Karnataka Election ಕೌಲ್ ಬಜಾರ್ ನಲ್ಲಿ ಶಿವರಾಜ್ ಸಿಂಗ್ ಚೌಹಾಣ್ ರೋಡ್ ಶೋ

Team Udayavani, Apr 29, 2023, 5:48 PM IST

ಬಳ್ಳಾರಿ: ರಾಜ್ಯ ವಿಧಾನಸಭೆ ಚುನಾವಣೆ ನಿಮಿತ್ತ ಬಳ್ಳಾರಿ ಗ್ರಾಮೀಣ ಕ್ಷೇತ್ರ ವ್ಯಾಪ್ತಿಯ ಕೌಲ್ ಬಜಾರ್ ಮುಖ್ಯ ರಸ್ತೆಯಲ್ಲಿ ಮಧ್ಯಪ್ರದೇಶ ಸಿಎಂ ಶಿವರಾಜ್ ಸಿಂಗ್ ಚೌಹಾಣ್, ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಬಿ.ಶ್ರೀರಾಮುಲು ಪರ ಶನಿವಾರ ಭರ್ಜರಿ ರೋಡ್ ಶೋ ನಡೆಸಿದರು.

ಅಲ್ಪಸಂಖ್ಯಾತ ಮತಗಳನ್ನು ಗುರಿಯಾಗಿಸಿಕೊಂಡು ಕೌಲ್ ಬಜಾರ್ ನ ಟಿಬಿ ಸ್ಯಾನಿಟೋರಿಯಂ ನಿಂದ ತೆರೆದ ವಾಹನದಲ್ಲಿ ಆರಂಭವಾದ ರೋಡ್ ಶೋ, ಖೂನಿಠಾಣಾ ಮಸೀದಿ, ಕೌಲ್ ಬಜಾರ್ ಠಾಣೆ ಮೂಲಕ ರೈಲ್ವೆ ಮೊದಲ ಗೇಟ್ ಗೆ ಮುಕ್ತಾಯವಾಯಿತು. ರೋಡ್ ಶೋ ಮಧ್ಯೆದಲ್ಲಿ ವೃತ್ತಗಳಲ್ಲಿ ಜನರನ್ನು ಜಮಾಯಿಸಿದ್ದರು. ಅಲ್ಲಿ ಕೆಲಹೊತ್ತು ನಿಲ್ಲಿಸಿ ಸಾರ್ವಜನಿಕರನ್ನು ಉದ್ದೇಶಿಸಿ ಮಧ್ಯಪ್ರದೇಶ ಸಿಎಂ ಶಿವರಾಜ್ ಸಿಂಗ್ ಚೌಹಾಣ್ ಭಾಷಣ ಮಾಡಿದರು.

ರೋಡ್ ಶೋ ದಲ್ಲಿ ಮಾಜಿ ಸಂಸದರಾದ ಸಣ್ಣ ಪಕ್ಕೀರಪ್ಪ, ಜೆ.ಶಾಂತಾ, ಮುಖಂಡರಾದ ಗುಜರಿ ಅಜೀಜ್, ಸುಗುಣ ಪುಷ್ಪ, ಶಿವಕೃಷ್ಣ ಸೇರಿ ಹಲವರು ಇದ್ದರು.