IPL 2023: ಪಂಜಾಬ್‌ ಕಿಂಗ್ಸ್‌ ವಿರುದ್ಧ ಹೈದರಾಬಾದ್‌ಗೆ 8 ವಿಕೆಟ್‌ ಗೆಲುವು

Team Udayavani, Apr 10, 2023, 7:24 AM IST

ಹೈದರಾಬಾದ್‌: ರಾಹುಲ್‌ ತ್ರಿಪಾಠಿ ಮತ್ತು ನಾಯಕ ಐಡೆನ್‌ ಮಾರ್ಕ್‌ರಮ್‌ ಅವರ ಅಮೋಘ ಆಟದಿಂದಾಗಿ ಸನ್‌ರೈಸರ್ ಹೈದರಾಬಾದ್‌ ತಂಡವು ರವಿವಾರದ ಐಪಿಎಲ್‌ ಪಂದ್ಯದಲ್ಲಿ ಪಂಜಾಬ್‌ ಕಿಂಗ್ಸ್‌ ತಂಡವನ್ನು 8 ವಿಕೆಟ್‌ಗಳಿಂದ ಭರ್ಜರಿಯಾಗಿ ಸೋಲಿಸಿದೆ.

ಮಾಯಾಂಕ್‌ ಮಾರ್ಕಂಡೆ ಅವರ ಮಾರಕ ದಾಳಿಗೆ ಕುಸಿದ ಪಂಜಾಬ್‌ 9 ವಿಕೆಟಿಗೆ 143 ರನ್‌ ಗಳಿಸಿತ್ತು. ಜವಾಬಿತ್ತ ಹೈದರಾಬಾದ್‌ 17.1 ಓವರ್‌ಗಳಲ್ಲಿ ಕೇವಲ 2 ವಿಕೆಟಿಗೆ 145 ರನ್‌ ಪೇರಿಸಿ ಜಯಭೇರಿ ಬಾರಿಸಿತು. ತ್ರಿಪಾಠಿ ಮತ್ತು ಮಾರ್ಕ್‌ರಮ್‌ ಮುರಿಯದ ಮೂರನೇ ವಿಕೆಟಿಗೆ 100 ರನ್‌ ಪೇರಿಸುವ ಮೂಲಕ ತಂಡದ ಗೆಲುವು ಸಾರಿದರು.

ಈ ಮೊದಲು ಮೊದಲ ಎಸೆತದಲ್ಲೇ ಪ್ರಭ್‌ಸಿಮ್ರಾನ್‌ ಅವರನ್ನು ಕಳೆದುಕೊಂಡ ಪಂಜಾಬ್‌ ಒಂದೇ ಸಮನೆ ಕುಸಿತ ಅನುಭವಿಸಿತು. ಸರಿಯಾಗಿ 15 ಓವರ್‌ ಮುಕ್ತಾಯಕ್ಕೆ 9 ವಿಕೆಟಿಗೆ 88 ರನ್‌ ಗಳಿಸಿದ ಪಂಜಾಬ್‌ ನೂರರ ಗಡಿ ಮುಟ್ಟುವುದೂ ಅನುಮಾನವಿತ್ತು. ಆದರೆ ಶಿಖರ್‌ ಧವನ್‌ ಒಂದೆಡೆ ನಿಂತು ಕಪ್ತಾನನ ಆಟವಾಡುವ ಜತೆಗೆ ತಂಡದ ಮೊತ್ತವನ್ನು ನಿಧಾನವಾಗಿ ಏರಿಸುತ್ತ ಹೋದರು. ಅವರೊಂದಿಗೆ ಅಂತಿಮ ವಿಕೆಟಿಗೆ ಜತೆಯಾದವರು ಮೋಹಿತ್‌ ರಥಿ. ಆದರೆ ರಥಿ ಎದುರಿಸಿದ್ದು 2 ಎಸೆತ ಮಾತ್ರ. ಅವರನ್ನು ಇನ್ನೊಂದೆಡೆ ನಿಲ್ಲಿಸಿದ ಧವನ್‌ ಏಕಾಂಗಿಯಾಗಿ ರನ್‌ ಪೇರಿಸುತ್ತ ಹೋದರು. ಮುರಿಯದ ಅಂತಿಮ ವಿಕೆಟಿಗೆ 55 ರನ್‌ ಒಟ್ಟುಗೂಡಿಸಿದರು. ಇದರಲ್ಲಿ ಧವನ್‌ ಪಾಲೇ 52 ರನ್‌! ಒಂದು ರನ್ನಿನಿಂದ ಧವನ್‌ ಶತಕ ವಂಚಿತರಾಗಬೇಕಾಯಿತು.