ಶ್ರೀಲಂಕಾ ಟೆಸ್ಟ್‌  ಸರಣಿಗೆ ನ್ಯೂಜಿಲ್ಯಾಂಡ್‌ ತಂಡ ಪ್ರಕಟ

Team Udayavani, Mar 3, 2023, 7:40 AM IST

ವೆಲ್ಟಿಂಗ್ಟನ್‌ : ಪ್ರವಾಸಿ ಶ್ರೀಲಂಕಾ ವಿರುದ್ಧ ಮಾ. 9ರಿಂದ ಆರಂಭವಾಗುವ ಎರಡು ಪಂದ್ಯಗಳ ಟೆಸ್ಟ್‌ ಸರಣಿಗೆ ನ್ಯೂಜಿಲ್ಯಾಂಡ್‌ ತಂಡವು 13 ಸದಸ್ಯರ ತಂಡವನ್ನು ಹೆಸರಿಸಿದೆ. ಇತ್ತೀಚೆಗೆ ಇಂಗ್ಲೆಂಡ್‌ ವಿರುದ್ಧ ಆಡಲಾದ ತಂಡವನ್ನೇ ಈ ಸರಣಿಗೆ ಉಳಿಸಿಕೊಳ್ಳಲಾಗಿದೆ. ಆ ಸರಣಿಯಲ್ಲಿದ್ದ ಜೇಕಬ್‌ ಡುಫಿ, ಐಶ್‌ ಸೋಧಿ ಮತ್ತು ಕೈಲ್‌ ಜಮೀಸನ್‌ ಅವರನ್ನು ಕೈಬಿಡಲಾಗಿದೆ.

ಟಿಮ್‌ ಸೌಥಿ ತಂಡವನ್ನು ಮುನ್ನಡೆಸಲಿದ್ದಾರೆ. ಇಂಗ್ಲೆಂಡ್‌ ವಿರುದ್ಧ ನಡೆದ ಪಂದ್ಯದಲ್ಲಿ ಫಾಲೋಆನ್‌ ಪಡೆದೂ 1 ರನ್ನಿನಿಂದ ಅಮೋಘ ಗೆಲುವು ದಾಖಲಿ ಸಿದ ಹುಮ್ಮಸ್ಸಿನಲ್ಲಿರುವ ನ್ಯೂಜಿಲ್ಯಾಂಡ್‌ ತಂಡವು ಶ್ರೀಲಂಕಾ ವಿರುದ್ಧವೂ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸದಲ್ಲಿದೆ.

ವಿಶ್ವ ಟೆಸ್ಟ್‌ ಚಾಂಪಿಯನ್‌ಶಿಪ್‌ನ ಅಂಗವಾಗಿ ಈ ಸರಣಿ ನಡೆಯಲಿದೆ. ಮೊದಲ ಟೆಸ್ಟ್‌ ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆಯಲಿದ್ದರೆ ಮಾ. 17ರಿಂದ ನಡೆಯುವ ಎರಡನೇ ಟೆಸ್ಟ್‌ ವೆಲ್ಲಿಂಗ್ಟನ್‌ನಲ್ಲಿ ನಡೆಯಲಿದೆ.

ನ್ಯೂಜಿಲ್ಯಾಂಡ್‌ ತಂಡ
ಟಿಮ್‌ ಸೌಥಿ (ನಾಯಕ), ಟಾಮ್‌ ಬ್ಲಿಂಡೆಲ್‌, ಮೈಕಲ್‌ ಬ್ರೇಸ್‌ವೆಲ್‌, ಡೆವೋನ್‌ ಕಾನ್ವೆ, ಮ್ಯಾಟ್‌ ಹೆನ್ರಿ, ಟಾಮ್‌ ಲಾಥಮ್‌, ಡ್ಯಾರಿಲ್‌ ಮಿಚೆಲ್‌, ಬ್ಲೇರ್‌ ಟಿಕ್ನರ್‌, ನೀಲ್‌ ವಾಗ್ನರ್‌, ಸ್ಕಾಟ್‌ ಕುಗ್ಗಲೆಜಿನ್‌, ಹೆನ್ರಿ ನಿಕೋಲ್ಸ್‌, ಕೇನ್‌ ವಿಲಿಯಮ್ಸನ್‌, ವಿಲ್‌ ಯಂಗ್‌.

ಯುಎಇ ವಿರುದ್ಧ ಟಿ20 ಸರಣಿ
ಮುಂದಿನ ಆಗಸ್ಟ್‌ನಲ್ಲಿ ಯುಎಇ ವಿರುದ್ಧ 3 ಪಂದ್ಯ ಗಳ ಟಿ20 ಸರಣಿಯಲ್ಲಿ ತಂಡವು ಆಡಲಿದೆ ಎಂದು ನ್ಯೂಜಿಲ್ಯಾಂಡ್‌ ಕ್ರಿಕೆಟ್‌ ತಿಳಿಸಿದೆ. ಏಕದಿನ ಸರಣಿಗಾಗಿ ಇಂಗ್ಲೆಂಡಿಗೆ ತೆರಳುವ ಮೊದಲು ನ್ಯೂಜಿಲ್ಯಾಂಡ್‌ ತಂಡವು ಯುಎಇಯಲ್ಲಿ ಆ. 17, 19 ಮತ್ತು 20ರಂದು ನಡೆಯುವ ಟಿ20 ಪಂದ್ಯಗಳಲ್ಲಿ ಆಡಲಿದೆ.