ಉಡುಪಿ: 25 ಅಂತಸ್ತಿನ ಕಟ್ಟಡವನ್ನು ಸರಸರನೆ ಏರಿದ ಕೋತಿರಾಜ್‌

Team Udayavani, Mar 2, 2023, 7:18 PM IST

ಉಡುಪಿ: ಆರೋಗ್ಯ ನಿಧಿಗೆ ಧನ ಸಂಗ್ರಹ ಮಾಡುವ ಉದ್ದೇಶದಿಂದ ಅಡ್ವೆಂಚರ್‌ ಮಂಕಿ ಕ್ಲಬ್‌ನ ಚಿತ್ರದುರ್ಗದ ಜ್ಯೋತಿರಾಜ್‌ ಯಾನೆ ಕೋತಿರಾಜ್‌ ಅವರು ಗುರುವಾರ ಬ್ರಹ್ಮಗಿರಿಯಲ್ಲಿರುವ 250 ಅಡಿ ಎತ್ತರದ 25 ಅಂತಸ್ತಿನ ಕಟ್ಟಡಕ್ಕೆ ಸರಸರನೆ ಏರುವ ಮೂಲಕ ಉಡುಪಿಯ ನಾಗರಿಕರನ್ನು ರಂಜಿಸಿದರು.

ಬೆಳಗ್ಗೆ 10.20ಕ್ಕೆ ಹತ್ತಲು ಆರಂಭಿಸಿದ ಅವರು 10.40ರ ವೇಳೆಗಾಗಲೇ ಕೊನೆಯ ಮಹಡಿಯನ್ನು ತಲುಪಿ ಕನ್ನಡ ಬಾವುಟ ಹಾರಿಸಿ ಸಂಭ್ರಮಿಸಿದರು. ಕಟ್ಟಡದಿಂದ ಕೆಳಗಿಳಿದು ಬಂದ ಬಳಿಕ ಅವರನ್ನು ಪೊಲೀಸ್‌ ಇಲಾಖೆ, ಅಗ್ನಿಶಾಮಕ ಹಾಗೂ ಮೆಸ್ಕಾಂ ಅಧಿಕಾರಿಗಳು ಅಭಿನಂದಿಸಿದರು. ನೆರೆದಿದ್ದ ನಾಗರಿಕರು ಕರತಾಡನದ ಮೂಲಕ ಬೆಂಬಲ ವ್ಯಕ್ತಪಡಿಸಿದರು.

ಕ್ಲೈಮ್ಮಿಂಗ್‌ ಫೌಂಡೇಶನ್‌ ಸ್ಥಾಪಿಸುವ ಉದ್ದೇಶ ಹೊಂದಿರುವ ಕೋತಿರಾಜ್‌ ಅದಕ್ಕಾಗಿ ನಾಡಿನೆಲ್ಲೆಡೆ ತಿರುಗಿ ಸಾಹಸ ಮಾಡುವ ಉದ್ದೇಶ ಹೊಂದಿದ್ದಾರೆ. ವಿದೇಶದಲ್ಲಿಯೂ ಇದೇ ರೀತಿ ಸಾಹಸ ಮಾಡಿ ರಾಷ್ಟ್ರಧ್ವಜ ಹಾರಿಸುವ ಉದ್ದೇಶ ಹೊಂದಿದ್ದಾರೆ. ಅಮೆರಿಕದ ಏಂಜಲ್‌ ಫಾಲ್ಸ್‌ ಹತ್ತುವ ನಿರೀಕ್ಷೆ ಹೊಂದಿದ್ದಾರೆ. ಹಾಲಿವುಡ್‌ನ‌ಲ್ಲಿ ನಾನು ನಾಯಕನಾಗಿ ನಟಿಸಿದ “ಇನ್‌ಕ್ರೆಡಿಬಲ್‌ ಮಂಕಿ’ ಸಿನೆಮಾದ ಚಿತ್ರೀಕರಣ ಶೇ.80 ಪೂರ್ಣಗೊಂಡಿದ್ದು, ಸದ್ಯದಲ್ಲಿಯೇ ಬಿಡುಗಡೆಯಾಗಲಿದೆ ಎನ್ನುತ್ತಾರೆ ಕೋತಿರಾಜ್‌.

ಇದನ್ನೂ ಓದಿ: ಮಣಿಪಾಲ: 4 ಲಕ್ಷ ರೂ.ಮೌಲ್ಯದ ಸ್ವತ್ತುಗಳ ಸಹಿತ ಇಬ್ಬರು ಕಳ್ಳರ ಬಂಧನ