265 ಅಡಿ ಎತ್ತರದ ತೆಲಂಗಾಣ ಸಚಿವಾಲಯ ಉದ್ಘಾಟನೆ

Team Udayavani, May 1, 2023, 7:53 AM IST

ಹೈದರಾಬಾದ್‌: ಆರು ಅಂತಸ್ತು, 265 ಅಡಿ ಎತ್ತರ ಇರುವ ತೆಲಂಗಾಣ ಸಚಿವಾಲಯ ಕಟ್ಟಡವನ್ನು ಸಿಎಂ ಕೆ.ಚಂದ್ರಶೇಖರ ರಾವ್‌ ಭಾನುವಾರ ಉದ್ಘಾಟಿಸಿದ್ದಾರೆ. 635 ಕೊಠಡಿಗಳು, 34 ಗುಮ್ಮಟಗಳನ್ನು ಅದು ಹೊಂದಿದೆ. ಅದಕ್ಕೆ ಸಂವಿಧಾನ ಶಿಲ್ಪಿ ಡಾ.ಬಿ.ಆರ್‌.ಅಂಬೇಡ್ಕರ್‌ ಅವರ ಹೆಸರನ್ನು ಇರಿಸಲಾಗಿದೆ. ಹಾಲಿ ಇರುವ ಕಟ್ಟಡ ಅವಿಭಜಿತ ಆಂಧ್ರಪ್ರದೇಶ ಇದ್ದಾಗ ನಿರ್ಮಾಣವಾಗಿತ್ತು.

ಜತೆಗೆ ಸ್ಥಳಾವಕಾಶದ ಕೊರತೆಯೂ ಉಂಟಾಗುತ್ತಿತ್ತು ಕಾಕತೀಯರ ಕಾಲದಲ್ಲಿ ನಿಜಾಮಾಬಾದ್‌ನಲ್ಲಿ ನಿರ್ಮಿಸಿರುವ ನೀಲಕಂಠೇಶ್ವರ ಸ್ವಾಮಿ ದೇವಸ್ಥಾನದ ರಾಜಗೋಪುರ ಹಾಗೂ ಗುಜರಾತ್‌ನ ಸಾರಂಗಪುರದ ಹನುಮಾನ್‌ ದೇವಸ್ಥಾನದ ಮಾದರಿಯನ್ನು ಅನುಸರಿಸಿ, ಸಚಿವಾಲಯದ ಗುಮ್ಮಟಗಳನ್ನು ನಿರ್ಮಿಸಲಾಗಿದೆ. 28 ಎಕರೆ ಜಮೀನಿನಲ್ಲಿ 10.51 ಲಕ್ಷ ಚದರ ಅಡಿ ವಿಸ್ತೀರ್ಣದಲ್ಲಿ ನಿರ್ಮಾಣಗೊಂಡಿರುವ ಈ ಕಟ್ಟಡದ ನಿರ್ಮಾಣಕ್ಕೆ 550 ಕೋಟಿ ರೂ. ವೆಚ್ಚವಾಗಿದೆ. 2019 ಜೂ.7ರಂದು ಶಂಕುಸ್ಥಾಪನೆ ನೆರವೇರಿಸಲಾಗಿತ್ತು. ದಾಖಲೆಯ 26 ತಿಂಗಳಲ್ಲಿ ಕಾಮಗಾರಿ ಪೂರ್ತಿಗೊಂಡಿದೆ.