2024 ರಲ್ಲಿ ಒಗ್ಗಟ್ಟಾದ ವಿರೋಧ ಪಕ್ಷಗಳು ಪವಾಡ ಮಾಡಲಿವೆ: ಶತ್ರುಘ್ನ ಸಿನ್ಹಾ

Team Udayavani, Jun 10, 2023, 3:15 PM IST

ಪಾಟ್ನಾ: ಮುಂದಿನ ವರ್ಷ ನಡೆಯಲಿರುವ ಲೋಕಸಭೆ ಚುನಾವಣೆಯಲ್ಲಿ ಒಗ್ಗೂಡಿದ ಪ್ರತಿಪಕ್ಷಗಳು ಪವಾಡ ಮಾಡಲಿವೆ ಎಂದು ತೃಣಮೂಲ ಕಾಂಗ್ರೆಸ್ ಸಂಸದ ಶತ್ರುಘ್ನ ಸಿನ್ಹಾ ಹೇಳಿದ್ದಾರೆ.

ತವರು ಪಾಟ್ನಾ ಪ್ರವಾಸದಲ್ಲಿರುವ ಸಿನ್ಹಾ ಶುಕ್ರವಾರ ಪತ್ರಕರ್ತರೊಂದಿಗೆ ಮಾತನಾಡಿ, ಜೂನ್ 23 ರಂದು ಇಲ್ಲಿ ನಿಗದಿಯಾಗಿರುವ ವಿರೋಧ ಪಕ್ಷಗಳ ಸಭೆಯ ಬಗ್ಗೆ ತನಗೆ ಸಂಭ್ರಮವಿದೆ. ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರ ಉಪಕ್ರಮವನ್ನು ಶ್ಲಾಘಿಸುತ್ತೇನೆ. ತಮ್ಮ ಪಕ್ಷದ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಅವರು ಸಭೆಯಲ್ಲಿ ಭಾಗವಹಿಸಲು ಒಪ್ಪಿಕೊಂಡಿದ್ದಾರೆ ಎಂದರು.

“ಮಮತಾ ಬ್ಯಾನರ್ಜಿ ಆಟವನ್ನೇ ಬದಲಾಯಿಸುವವರು ಎಂದು ನಾನು ಯಾವಾಗಲೂ ನಂಬಿದ್ದೇನೆ. ಭಾರತ್ ಜೋಡೋ ಯಾತ್ರೆಯ ನಂತರ ವೀರೋಚಿತ ಸ್ಥಾನಮಾನವನ್ನು ಗಳಿಸಿದ ರಾಷ್ಟ್ರೀಯ ಐಕಾನ್ ರಾಹುಲ್ ಗಾಂಧಿಯಂತಹ ಜನರೊಂದಿಗೆ ಅವರು ಇರುವುದು ಅದ್ಭುತವಾಗಿದೆ ”ಎಂದು ಸಿನ್ಹಾ ಹೇಳಿದರು.

ಪ್ರಸ್ತುತ ಆಡಳಿತವನ್ನು ಬದಲಿಸುವ ಹೊಸ ಸರ್ಕಾರಕ್ಕೆ ಸಾಮಾನ್ಯ ಕನಿಷ್ಠ ಕಾರ್ಯಕ್ರಮವನ್ನು ನಿರ್ಮಿಸಲು ಸಭೆಯು ಸಹಾಯ ಮಾಡುತ್ತದೆ ಎಂದು ಅಸನ್ಸೋಲ್ ಸಂಸದ ಸಿನ್ಹಾ ಆಶಿಸಿದರು.

ಸಿನ್ಹಾ ಅವರು 2019 ರಲ್ಲಿ ಕಾಂಗ್ರೆಸ್ ಟಿಕೆಟ್‌ನಲ್ಲಿ ಸ್ಪರ್ಧಿಸಿ ರವಿಶಂಕರ್ ಪ್ರಸಾದ್‌ ಅವರ ಎದುರು ಸೋಲುವ ಮೊದಲು ಎರಡು ಬಾರಿ ಬಿಜೆಪಿ ಸಂಸದರಾಗಿ ಪಾಟ್ನಾ ಸಾಹಿಬ್ ಅನ್ನು ಪ್ರತಿನಿಧಿಸಿದ್ದರು.

2024 ರಲ್ಲಿ ಸಂಯುಕ್ತ ವಿರೋಧ ಪಕ್ಷವು ಎಷ್ಟು ಸ್ಥಾನಗಳನ್ನು ಗೆಲ್ಲುತ್ತದೆ ಎಂದು ಕೇಳಿದಾಗ ಉತ್ತರಿಸಿ “ನಾನು ಜ್ಯೋತಿಷಿಯಲ್ಲ ಆದರೆ ಪವಾಡ ನಡೆಯುತ್ತದೆ ಎಂದು ಖಚಿತವಾಗಿ ಹೇಳಬಹುದು. ಹಿಮಾಚಲ ಪ್ರದೇಶ ಮತ್ತು ಕರ್ನಾಟಕದ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಯನ್ನು ಕಾಂಗ್ರೆಸ್ ಸೋಲಿಸಿದಾಗ ಏನನ್ನೂ ಸಾಧಿಸಬಹುದು ಎಂಬುದರ ಝಲಕ್ ಗಳನ್ನು ನಾವು ನೋಡಿದ್ದೇವೆ” ಎಂದರು.