ಲಿಂಕನ್‌ ಹೌಸ್‌ ಒಡೆತನಕ್ಕೆ ಏಕೆ ಅವಕಾಶ ನೀಡುತ್ತಿಲ್ಲ?

Team Udayavani, Apr 4, 2023, 7:40 AM IST

ಹೊಸದಿಲ್ಲಿ: ಮುಂಬಯಿಯ ಭುಲಾಭಾಯ್‌ ರಸ್ತೆಯಲ್ಲಿರುವ ಅದ್ದೂರಿ ಬಂಗಲೆ “ಲಿಂಕನ್‌ ಹೌಸ್‌’ ಅನ್ನು ತಮ್ಮ ವಶಕ್ಕೆ ಏಕೆ ನೀಡುತ್ತಿಲ್ಲ ಎಂದು ಪುಣೆಯ ಸೀರಂ ಇನ್‌ಸ್ಟಿಟ್ಯೂಟ್‌ ಆಫ್ ಇಂಡಿಯಾದ ಸಂಸ್ಥಾಪಕ ಸೈರಸ್‌ ಪೂನಾವಾಲಾ ಕೇಂದ್ರ ಸರಕಾರವನ್ನು ಪ್ರಶ್ನಿಸಿದ್ದಾರೆ.

ಇದರ ಹಿಂದೆ ರಾಜಕೀಯ ಪ್ರೇರಿತವಾಗಿರುವ ನಿರ್ಧಾರವಿದೆ ಎಂದು ದೂರಿದ್ದಾರೆ. ಎರಡು ಎಕ್ರೆ ಪ್ರದೇಶದ ಜಮೀನಿನಲ್ಲಿ ಇರುವ ಈ ವೈಭವೋಪೇತ ಬಂಗಲೆಯನ್ನು ಪೂನಾವಾಲ 2015ರಲ್ಲಿ 750 ಕೋಟಿ ರೂ. ನೀಡಿ ಖರೀದಿಸಿದ್ದರು. ಆ ಜಮೀನು ತನಗೆ ಸೇರಿದ್ದು ಎಂದು ರಕ್ಷಣ ಸಚಿವಾಲಯ, ಮಹಾರಾಷ್ಟ್ರ ಸರಕಾರ ಎಂದು ಹೇಳಿಕೊಳ್ಳುತ್ತಿವೆ. ಹೀಗಾಗಿ, ಸೈರಸ್‌ ಪೂನಾವಾಲಾ ಅವರಿಗೆ ಅದ್ದೂರಿ ಬಂಗಲೆಯನ್ನು ತಮ್ಮದಾಗಿಸಿಕೊಳ್ಳಲು ಸಾಧ್ಯವಾಗಿಲ್ಲ.

1933ರಲ್ಲಿ ಪಂಜಾಬ್‌ ಮಹಾರಾಜರಿಂದ ನಿರ್ಮಿತವಾದ ಈ ಕಟ್ಟಡವನ್ನು, ಅಮೆರಿಕ ಸರಕಾರಕ್ಕೆ 1957ರಲ್ಲಿ 999 ವರ್ಷದ ಗುತ್ತಿಗೆಗೆ ನೀಡಲಾಗಿತ್ತು. ಅಮೆರಿಕ ಸರಕಾರ ಇದನ್ನು ವೀಸಾ ನೀಡಲು ಬಳಸುತ್ತಿತ್ತು. 2014ರಲ್ಲಿ ಅದು ಬೇರೆ ಕಟ್ಟಡಕ್ಕೆ ಸ್ಥಳಾಂತರವಾಯಿತು.