Team India; ಅಭ್ಯಾಸ ಆರಂಭಿಸಿದ ಚೇತೇಶ್ವರ್‌ ಪೂಜಾರ

Team Udayavani, Jun 25, 2023, 8:15 AM IST

ಹೊಸದಿಲ್ಲಿ: ಟೀಮ್‌ ಇಂಡಿಯಾದಿಂದ ಹೊರಬಿದ್ದ ಒಂದೇ ದಿನದಲ್ಲಿ ಚೇತೇಶ್ವರ್‌ ಪೂಜಾರ ಕ್ರಿಕೆಟ್‌ ಅಭ್ಯಾಸ ಆರಂಭಿಸಿದ್ದಾರೆ. ಇದಕ್ಕೆ ಸಂಬಂಧಿಸಿದ 9 ನಿಮಿಷಗಳ ವೀಡಿಯೋ ಒಂದನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಾಕಿದ್ದಾರೆ. ಇದರಲ್ಲಿ ಬ್ಯಾಟಿಂಗ್‌ ಅಭ್ಯಾಸದ ದೃಶ್ಯಗಳಿವೆ.

ಕಳೆದ ಐಸಿಸಿ ಟೆಸ್ಟ್‌ ವಿಶ್ವಕಪ್‌ ಫೈನಲ್‌ನಲ್ಲಿ ಆಸ್ಟ್ರೇಲಿಯ ವಿರುದ್ಧ ಬ್ಯಾಟಿಂಗ್‌ ವೈಫ‌ಲ್ಯ ಅನುಭವಿಸಿದ ಬಳಿಕ ಪೂಜಾರ ತೀವ್ರ ಟೀಕೆಗೆ ಒಳಗಾಗಿದ್ದರು. ಇಂಗ್ಲಿಷ್‌ ಕೌಂಟಿಯಲ್ಲಿ ರನ್‌ ಪ್ರವಾಹ ಹರಿಸಿದರೂ ಓವಲ್‌ನಲ್ಲಿ ನಡೆದ ಫೈನಲ್‌ನಲ್ಲಿ ಪೂಜಾರ ಕೈಕೊಟ್ಟಿದ್ದರು. ಭಾರತದ ಸೋಲಿಗೆ ಪೂಜಾರ ಅವರ ವೈಫ‌ಲ್ಯವೂ ಒಂದು ಕಾರಣವಾಗಿತ್ತು.

ಪೂಜಾರ ಅವರನ್ನು ವೆಸ್ಟ್‌ ಇಂಡೀಸ್‌ ಪ್ರವಾಸದಿಂದ ಕೈಬಿಟ್ಟ ವಿದ್ಯಮಾನ ವನ್ನು ನಾನಾ ರೀತಿಗಳಲ್ಲಿ ಅರ್ಥೈಸಿ ಕೊಳ್ಳಲಾಗುತ್ತಿದೆ. ವಿಶ್ವಕಪ್‌ ಫೈನಲ್‌ ಪಂದ್ಯವೇ ಇವರ ಕೊನೆಯ ಟೆಸ್ಟ್‌ ಎಂಬ ರೀತಿಯಲ್ಲಿ ಬಿಂಬಿಸಲಾಗುತ್ತಿದೆ. ಆದರೆ ಚೇತೇಶ್ವರ್‌ ಪೂಜಾರ ಅವರ ತಂದೆ ಹಾಗೂ ಕೋಚ್‌ ಕೂಡ ಆಗಿರುವ ಅರವಿಂದ್‌ ಪೂಜಾರ ಈ ಕುರಿತು ಪ್ರತಿಕ್ರಿಯಿಸಲು ನಿರಾಕರಿಸಿದ್ದಾರೆ.

🏏 ❤️ pic.twitter.com/TubsOu3Fah

— Cheteshwar Pujara (@cheteshwar1) June 24, 2023

“ಮಾನಸಿಕವಾಗಿ ಚೇತೇಶ್ವರ್‌ ಬಹಳ ಬಲಿಷ್ಠವಾಗಿದ್ದಾನೆ. ಆಯ್ಕೆ ಕುರಿತಂತೆ ನಾನು ಯಾವುದೇ ಪ್ರತಿಕ್ರಿಯೆ ನೀಡುವುದಿಲ್ಲ. ಅವನೀಗ ದುಲೀಪ್‌ ಟ್ರೋಫಿ ಪಂದ್ಯಾವಳಿಗಾಗಿ ಅಭ್ಯಾಸ ನಡೆಸುತ್ತಿದ್ದಾನೆ. ಅವನೇಕೆ ಟೀಮ್‌ ಇಂಡಿಯಾಕ್ಕೆ ಮರಳಬಾರದು… ಆತನ ತಂದೆ ಹಾಗೂ ಕೋಚ್‌ ಆಗಿ ನಾನು ಈ ಪ್ರಶ್ನೆಯನ್ನು ಕೇಳಬಯಸುತ್ತೇನೆ’ ಎಂಬುದಾಗಿ ಅರವಿಂದ್‌ ಪೂಜಾರ ಮಾಧ್ಯಮದವರಲ್ಲಿ ಹೇಳಿದರು.