Maharashtra: ಡಬಲ್‌ ಗೇಮ್‌ ಆಡಿದ್ದ ಶರದ್‌ ಪವಾರ್‌: ದೇವೇಂದ್ರ ಫ‌ಡ್ನವೀಸ್‌

Team Udayavani, Jun 30, 2023, 7:18 AM IST

ಮುಂಬಯಿ: “2019ರಲ್ಲಿ ಎನ್‌ಸಿಪಿ ಅಧ್ಯಕ್ಷ ಶರದ್‌ ಪವಾರ್‌ ಅವರು ಬಿಜೆಪಿ ಜತೆ ಸೇರಿಕೊಂಡು ಸರಕಾರ ರಚನೆಗೆ ಮುಂದಾಗಿದ್ದರು. ಆದರೆ ಕೊನೆ ಕ್ಷಣದಲ್ಲಿ ಡಬಲ್‌ ಗೇಮ್‌ ಆಡಿದರು’ ಎಂದು ಮಹಾರಾಷ್ಟ್ರ ಡಿಸಿಎಂ ದೇವೇಂದ್ರ ಫ‌ಡ್ನವೀಸ್‌ ದೂರಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “2019ರಲ್ಲಿ ಕಾಂಗ್ರೆಸ್‌ನೊಂದಿಗೆ ಸೇರಿಕೊಂಡು ಸರಕಾರ ರಚಿಸಲು ಉದ್ಧವ್‌ ಠಾಕ್ರೆ ಮಾತುಕತೆ ನಡೆಸುತ್ತಿದ್ದರು. ಈ ವೇಳೆ ಎನ್‌ಸಿಪಿಯ ಕೆಲವರು ಬಿಜೆಪಿಯನ್ನು ಸಂಪರ್ಕಿಸಿದರು. ಸ್ಥಿರ ಸರಕಾರದ ರಚನೆಗಾಗಿ ಬಿಜೆಪಿಯನ್ನು ಬೆಂಬಲಿಸುವುದಾಗಿ ಹೇಳಿದರು. ನಂತರ ಶರದ್‌ ಪವಾರ್‌ ಅವರೊಂದಿಗೆ ಸಭೆ ನಡೆಯಿತು,’ ಎಂದಿದ್ದಾರೆ.

“ಸಭೆಯಲ್ಲಿ ಸರಕಾರ ರಚಿಸಲು ನಿರ್ಧರಿಸಿದ್ದು, ಅದರ ಕಾರ್ಯವಿಧಾನದ ಬಗ್ಗೆ ತೀರ್ಮಾನಿಸಲಾಯಿತು. ಸರಕಾರ ರಚಿಸಲು ಎಲ್ಲಾ ಅಧಿಕಾರವನ್ನು ನನಗೆ ಮತ್ತು ಅಜಿತ್‌ ಪವಾರ್‌ ಅವರಿಗೆ ನೀಡಲಾಯಿತು. ಈ ನಿಟ್ಟಿನಲ್ಲಿ ನಾವು ಎಲ್ಲಾ ಸಿದ್ಧತೆಗಳನ್ನು ನಡೆಸಿದೆವು,’ ಎಂದು ವಿವರಿಸಿದ್ದಾರೆ.

“ಪ್ರಮಾಣವಚನ ಸ್ವೀಕರಿಸುವ 3-4 ದಿನಗಳ ಮೊದಲು ಶರದ್‌ ಪವಾರ್‌ ಉಲ್ಟಾ ಹೊಡೆದರು. ಅಜಿತ್‌ ಪವಾರ್‌ಗೆ ಬೇರೆ ಆಯ್ಕೆ ಇರಲಿಲ್ಲ. ಮೈತ್ರಿಯನ್ನು ಮುರಿಯುವ ಮೂಲಕ ಉದ್ಧವ್‌ ಠಾಕ್ರೆ ಬೆನ್ನಿಗೆ ಚೂರಿ ಹಾಕಿದರು. ಇನ್ನೊಂದೆಡೆ, ಶರದ್‌ ಪವಾರ್‌ ಡಬಲ್‌ ಗೇಮ್‌ ಆಡಿದರು,’ ಎಂದು ಫ‌ಡ್ನವೀಸ್‌ ವಾಗ್ಧಾಳಿ ಮಾಡಿದ್ದಾರೆ.