ಗಿಫ್ಟ್ ಕೂಪನ್‌ ಆಸೆಗೆ 6.94 ಲಕ್ಷ ಕಳಕೊಂಡ ವಿದ್ಯಾರ್ಥಿನಿ!

Team Udayavani, Jun 18, 2023, 3:48 PM IST

ಚಿಕ್ಕಬಳ್ಳಾಪುರ: ಮೀಶೋ ಕಂಪನಿ ಹೆಸರಿನಲ್ಲಿ ಅಂಚೆ ಮೂಲಕ ಬಂದ ಗಿಫ್ಟ್ ಕೂಪನ್‌ ಮಾದರಿಯ ಒಂದು ಲೆಟರ್‌ ನಂಬಿದ ಬಿಇ ಓದುತ್ತಿದ್ದ ವಿದ್ಯಾರ್ಥಿನಿ ಬರೋಬ್ಬರಿ 6.94 ಲಕ್ಷ ರೂ ಹಣವನ್ನು ಕಳೆದುಕೊಂಡಿರುವ ಘಟನೆ ಶಿಡ್ಲಘಟ್ಟ ತಾಲೂಕಿನಲ್ಲಿ ನಡೆದಿದೆ.

ಶಿಡ್ಲಘಟ್ಟ ತಾಲೂಕಿನ ಕಾಳಿನಾಯಕನಹಳ್ಳಿಯ ಸಹನಾ ಕೆ.ಬಿನ್‌ ಕೃಷ್ಣಪ್ಪ (19) ಬೆಂಗಳೂರಿನ ನ್ಯೂ ಹಾರಿಜನ್‌ ಕಾಲೇಜಿನಲ್ಲಿ ಬಿಇ ವ್ಯಾಸಂಗ ಮಾಡುತ್ತಿದ್ದು ಸದ್ಯ ತನಗೆ ಆಗಿರುವ ಹಣಕಾಸಿನ ವಂಚನೆ ಬಗ್ಗೆ ಜಿಲ್ಲಾ ಸೈಬರ್‌ ಠಾಣೆ ಪೊಲೀಸರಿಗೆ ದೂರು ನೀಡಿದ್ದಾರೆ.

ಏನಿದು ಪ್ರಕರಣ?: ಶಿಡ್ಲಘಟ್ಟ ತಾಲೂಕು ಎಚ್‌.ಕ್ರಾಸ್‌ನಲ್ಲಿರುವ ಪ್ರಗತಿ ಕೃಷ್ಣ ಗ್ರಾಮೀಣ ಬ್ಯಾಂಕ್‌ನಲ್ಲಿ ಎಸ್‌.ಬಿ. ಖಾತೆ ಹೊಂದಿರುವ ಸಹನಾ ಭೀಮ್‌ ಯುಪಿಐ ಅಪ್ಲಿಕೇಷನ್‌ ಬಳಸುತ್ತಿದ್ದು ಮೀಶೋ ಅಪ್ಲಿಕೇ ಷನ್‌ ನ್ನು ಶಾಂಪಿಂಗ್‌ ಸಲುವಾಗಿ ಬಳಸುತ್ತಿದ್ದರು. ಆದರೆ, ಕಳೆದ ಜೂ.3 ರಂದು ಆಕೆಯ ಅಂಚೆ ವಿಳಾಸಕ್ಕೆ ಒಂದು ಪೋಸ್ಟ್‌ ಬಂದಿದ್ದು ಸದರಿ ಪೋಸ್ಟ್‌ ಅನ್ನು ತೆಗೆದು ನೋಡಲಾಗಿ Online Shopping Scratch Win, 1st Prize 11,00000 ಇತ್ಯಾದಿ ಒಂದು ಕೂಪನ್‌, ಅದರೊಂದಿಗೆ ಮೀಶೋ ಕಂಪನಿ ಹೆಸರಿನಲ್ಲಿ 1 ಲೆಟರ್‌ ಇದೆ. ಅದನ್ನು ನಂಬಿದ ಸಹನಾ ಲೆಟರ್‌ನಲ್ಲಿದ್ದ ಮೊಬೈಲ್‌ ನಂಬರ್‌ಗೆ ಕರೆ ಮಾಡಿದ್ದಾಳೆ.

ಬಳಿಕ ನಡೆದಿದ್ದೇ ಬೇರೆ. ಆಕೆಗೆ ಆನ್‌ ಲೈನ್‌ ವಂಚಕರು ಗಿಫ್ಟ್ ಕೂಪನ್‌ ಹೆಸರಲ್ಲಿ ಲೆಟರ್‌ ಕಳುಹಿಸಿ ನಿನಗೆ 11 ಲಕ್ಷ ಬಹುಮಾನ ಬಂದಿದೆ ಎಂದು ತಿಳಿಸಿ ವಿವಿಧ ಶುಲ್ಕಗಳ ಹೆಸರಲ್ಲಿ ಒಟ್ಟು 6,94,200 ರೂ.ಗಳನ್ನು ವಂಚಕರು ಹೇಳಿದ ಬ್ಯಾಂಕ್‌ ಖಾತೆಗೆ ಹಣ ವರ್ಗಾಯಿಸಿ ಕೈ ಸುಟ್ಟು ಕೊಂಡಿದ್ದಾರೆ.

ಸ್ನೇಹಿತರಿಂದಲೂ ಲಕ್ಷ ಲಕ್ಷ ಸಾಲ: 11 ಲಕ್ಷ ಬಹುಮಾನ ಪಡೆಯುವ ಆಸೆಯಿಂದ ತನ್ನ ಸ್ನೇಹಿತರಿಂದಲೂ ಲಕ್ಷಾಂತರ ರೂ., ಸಾಲ ಪಡೆದು ಆನ್‌ಲೈನ್‌ ವಂಚಕರಿಗೆ ನೀಡಿರುವುದಾಗಿ ಸಹನಾ ಸೈಬರ್‌ ಠಾಣೆ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ವಿವರಿಸಿದ್ದಾರೆ. ಅಲ್ಲದೇ ವಂಚಕರು ಆಕೆಗೆ ಆರ್‌ಬಿಐ ಹೆಸರಿನಲ್ಲಿ ಲೆಟರ್‌ ಅನ್ನು ವ್ಯಾಟ್ಸಪ್‌ ಮಾಡಿ ಮೋಸ ಮಾಡಿರುವುದು ಬೆಳಕಿಗೆ ಬಂದಿದೆ.