Manufacturing;ನಾಲ್ಕು ತಿಂಗಳ ಗರಿಷ್ಠಕ್ಕೆ ಉತ್ಪಾದನಾ ಚಟುವಟಿಕೆ: ಪಿಎಂಐ ವರದಿಯಲ್ಲಿ ಉಲ್ಲೇಖ

Team Udayavani, May 2, 2023, 6:45 AM IST

ನವದೆಹಲಿ: ದೇಶದಲ್ಲಿನ ಉತ್ಪಾದನಾ ಚಟುವಟಿಕೆ ಏಪ್ರಿಲ್‌ ಮಾಸಾಂತ್ಯಕ್ಕೆ ಮುಕ್ತಾಯವಾದಂತೆ ನಾಲ್ಕು ತಿಂಗಳ ಗರಿಷ್ಠಕ್ಕೆ ಏರಿಕೆಯಾಗಿದೆ. ವ್ಯಾಪಾರ-ಉದ್ದಿಮೆ ಕ್ಷೇತ್ರದಲ್ಲಿ ಹೊಸ ಬೇಡಿಕೆಗಳು, ವಸ್ತುಗಳ-ಪೂರೈಕೆ ಸರಣಿಯಲ್ಲಿ ತೃಪ್ತಿದಾಯಕ ಪರಿಸ್ಥಿತಿ ಇರುವುದರಿಂದಾಗಿ ಧನಾತ್ಮಕ ಬೆಳವಣಿಗೆಯಾಗಿದೆ ಎಂದು ಎಸ್‌ ಆ್ಯಂಡ್‌ ಪಿ ಗ್ಲೋಬಲ್‌ ಇಂಡಿಯಾ ಮ್ಯಾನ್ಯುಫ್ಯಾಕ್ಚರಿಂಗ್‌ ಪರ್ಚೇಸಿಂಗ್‌ ಮ್ಯಾನೇಜರ್ಸ್‌ ಇಂಡೆಕ್ಸ್‌ (ಪಿಎಂಐ)ನ ವರದಿಯಲ್ಲಿ ಈ ಅಂಶ ಉಲ್ಲೇಖಿಸಲಾಗಿದೆ.

ಕೇಂದ್ರ ಸರ್ಕಾರದ ಆತ್ಮನಿರ್ಭರ ಭಾರತ ಕನಸಿನ ನಡುವೆಯೇ ದೇಶದಲ್ಲಿ ಉತ್ಪಾದನಾ ಚಟುವಟಿಕೆಗಳು ವೇಗ ಪಡೆದಿದೆ. ಮಾರ್ಚ್‌ನ 56.4 ರಿಂದ ಏಪ್ರಿಲ್‌ಗೆ 57.2ಕ್ಕೆ ಉತ್ಪಾದನಾ ಚಟುವಟಿಕೆ ಏರಿಕೆಯಾಗಿದೆ.

ಇದು ಆರ್ಥಿಕ ವಲಯದಲ್ಲಿ ಈ ವರ್ಷದಲ್ಲಿ ದಾಖಲಾಗಿರುವ ಅತ್ಯುತ್ತಮ ಸುಧಾರಣೆ ಮಟ್ಟ. ದೇಶದ ಕಾರ್ಖಾನೆಗಳಿಗೆ ಬರುತ್ತಿರುವ ಆರ್ಡರ್‌ ಮತ್ತು ಉತ್ಪಾದನೆ ಮಟ್ಟ ಪ್ರಸಕ್ತ ವರ್ಷ ತೃಪ್ತಿದಾಯಕವಾಗಿದೆ. ಇದರಿಂದಾಗಿ ಉದ್ಯೋಗ ಸೃಷ್ಟಿಯೂ ಸಾಧ್ಯವಾಗುತ್ತಿದೆ ಎಂದು ಸಂಸ್ಥೆ ತಿಳಿಸಿದೆ.