ಟ್ವಿಟರ್‌ ಪರ್ಯಾಯ “ಥ್ರೆಡ್ಸ್‌’ ನಾಳೆ ಲಗ್ಗೆ?

Team Udayavani, Jul 5, 2023, 8:00 AM IST

ಲಂಡನ್‌: ಟ್ವಿಟರ್‌ಗೆ ಪರ್ಯಾಯವಾಗಿ ಇದೇ ಗುರುವಾರ ಮೆಟಾ ಒಡೆತನದ “ಥ್ರೆಡ್ಸ್‌’ ಸಾಮಾಜಿಕ ಜಾಲತಾಣಕ್ಕೆ ಲಗ್ಗೆ ಇಡಲಿದೆ ಎಂದು ವರದಿಗಳು ತಿಳಿಸಿವೆ. ಈ ಮೂಲಕ ಎಲಾನ್‌ ಮಸ್ಕ್ ಮಾಲೀಕತ್ವದ ಟ್ವಿಟರ್‌ಗೆ ಪ್ರತಿಸ್ಪರ್ಧೆ ಒಡ್ಡಲು ಮಾರ್ಕ್‌ ಜುಗರ್‌ಬುರ್ಗ್‌ ಕಂಪನಿ ಸಿದ್ಧವಾಗಿದೆ.

ಆ್ಯಪಲ್‌ ಆ್ಯಪ್‌ ಸ್ಟೋರ್‌ನಲ್ಲಿ ಆ್ಯಪ್‌ಗಳ ಪಟ್ಟಿಯಲ್ಲಿ “ಥ್ರೆಡ್ಸ್‌’ ಕಾಣಿಸಿಕೊಂಡಿದೆ. ಇದನ್ನು “ಟೆಕ್ಸ್ಟ್ ಆಧಾರಿತ ಸಂಭಾಷಣೆ ಆ್ಯಪ್‌’ ಎಂದು ಹೆಸರಿಸಲಾಗಿದೆ. ಇದನ್ನು ಇನ್ಸ್‌ಸ್ಟಾಗ್ರಾಂನೊಂದಿಗೆ ಲಿಂಕ್‌ ಮಾಡಬಹುದಾಗಿದೆ.
“ಇಂದು ನೀವು ಕಾಳಜಿ ವಹಿಸುವ ವಿಷಯಗಳಿಂದ ಹಿಡಿದು ನಾಳೆ ಟ್ರೆಂಡಿಂಗ್‌ ಆಗುವ ವಿಷಯಗಳವರೆಗೆ ಎಲ್ಲವನ್ನೂ ಚರ್ಚಿಸಲು ಹಾಗೂ ಸಮುದಾಯಗಳನ್ನು ಒಗ್ಗೂಡಿಸಲು ಥ್ರೆಡ್ಸ್‌ ವೇದಿಕೆಯಾಗಿದೆ,’ ಎಂದು ಅದರಲ್ಲಿ ವಿವರಿಸಲಾಗಿದೆ.

ಇನ್ಸ್‌ಸ್ಟಾಗ್ರಾಂ ಬಳಕೆದಾರರು ತಮ್ಮ ಯೂಸರ್‌ ನೇಮ್‌ಗಳನ್ನೇ “ಥ್ರೆಡ್ಸ್‌’ ಆ್ಯಪ್‌ನಲ್ಲಿ ಬಳಸಬಹುದು ಮತ್ತು ಇದೇ ಖಾತೆಯನ್ನು ಮುಂದುವರಿಸಬಹುದು ಎನ್ನಲಾಗಿದೆ. ಆದರೆ ಈ ಕುರಿತು ಮೆಟಾ ಇನ್ನೂ ಪ್ರತಿಕ್ರಿಯಿಸಿಲ್ಲ.
ಈಗಾಗಲೇ “ಥ್ರೆಡ್ಸ್‌’ ಕುರಿತು ಎಲಾನ್‌ ಮಸ್ಕ್ ಮತ್ತು ಮಾರ್ಕ್‌ ಜುಗರ್‌ಬುರ್ಗ್‌ ನಡುವೆ ಸಾಮಾಜಿಕ ಜಾಲತಾಣದಲ್ಲಿ ಒಂದು ಸುತ್ತಿನ ವಾಕ್ಸಮರ ನಡೆದಿದೆ.