿ ಸಮಬಲದ ಒತ್ತಡದಲ್ಲಿದೆ.

ತಂದೆಯ ಗರಿಷ್ಠ ಗಳಿಕೆಯತ್ತ ಗುರಿ
ಮೊದಲ ಟೆಸ್ಟ್‌ ದ್ವಿಶತಕದ ಹಾದಿಯಲ್ಲಿರುವ ಹ್ಯಾರಿ ಬ್ರೂಕ್‌, ತನ್ನ ತಂದೆಯ ಸರ್ವಾಧಿಕ ಮೊತ್ತದತ್ತ ಗಮನ ನೆಟ್ಟಿರುವುದಾಗಿ ಹೇಳಿದ್ದಾರೆ.

“ನನ್ನ ತಂದೆ ಡೇವಿಡ್‌ ಬ್ರೂಕ್‌, ಬರ್ಲಿ ಕ್ಲಬ್‌ ಪರ ಆಡುತ್ತಿರುವಾಗ ಗರಿಷ್ಠ 210 ರನ್‌ ಹೊಡೆದಿದ್ದರು. ಈ ಮೊತ್ತವನ್ನು ತಲುಪಬೇಕೆಂಬುದು ನನ್ನ ಗುರಿ. ಆದರೆ ದ್ವಿತೀಯ ದಿನದ ಮೊದಲ ಎಸೆತವನ್ನು ನಾನೇ ಎದುರಿ ಸಬೇಕಿದೆ ಎಂಬುದಷ್ಟೇ ಯೋಚಿಸ ಬೇಕಾದ ಸಂಗತಿ’ ಎಂದು ದ್ವಿಶತಕಕ್ಕೆ ಕೇವಲ 16 ರನ್‌ ದೂರಸಲ್ಲಿರುವ ಹ್ಯಾರಿ ಬ್ರೂಕ್‌ ಹೇಳಿದರು.

“ಕಳೆದ ಪಾಕಿಸ್ಥಾನ ಪ್ರವಾಸದಲ್ಲೂ ನಾನು ಶತಕ ಬಾರಿಸಿದ್ದೆ. ಆದರೆ ಇಂದು ಬಾರಿಸಿದ ಶತಕ ನನ್ನ ಪಾಲಿಗೆ ಹೆಚ್ಚು ಮಹತ್ವದ್ದಾಗಿದೆ. ಅಲ್ಲಿ ಫ್ಲ್ಯಾಟ್‌ ಪಿಚ್‌ ಮೇಲೆ ಆಡಿದ್ದೆ. ಇಲ್ಲಿ 21ಕ್ಕೆ 3 ವಿಕೆಟ್‌ ಉರುಳಿದ ಬಳಿಕ ಬ್ಯಾಟಿಂಗ್‌ಗೆ ತುಸು ಕಠಿನವಾದ ಪಿಚ್‌ ಮೇಲೆ ಆಡಿ ಶತಕ ಬಾರಿಸಿದ್ದೇನೆ’ ಎಂದರು.