ಸಂಶೋಧಕರ ಶಿಷ್ಯ ವೇತನ ಮೊತ್ತ ಹೆಚ್ಚಳ

Team Udayavani, Jun 23, 2023, 7:50 AM IST

ನವದೆಹಲಿ: ನಿಮಗೆ ಸ್ನಾತಕೋತ್ತರ ಪದವಿ ಮುಗಿದು ಸಂಶೋಧನೆಯತ್ತ ಹೊರಳುವ ಮನಸ್ಸಿದೆಯೇ? ಹಾಗಿದ್ದರೆ ಕೇಂದ್ರ ಸರ್ಕಾರದ ವತಿಯಿಂದ ಖುಷಿಯ ವಿಚಾರವಿದೆ. ಪಿಎಚ್‌.ಡಿ, ಜ್ಯೂನಿಯರ್‌ ರಿಸರ್ಚ್‌ ಫೆಲೋ, ಸೀನಿಯರ್‌ ರಿಸರ್ಚ್‌ ಫೆಲೋ ಶಿಷ್ಯ ವೇತನವನ್ನು ಆಯಾ ವಿಭಾಗವಾರು ಶೇ.16ರಿಂದ ಶೇ.24ರವರೆಗೆ ಹೆಚ್ಚಿಸಿ ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯ ಆದೇಶ ಹೊರಡಿಸಿದೆ.

ಕೇಂದ್ರ ಸರ್ಕಾರದ ಆದೇಶದ ಪ್ರಕಾರ ಜ್ಯೂನಿಯರ್‌ ರಿಸರ್ಚ್‌ ಫೆಲೋಶಿಪ್‌ಗೆ ಶಿಷ್ಯ ವೇತನವನ್ನು ಹಾಲಿ 31 ಸಾವಿರ ರೂ.ಗಳಿಂದ 37 ಸಾವಿರ ರೂ., ಸೀನಿಯರ್‌ ರಿಸರ್ಚ್‌ ಫೆಲೋಶಿಪ್‌ ಮೊತ್ತವನ್ನು 35 ಸಾವಿರ ರೂ.ಗಳಿಂದ 42 ಸಾವಿರ ರೂ., ರಿಸರ್ಚ್‌ ಅಸಿಸ್ಟೆಂಟ್‌ ಗ್ರೇಡ್‌ 1 47 ಸಾವಿರ ರೂ.ಗಳಿಂದ 58 ಸಾವಿರ ರೂ., ರಿಸರ್ಚ್‌ ಅಸಿಸ್ಟೆಂಟ್‌ ಗ್ರೇಡ್‌ 2 49 ಸಾವಿರ ರೂ.ಗಳಿಂದ 61 ಸಾವಿರ ರೂ., ರಿಸರ್ಚ್‌ ಅಸಿಸ್ಟೆಂಟ್‌ ಗ್ರೇಡ್‌ 3 54 ಸಾವಿರ ರೂ.ಗಳಿಂದ 63 ಸಾವಿರ ರೂ.ಗಳವರೆಗೆ ಶಿಷ್ಯ ವೇತನ ಹೆಚ್ಚಿಸಲು ತೀರ್ಮಾನಿಸಲಾಗಿದೆ. ಈ ಮೊತ್ತವು ಪ್ರತಿ ತಿಂಗಳು ನೀಡಲಾಗುತ್ತಿದ್ದು, ಪರಿಷ್ಕೃತ ನಿರ್ಧಾರ ಪ್ರಸಕ್ತ ವರ್ಷದ ಜ.1ರಿಂದ ಪೂರ್ವಾನ್ವಯವಾಗಲಿದೆ.