Bretain ಶಾಲೆಗಳಲ್ಲಿ ಹಿಂದೂ ದ್ವೇಷ: ಬ್ರಿಟನ್‌ನ ಅಧ್ಯಯನದಲ್ಲಿ ಆತಂಕಕಾರಿ ಅಂಶ ಬಹಿರಂಗ

Team Udayavani, Apr 21, 2023, 7:30 AM IST

ಲಂಡನ್‌: ಬ್ರಿಟನ್‌ನ ಶಾಲೆಗಳಲ್ಲಿ ಹಿಂದೂ ಮಕ್ಕಳು ಧಾರ್ಮಿಕ ಕಾರಣಕ್ಕೆ ಅಣಕಕ್ಕೊಳಗಾಗುತ್ತಿರುವ, ಅವರಿಗೆ ಹಿಂಸೆ ನೀಡುತ್ತಿರುವ ಘಟನೆಗಳು ದೊಡ್ಡ ಪ್ರಮಾಣದಲ್ಲಿಯೇ ನಡೆಯುತ್ತಿವೆ. ಈ ಬಗ್ಗೆ ಹೆನ್ರಿ ಜ್ಯಾಕ್ಸನ್‌ ಸೊಸೈಟಿ ನಡೆಸಿದ ಅಧ್ಯಯನದಲ್ಲಿ ಬಹಿರಂಗವಾಗಿದೆ. ಚಾರ್ಲೊಟ್‌ ಲಿಟ್ಲ ವುಡ್‌ “ಆ್ಯಂಟಿ ಹಿಂದೂ ಹೇಟ್‌ ಇನ್‌ ಸ್ಕೂಲ್ಸ್‌’ ಎಂಬ ವರದಿಯನ್ನು ಸಿದ್ಧಪಡಿಸಿದ್ದು, ಅದರಲ್ಲಿ ಹಿಂದೂ ಸಮುದಾಯದ ವಿದ್ಯಾರ್ಥಿಗಳು ಎದುರಿಸುತ್ತಿರುವ ಸಮಸ್ಯೆಯನ್ನು ವಿವರಿಸಲಾಗಿದೆ.

ಬಹುದೇವಾತಾರಾಧನೆ, ಗೋವುಗಳನ್ನು ಪೂಜಿಸುವುದು ಬಹಳ ಅಣಕಕ್ಕೊಳಗಾಗಿದೆ. ಮುಸ್ಲಿಂ ವಿದ್ಯಾರ್ಥಿಗಳು ಹಿಂದೂ ವಿದ್ಯಾರ್ಥಿಗಳನ್ನು ಕಾಫಿರ್‌ ಎಂದು ಕರೆಯುತ್ತಾರೆ. ಭಾರತದಲ್ಲಿ ನಡೆಯುವ ವಿವಿಧ ಬೆಳವಣಿಗೆಗಳ ವೇಳೆಯಲ್ಲೆಲ್ಲ ಇಂಗ್ಲೆಂಡ್‌ನ‌ಲ್ಲಿನ ಹಿಂದೂ ವಿದ್ಯಾರ್ಥಿಗಳು ಹಿಂಸೆ ಎದುರಿಸುತ್ತಿದ್ದಾರೆ. ವಿಶೇಷವಾಗಿ ಭಾರತದಲ್ಲಿ ನರೇಂದ್ರ ಮೋದಿ ಸರ್ಕಾರ ಅಸ್ತಿತ್ವಕ್ಕೆ ಬಂದ ನಂತರ ಇದು ಹೆಚ್ಚಿದೆ ಎಂದು ಹಿಂದೂ ಪೋಷಕರು ಅಭಿಪ್ರಾಯಪಟ್ಟಿದ್ದಾರೆ. ಒಟ್ಟು 998 ಹಿಂದೂ ಪೋಷಕರು ತಮ್ಮ ಅಭಿಪ್ರಾಯ ನೀಡಿದ್ದಾರೆ. 400 ವರ್ಷಗಳ ಕಾಲ ಬ್ರಿಟೀಷರು ಆಳ್ವಿಕೆ ನಡೆಸಿದ್ದರೂ, ಅವರಿಗೆ ಹಿಂದೂಗಳ ಆಚರಣೆಯ ಬಗ್ಗೆ ಇನ್ನೂ ಅರಿವು ಇಲ್ಲ. ಶಾಲೆಗಳಲ್ಲಿ ಹಿಂದೂ ಧರ್ಮದ ಬಗ್ಗೆ ಇರುವ ಅಧ್ಯಾಯ ಧರ್ಮವನ್ನೇ ಅಣಕಿಸುವಂತಿದೆ ಎಂದು ಪೋಷಕರು ಆರೋಪಿಸಿದ್ದಾರೆ.

ಯಾವುದೆಲ್ಲ ಸಮಸ್ಯೆ?
ಹಿಂದೂ ವಿದ್ಯಾರ್ಥಿಗಳು ಸಸ್ಯಾಹಾರ ಸೇವಿಸುವುದು, ಧಾರ್ಮಿಕ ಆಚರಣೆಗಳು, ಬಹುದೇವಾತಾರಾಧನೆ, ಗೋವನ್ನು ಪೂಜಿಸುವುದನ್ನೆಲ್ಲ ಮುಸ್ಲಿಂ, ಕ್ರೈಸ್ತ ವಿದ್ಯಾರ್ಥಿಗಳು ಅಪಹಾಸ್ಯ ಮಾಡುತ್ತಾರೆ. ಒಬ್ಬಳು ಬಾಲಕಿಯ ಮೇಲೆ ಗೋಮಾಂಸವನ್ನು ಎಸೆಯಲಾಗಿದೆ. ಒಬ್ಬ ಮುಸ್ಲಿಂ ವಿದ್ಯಾರ್ಥಿ ಇಸ್ಲಾಂಗೆ ಮತಾಂತರವಾದರೆ ನಿಮಗೆ ತೊಂದರೆ ಮಾಡುವುದನ್ನು ನಿಲ್ಲಿಸುತ್ತೇವೆಂದು ಹೇಳಿದ್ದಾನೆ. ಒಬ್ಬ ಕ್ರೈಸ್ತ ವಿದ್ಯಾರ್ಥಿ, ಹಿಂದೂ ದೇವತೆಗಳನ್ನು ಕ್ರಿಸ್ತ ನರಕಕ್ಕೆ ಕಳಿಸುತ್ತಾನೆಂದು ಹೀಯಾಳಿಸಿದ್ದಾನೆ. ಇದರಿಂದ ಮಕ್ಕಳು ಶಾಲೆಗೆ ಹೋಗಲು ಒಪ್ಪುತ್ತಿಲ್ಲ ಎಂದು ಪೋಷಕರು ಹೇಳಿದ್ದಾರೆ.