Landslide ಉಂಟಾಗಿ ಸಂಕಷ್ಟ: ಗದಗದ ಅಮರನಾಥ ಯಾತ್ರಿಗಳೆಲ್ಲರೂ ಸೇಫ್

Team Udayavani, Jul 8, 2023, 4:32 PM IST

ಗದಗ: ಜಿಲ್ಲೆಯಿಂದ ಅಮರನಾಥ ಯಾತ್ರೆ ಕೈಗೊಂಡಿದ್ದ ಜನರು ಶುಕ್ರವಾರ ಉಂಟಾದ ಭೂಕುಸಿತದಲ್ಲಿ ಸಂಕಷ್ಟಕ್ಕೆ ಸಿಲುಕಿದ್ದು, ತೆರಳಿದ್ದ ಎಲ್ಲರೂ ಸುರಕ್ಷಿತವಾಗಿದ್ದಾರೆ ಎಂಬುದು ತಿಳಿದು ಬಂದಿದೆ.

ಜುಲೈ 4ರಂದು ಗದಗದಿಂದ 23 ಜನರ ತಂಡವು ಅಮರನಾಥ ಯಾತ್ರೆ ಕೈಗೊಂಡಿತ್ತು. ಶುಕ್ರವಾರ ಅಮರನಾಥ ದರ್ಶನ ಪಡೆದು ವಾಪಸ್ಸಾಗುವ ವೇಳೆ ಗುಡ್ಡ ಕುಸಿತ ಉಂಟಾಗಿ, ರಸ್ತೆ ಮಧ್ಯೆ ಸಿಲುಕಿ ಸಂಕಷ್ಟಕ್ಕೀಡಾಗಿದ್ದಾರೆ.

ಅಮರನಾಥ ಯಾತ್ರೆಗೆ ತೆರಳಿದ್ದ 23 ಜನರ ತಂಡವು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಬಿ.ಎಸ್. ನೇಮಗೌಡ ಸಂಪರ್ಕಕ್ಕೆ ದೊರೆತಿದ್ದು, ಅಲ್ಲಿನ ಅಧಿಕಾರಿಗಳ ಜೊತೆಗೂ ಮಾತುಕತೆ ನಡೆಸಿದ್ದಾರೆ.

ಅಮರನಾಥ ಯಾತ್ರೆಗೆ ತೆರಳಿದ್ದ ತಂಡವನ್ನು ಸುರಕ್ಷಿತವಾಗಿ ಗದಗ ನಗರಕ್ಕೆ ವಾಪಸ್ ತರಲು ಜಿಲ್ಲಾ ಪೊಲೀಸ್ ಇಲಾಖೆ, ಜಿಲ್ಲಾಡಳಿತ ಈಗಾಗಲೇ ತಯಾರಿ ನಡೆಸಿದೆ.