ಜೆಡಿಎಸ್ ಟಿಕೆಟ್ ಘೋಷಣೆಗೂ ಮುನ್ನ BJP ಶಕ್ತಿ ಪ್ರದರ್ಶಿಸಿದ ಪ್ರೀತಂ ಗೌಡ

Team Udayavani, Apr 14, 2023, 9:02 PM IST

ಹಾಸನ : ವಿಧಾನಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಶಾಸಕ ಪ್ರೀತಂ ಗೌಡ ಗೌಡ ಅವರು ಶುಕ್ರವಾರ ಬೃಹತ್ ರೋಡ್ ಶೋ ನಡೆಸುವ ಮೂಲಕ ಶಕ್ತಿ ಪ್ರದರ್ಶನ ಮಾಡಿದ್ದಾರೆ.

ಸಾವಿರಾರು ಕಾರ್ಯಕರ್ತರು ಬೃಹತ್ ರೋಡ್ ಶೋನಲ್ಲಿ ಭಾಗಿಯಾಗುವ ಮೂಲಕ ಪ್ರೀತಂ ಗೌಡ ಅವರಲ್ಲಿ ಹೊಸ ರಣೋತ್ಸಾಹ ಮೂಡಿಸಿದರು.

ಸಾಲಗಾಮೆ ರಸ್ತೆ, ಕ್ರೀಡಾಂಗಣದ ಮುಂಭಾಗದಿಂದ ಹೊರಟ ಬೃಹತ್ ರೋಡ್ ಶೋ ಬಿ.ಎಂ.ರಸ್ತೆಯಲ್ಲಿ ಮುಕ್ತಾಯವಾಯಿತು. ಬಸ್‌ ಗೂಡ್ಸ್‌ ವಾಹನಗಳಲ್ಲಿ ಜಿಲ್ಲೆಯ ವಿವಿಧೆಡೆಯಿಂದಲೂ ಬಂದಿದ್ದ ಸಾವಿರಾರು ಕಾರ್ಯಕರತರು ತಲೆಗೆ ಬಿಳಿ ಕ್ಯಾಪ್‌ ಧರಿಸಿ ಗಮನ ಸೆಳೆದರು. ಬಿಜೆಪಿ ಮುಖಂಡರು ಕುಡಿಯುವ ನೀರು, ಊಟ ಮತ್ತಿತರ ವ್ಯವಸ್ಥೆಯನ್ನು ಮಾಡಿದ್ದರು. ಮೆರವಣಿಗೆಯುದ್ದಕ್ಲೂ ಬಿಗಿ ಪೊಲೀಸ್‌ ಬಂದೋಬಸ್ತ್ ಮಾಡಲಾಗಿತ್ತು.

ಪ್ರೀತಂಗೌಡ ಅವರು ಈ ವೇಳೆ ಮಾತನಾಡಿ, ನಾಮಪತ್ರ ಸಲ್ಲಿಕೆಗೂ ಮೊದಲು ಸಾವಿರಾರು ಜನರನ್ನು ಸೇರಿಸಿ ಹಾಸನದಲ್ಲಿ ಇತಿಹಾಸ ನಿರ್ಮಾಣ ಮಾಡಿದ್ದೇನೆ. ಸಾಮಾನ್ಯ ಕುಟುಂಬದಿಂದ ಬಂದ ನನ್ನನ್ನು ಮತ್ತೆ ಗೆಲ್ಲಿಸಬೇಕು ಎಂದು ನೀವು ಬಂದಿದ್ದೀರಿ, ನಿಮಗೆಲ್ಲ ನನ್ನ ಸಾಷ್ಟಾಂಗ ನಮಸ್ಕಾರಗಳು ಎಂದರು. ಇಂದಿನ ಜನಸಾಗರ ಕಂಡು ಹೊಳೆನರಸೀಪುರದವರು ಹಾಗೂ ಹಾಸನದ ಹೇಮಾವತಿ ನಗರದವರು ಟಿಕೆಟ್‌ ಬೇಡ ಎಂದು ದೇವರಲ್ಲಿ ಪ್ರಾರ್ಥನೆ ಮಾಡಿಕೊಳ್ಳುತ್ತಿದ್ದಾರೆ ಎಂದು ಪರೋಕ್ಷವಾಗಿ ಭವಾನಿ ರೇವಣ್ಣ ಮತ್ತು ಹೆಚ್‌.ಪಿ.ಸ್ವರೂಪ್‌ ಅವರನ್ನು ಗೇಲಿ ಮಾಡಿದರು.

ಹೆಚ್‌.ಪಿ.ಸ್ವರೂಪ್‌ ಅವರಿಗೆ ಶುಕ್ರವಾರ ಜೆಡಿಎಸ್ ಟಿಕೆಟ್ ಘೋಷಿಸಿ ಬಿ ಫಾರ್ಮ್ ನೀಡಿದೆ.