ಗ್ರಾಮಾಡಳಿತಕ್ಕೆ ಅಧಿಕಾರಿಗಳೇ ಇಲ್ಲ!

Team Udayavani, Jul 15, 2023, 6:00 AM IST

ಮಂಗಳೂರು: ಗ್ರಾಮ ಆಡಳಿತಕ್ಕೆ ಬಲ ನೀಡಬೇಕಾದ ಗ್ರಾಮ ಆಡಳಿತ ಅಧಿಕಾರಿಗಳು (ಗ್ರಾಮ ಲೆಕ್ಕಿಗರು-ವಿಎ)ಕರಾವಳಿಯಲ್ಲಿ ಅಗತ್ಯಕ್ಕೆ ತಕ್ಕಷ್ಟು ನಿಯೋಜನೆಯಾಗದೆ ಜನರಿಗೆ ಕಂದಾಯ ಸೇವೆಯೇ ಗಗನ ಕುಸುಮವಾಗುತ್ತಿದೆ!

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಒಟ್ಟು 87 ಹಾಗೂ ಉಡುಪಿ ಜಿಲ್ಲೆಯಲ್ಲಿ 38 ಗ್ರಾಮ ಆಡಳಿತ ಅಧಿಕಾರಿ ಹುದ್ದೆಗೆ ನೇಮಕ ಆಗಿಲ್ಲ. ಹೀಗಾಗಿ ಇಷ್ಟೂ ಕಡೆಯ ಕಂದಾಯ ಸೇವೆಗೆ ತೊಡಕುಂಟಾಗುತ್ತಿದೆ.

ದಕ್ಷಿಣ ಕನ್ನಡ ಜಿಲ್ಲೆಯ ಮೂಡುಬಿದಿರೆ ತಾಲೂಕಿನಲ್ಲಿ 13, ಬಂಟ್ವಾಳ ತಾಲೂಕಿನಲ್ಲಿ 14, ಪುತ್ತೂರು 13, ಕಡಬ 10, ಬೆಳ್ತಂಗಡಿ 15, ಸುಳ್ಯ 6, ಉಳ್ಳಾಲ 3, ಮೂಲ್ಕಿಯಲ್ಲಿ 3 ಆಡಳಿತ ಅಧಿಕಾರಿಗಳ ನೇಮಕವಾಗಿಲ್ಲ. ಉಡುಪಿ ತಾಲೂಕಿನಲ್ಲಿ 4, ಕುಂದಾಪುರದಲ್ಲಿ 9, ಕಾರ್ಕಳದಲ್ಲಿ 9, ಬ್ರಹ್ಮಾವರ 5, ಬೈಂದೂರು 8, ಕಾಪು 1, ಹೆಬ್ರಿ 2 ಆಡಳಿತ ಅಧಿಕಾರಿಗಳಿಲ್ಲ.

ಗ್ರಾಮ ಆಡಳಿತಕ್ಕೆ ಅಧಿಕಾರಿಗಳಿಲ್ಲ !
ಸದ್ಯ ದ. ಕ. ಜಿಲ್ಲೆಯಲ್ಲಿ 238 ಹಾಗೂ ಉಡುಪಿ ಜಿಲ್ಲೆಯಲ್ಲಿ 177 ಮಂದಿ ಕರ್ತವ್ಯದಲ್ಲಿದ್ದಾರೆ. ಯಾವ ಗ್ರಾಮದಲ್ಲಿ ಗ್ರಾಮ ಆಡಳಿತಾಧಿಕಾರಿ ಇಲ್ಲವೋ ಆ ಗ್ರಾಮಕ್ಕೆ ಪ್ರಭಾರ ನೆಲೆಯಲ್ಲಿ ಇವರನ್ನೇ ನಿಯುಕ್ತಿಗೊಳಿಸಲಾಗಿದೆ. ಹೀಗಾಗಿ ಕೆಲವರು 3-4 ಗ್ರಾಮ ಗಳ ಜವಾಬ್ದಾರಿಯನ್ನೂ ನಿರ್ವಹಿಸು ವಂತಾಗಿದೆ. ಇದರಿಂದಾಗಿ ಜನರಿಗೆ ಸೂಕ್ತ ಸಮಯದಲ್ಲಿ ಕಂದಾಯ ಸೇವೆ ಸಿಗುವುದಕ್ಕೆ ಸಮಸ್ಯೆ ಉಂಟಾಗಿದೆ.

