ಕಾರು ಗೆದ್ದಿರುವುದಾಗಿ ಹೇಳಿ ಸ್ಕ್ರಾಚ್ ಕಾರ್ಡ್‌ ಕಳುಹಿಸಿ 2.25 ಲ.ರೂ. ವಂಚನೆ

Team Udayavani, Apr 26, 2023, 8:00 AM IST

ಮಂಗಳೂರು: ಕಾರು ಗೆದ್ದಿರುವುದಾಗಿ ಹೇಳಿ ವ್ಯಕ್ತಿಯೋರ್ವರಿಂದ 2.25 ಲ.ರೂ. ಪಡೆದು ವಂಚಿಸಿರುವ ಬಗ್ಗೆ ಮಂಗಳೂರು ಸೆನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ದೂರುದಾರ ವ್ಯಕ್ತಿಗೆ ಎ. 17ರಂದು ಬೆಳಗ್ಗೆ ಅಂಚೆ ಮೂಲಕ ಸ್ಕ್ರಾಚ್ ಕಾರ್ಡ್‌ ಬಂದಿತ್ತು. ಅದನ್ನು ತೆರೆದು ನೋಡಿದಾಗ ಅದರಲ್ಲಿ ವಾಟ್ಸ್‌ಆ್ಯಪ್‌ ಸಂಖ್ಯೆ ಇತ್ತು. ಅದಕ್ಕೆ ಕರೆ ಮಾಡಿದ್ದು, ಅಪರಿಚಿತ ವ್ಯಕ್ತಿ “ಮೀಶೋ ವತಿಯಿಂದ ನೀವು ಕಾರು ಗೆದ್ದಿದ್ದೀರಿ.

ಸ್ಕ್ರಾಚ್ ಕಾರ್ಡ್‌ನಲ್ಲಿರುವ ಕೋಡನ್ನು ತಿಳಿಸಿ’ ಎಂದು ಹೇಳಿದ. ದೂರುದಾರ ವ್ಯಕ್ತಿ ಕೋಡನ್ನು ಅಪರಿಚಿತ ವ್ಯಕ್ತಿಗೆ ನೀಡಿದ್ದ‌ರು. ಅನಂತರ ಪೇಪರ್‌ ಚಾರ್ಜ್‌ ಬಗ್ಗೆ 6,500 ರೂ.ಗಳನ್ನು ಗೂಗಲ್‌ ಪೇ ಮೂಲಕ ಪಡೆದುಕೊಂಡಿದ್ದ. ಅನಂತರ ತೆರಿಗೆ, ಜಿಎಸ್‌ಟಿ ಹೀಗೆ ಹಲವಾರು ಕಾರಣಗಳನ್ನು ಹೇಳಿ ದೂರುದಾರ ವ್ಯಕ್ತಿಯ ಖಾತೆಯಿಂದ ಹಂತ ಹಂತವಾಗಿ ಒಟ್ಟು 2.25 ಲ.ರೂ.ಗಳನ್ನು ವರ್ಗಾಯಿಸಿಕೊಂಡು ವಂಚಿಸಿದ್ದಾನೆ.