2023ರ ಮೊದಲ ಸೂರ್ಯಗ್ರಹಣ ಯಾವಾಗ? ಈ ವರ್ಷ ನಭೋಮಂಡಲದಲ್ಲಿ ನಾಲ್ಕು ಗ್ರಹಣ

Team Udayavani, Mar 10, 2023, 12:25 PM IST

ನವದೆಹಲಿ: ಸೂರ್ಯ ಮತ್ತು ಚಂದ್ರಗ್ರಹಣ ಸೌರಮಂಡಲದ ಕೌತುಕವಾಗಿದ್ದು, 2022ರ ಅಕ್ಟೋಬರ್ 5ರಂದು ವರ್ಷದ ಕೊನೆಯ ಸೂರ್ಯಗ್ರಹಣಕ್ಕೆ ಸಾಕ್ಷಿಯಾಗಿತ್ತು. ಹೊಸ ವರ್ಷವಾದ 2023ರಲ್ಲಿ ಸೂರ್ಯಗ್ರಹಣ ಮತ್ತು ಚಂದ್ರಗ್ರಹಣ ಯಾವಾಗ ಸಂಭವಿಸಲಿದೆ ಎಂಬ ಸಂಕ್ಷಿಪ್ತ ಮಾಹಿತಿ ಇಲ್ಲಿದೆ…

ಇದನ್ನೂ ಓದಿ:ರಾಜ್ಯದಲ್ಲಿ 12 ಸಾವಿರ ಸ್ವಾಮಿ ವಿವೇಕಾನಂದ ಯುವ ಸ್ವಸಹಾಯ ಗುಂಪುಗಳ ರಚನೆಗೆ ಆದೇಶ

ಗ್ರಹಣಗಳು ಒಂದು ಆಕರ್ಷಕ ನೈಸರ್ಗಿಕ ವಿದ್ಯಮಾನವಾಗಿದ್ದರೂ ಕೂಡಾ ಹಲವು ಸಾಂಪ್ರದಾಯಿಕ ಸಂಸ್ಕೃತಿಗಳಲ್ಲಿ ಇಂದಿಗೂ ಅವು ಮೂಢನಂಬಿಕೆ ಮತ್ತು ಅಪಶಕುನದ ಸಂಬಂಧ ಹೊಂದಿದೆ.

ಮೊದಲ ಸೂರ್ಯಗ್ರಹಣ:

2023ರ ಮೊದಲ ಸೂರ್ಯಗ್ರಹಣವು ಏಪ್ರಿಲ್ 20ರಂದು ಗೋಚರಿಸಲಿದೆ. ಬೆಳಗ್ಗೆ 7.04 ನಿಮಿಷಕ್ಕೆ ಆರಂಭವಾಗಲಿರುವ ಗ್ರಹಣ ಮಧ್ಯಾಹ್ನ 12.29ಕ್ಕೆ ಗ್ರಹಣ ಮೋಕ್ಷ ಕಾಲವಾಗಿದೆ. ಏಪ್ರಿಲ್ 20ರ ಸೂರ್ಯಗ್ರಹಣ ಭಾರತದಲ್ಲಿ ಗೋಚರಿಸುವುದಿಲ್ಲ. ದಕ್ಷಿಣ ಏಷ್ಯಾ, ಆಸ್ಟ್ರೇಲಿಯಾ, ಪೆಸಿಫಿಕ್, ಅಂಟಾರ್ಟಿಕಾದಲ್ಲಿ ಸೂರ್ಯಗ್ರಹಣ ಸಂಭವಿಸಲಿದೆ.

ಎರಡನೇ ಸೂರ್ಯಗ್ರಹಣ:

2023ರ ಎರಡನೇ ಸೂರ್ಯಗ್ರಹಣವು ಅಕ್ಟೋಬರ್ 14ರಂದು ಸಂಭವಿಸಲಿರುವ ಸೂರ್ಯಗ್ರಹಣವು ಭಾರತದಲ್ಲಿ ಗೋಚರಿಸುವುದಿಲ್ಲ. ಇದು ಅಮೆರಿಕದ ಓರೆಗಾಂವ್ ನಲ್ಲಿ ಬೆಳಗ್ಗೆ 9.13ಕ್ಕೆ ಆರಂಭಗೊಂಡು, ಮಧ್ಯಾಹ್ನ 12.03ಕ್ಕೆ ಸೂರ್ಯಗ್ರಹಣ ಮೋಕ್ಷಕಾಲವಾಗಿದೆ.

ಮೊದಲ ಚಂದ್ರಗ್ರಹಣ:

2023ರ ಮೇ 5ರಂದು ಮೊದಲ ಚಂದ್ರಗ್ರಹಣ ಸಂಭವಿಸಲಿದೆ. ಅಂದು ರಾತ್ರಿ 8.45ಕ್ಕೆ ಚಂದ್ರಗ್ರಹಣ ಆರಂಭವಾಗಲಿದ್ದು, ಮಧ್ಯರಾತ್ರಿ 1ಗಂಟೆಗೆ ಮೋಕ್ಷಕಾಲವಾಗಿದೆ. ಈ ಚಂದ್ರಗ್ರಹಣ ಭಾರತದಲ್ಲಿ ಗೋಚರಿಸುವುದಿಲ್ಲ.

ಎರಡನೇ ಚಂದ್ರಗ್ರಹಣ:

2023ರ ಎರಡನೇ ಚಂದ್ರಗ್ರಹಣವು ಅಕ್ಟೋಬರ್ 28- 29ರಂದು ಸಂಭವಿಸಲಿದೆ. ಇದು ಭಾಗಶಃ ಚಂದ್ರಗ್ರಹಣವಾಗಿದ್ದು, ಭಾರತದ ಹಲವೆಡೆ ಚಂದ್ರಗ್ರಹಣ ಗೋಚರಿಸಲಿದೆ.