ಗ್ರಾಮ ಆಡಳಿತ ಅಧಿಕಾರಿಯು ಕಂದಾಯ ಇಲಾಖೆಯ ಸೇವೆ, ಪ್ರವಾಹ-ಬೆಳೆ ಹಾನಿ ಸಹಿತ ವಿವಿಧ ಸಂದರ್ಭದಲ್ಲಿ ಪರಿಹಾರ ನೀಡುವ ಹಂತದಲ್ಲಿ ಪ್ರಾಥಮಿಕ ವರದಿಗೆ ಅಗತ್ಯವಾಗಿದ್ದಾರೆ. ಕಂದಾಯ ಇಲಾಖೆಯಲ್ಲಿ ಯಾವುದೇ ಸೇವೆಗೆ ಗ್ರಾಮ ಆಡಳಿತ ಅಧಿಕಾರಿಯ ವರದಿಯೇ ಅಗತ್ಯ. ಅವರ ವರದಿ ಇಲ್ಲದಿದ್ದರೆ ಆ ಕಡತ ಮುಂದಕ್ಕೆ ಹೋಗುವುದಿಲ್ಲ. ಉದಾಹರಣೆಗೆ ಮಳೆ ಬಂದು ಮನೆ ಬಿದ್ದಾಗ ಗ್ರಾಮ ಆಡಳಿತ ಅಧಿಕಾರಿ ಮೊದಲ ವರದಿ ನೀಡಬೇಕು. ಗ್ರಾಮದ ಭೂಮಿ ಸರ್ವೆ ನಕ್ಷೆ ಕೂಡ ಅವರಲ್ಲಿರುತ್ತದೆ. ಗ್ರಾಮದ ಸರ್ವೆ ಸಂಖ್ಯೆ, ನಕ್ಷೆ ಬಹುತೇಕ ಗೊತ್ತಿರು ವುದು ಆಡಳಿತಾಧಿಕಾರಿಗೆ.

ಜತೆಗೆ ಜನನ ಮರಣ ನೋಂದಣಾಧಿಕಾರಿಯಾಗಿಯೂ ಅವರು ಕಾರ್ಯ ನಡೆಸಬೇಕಾಗುತ್ತದೆ. ಆದರೆ ಆಡಳಿತಾಧಿಕಾರಿ ಇಲ್ಲದೆ ಜನರಿಗೆ ಈ ಎಲ್ಲ ಸೇವೆ ಪಡೆಯಲು ದೀರ್ಘ‌ ಕಾಯುವಂತಾಗಿದೆ!

ಕಂದಾಯ ಇಲಾಖೆ: ಬಹು ಹುದ್ದೆಗಳು ಖಾಲಿ!
ದಕ್ಷಿಣ ಕನ್ನಡ ಜಿಲ್ಲೆಯ ವಿವಿಧ ತಾಲೂಕಿನಲ್ಲಿ ತಹಶೀ ಲ್ದಾರ್‌ ಗ್ರೇಡ್‌ 2 ಹುದ್ದೆ 10 ಮಂಜೂರಾಗಿದ್ದರೂ 7 ಖಾಲಿ ಇವೆ. ಗ್ರೂಪ್‌ ಡಿಯಲ್ಲಿ 59ರಲ್ಲಿ 48 ಖಾಲಿ ಇವೆ. ಉಡುಪಿಯಲ್ಲಿ ಉಪತಹಶೀಲ್ದಾರ್‌ ಹುದ್ದೆ 4 ಖಾಲಿ ಇವೆ. ಡಿ ಗ್ರೂಪ್‌ 38ರಲ್ಲಿ 24 ಖಾಲಿ ಇವೆ. ಹೀಗೆ ಕಂದಾಯ ಇಲಾಖೆಗೆ ಸಂಬಂಧಿಸಿದ ವಿವಿಧ ಹುದ್ದೆಗಳು ಖಾಲಿ ಇರುವುದರಿಂದ ಜನರಿಗೆ ಸಮಸ್ಯೆ ಆಗುತ್ತಿದೆ.

ಖಾಲಿ ಹುದ್ದೆ ಭರ್ತಿ ಮಾಡಲು ಸರಕಾರ ನಿಯಮಾನುಸಾರ ಕ್ರಮ ಕೈಗೊಳ್ಳಲಿದೆ. ಈ ಬಗ್ಗೆ ಸದ್ಯ ಮಾತುಕತೆ ನಡೆಯುತ್ತಿದ್ದು, ಅಂತಿಮ ತೀರ್ಮಾನವನ್ನು ಸರಕಾರ ಕೈಗೊಳ್ಳಲಿದೆ. ಖಾಲಿ ಇರುವಲ್ಲಿಗೆ ಸಮಸ್ಯೆ ಆಗದಂತೆ ಇತರ ಗ್ರಾಮ ಆಡಳಿತ ಅಧಿಕಾರಿಗಳನ್ನು ಅಧಿಕ ಪ್ರಭಾರದಲ್ಲಿ ನಿಯೋಜಿಸಲಾಗಿದೆ.
-ಮುಲ್ಲೈ ಮುಗಿಲನ್‌, ಜಿಲ್ಲಾಧಿಕಾರಿ, ದ.ಕ.