Accident: ಪೊಲೀಸ್‌ ವಾಹನ ಢಿಕ್ಕಿ; 8 ವರ್ಷದ ಮಗಳು ಸಾವು, ತಾಯಿ ಗಂಭೀರ; ಭುಗಿಲೆದ್ದ ಆಕ್ರೋಶ

Team Udayavani, Jul 6, 2023, 1:16 PM IST

ಚೆನ್ನೈ: ಪೊಲೀಸ್‌ ವಾಹನ ಢಿಕ್ಕಿಯಾಗಿ 8 ವರ್ಷದ ಬಾಲಕಿ ಮೃತಪಟ್ಟಿರುವ ಘಟನೆ ವಿರುದ್ಧ ಆಕ್ರೋಶ ಭುಗಿಲೆದ್ದಿದೆ.

ತಮಿಳುನಾಡಿನ ತಿರುಪ್ಪೂರ್ ಜಿಲ್ಲೆಯ ಕಂಗಯಂ ರಸ್ತೆಯಲ್ಲಿ ಈ ಘಟನೆ ನಡೆದಿದ್ದು, ತಾಯಿ ರಾಜೇಶ್ವರಿ ತನ್ನ ಮಗಳು ದಿವ್ಯದರ್ಶಿನಿಯೊಂದಿಗೆ ಶಾಲೆಯಿಂದ ವಾಪಾಸ್‌ ಆಗುತ್ತಿದ್ದರು. ಮಗಳನ್ನು ತನ್ನ ಸ್ಕೂಟಿಯಲ್ಲಿ ಮನೆಗೆ ಕರೆ ತರುತ್ತಿದ್ದ ವೇಳೆ ದಿವ್ಯದರ್ಶಿನಿ ಅವರ ಬ್ಯಾಗ್‌ ಸ್ಕೂಟರ್‌ ನ ಕೆಳಗೆ ಬಿದ್ದಿದೆ. ಪರಿಣಾಮ ಇಬ್ಬರು ಕೆಳಗೆ ಬಿದ್ದಿದ್ದಾರೆ. ಆದರೆ ಅದೇ ಮಾರ್ಗದಲ್ಲಿ ಬರುತ್ತಿದ್ದ  ಪೊಲೀಸ್‌ ವಾಹನವೊಂದು ಕೆಳಗೆ ಬಿದ್ದಿದ್ದ ತಾಯಿ – ಮಗಳ ಮೇಲೆ ಹರಿದಿದೆ.

ಘಟನೆಯಲ್ಲಿ 8 ರ ವರ್ಷದ ಮಗಳು ಸ್ಥಳದಲ್ಲೇ ಮೃತಪಟ್ಟಿದ್ದು, ತಾಯಿಗೆ ಗಂಭೀರ ಸ್ವರೂಪದ ಗಾಯಗಳಾಗಿವೆ.

ಇದನ್ನೂ ಓದಿ: Btown: ಅಂದು ಹಣಕ್ಕಾಗಿ ಬಟರ್‌ ಚಿಕನ್‌ ಮಾರಾಟ ಮಾಡುತ್ತಿದ್ದವ ಇಂದು ಬಾಲಿವುಡ್‌ನ ಸ್ಟಾರ್‌ ನಟ

ಪೊಲೀಸ್ ವಾಹನದ ಚಾಲಕನನ್ನು ಇಲಾಖೆಯ ಗೃಹರಕ್ಷಕ ದಳದ ವೀರ ಚಿನ್ನ ಕಣ್ಣನ್ ಎಂದು ಗುರುತಿಸಲಾಗಿದ್ದು,  ಈ ಘಟನೆಯ ಬಳಿಕ ಸ್ಥಳೀಯರು ಪ್ರತಿಭಟನೆ ನಡೆಸಿ ರಸ್ತೆ ಬ್ಲಾಕ್‌  ಮಾಡಿದ್ದಾರೆ. ಪರಿಸ್ಥಿತಿ ಅರಿತ ಹಿರಿಯ ಪೊಲೀಸ್‌ ಅಧಿಕಾರಿಗಳು ಘಟನಾ ಸ್ಥಳಕ್ಕೆ ಬಂದು ಪರಿಸ್ಥಿತಿಯನ್ನು ನಿಯಂತ್ರಿಸಿದ್ದಾರೆ.

ಸದ್ಯ ಈ ಕುರಿತು ನಲ್ಲೂರು ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ. ಅಪಘಾತದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದಾರೆ ಮತ್ತು ಗಾಯಗೊಂಡ ತಾಯಿಯ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದಾರೆ.