Adani Group: ಭಾರತದ ಮೊದಲ ಬಹುರಾಷ್ಟ್ರೀಯ ವಿದ್ಯುತ್ ಯೋಜನೆ ಆರಂಭ

Team Udayavani, Jul 15, 2023, 10:02 PM IST

ಢಾಕಾ : ಅದಾನಿ ಗ್ರೂಪ್ ಅಧ್ಯಕ್ಷ ಗೌತಮ್ ಅದಾನಿ ಅವರು ಶನಿವಾರ ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ ಅವರನ್ನು ಭೇಟಿಯಾಗಿ 1,600 ಮೆಗಾವ್ಯಾಟ್ ಅಲ್ಟ್ರಾ ಸೂಪರ್ ಕ್ರಿಟಿಕಲ್ ಗೊಡ್ಡಾ ಪವರ್ ಪ್ಲಾಂಟ್‌ನ ಸಂಪೂರ್ಣ ಲೋಡ್ ಪ್ರಾರಂಭಿಸಿ ದಾಖಲೆಗಳನ್ನು ಹಸ್ತಾಂತರಿಸಿದರು.

“1600 ಮೆಗಾವ್ಯಾಟ್ ಅಲ್ಟ್ರಾ ಸೂಪರ್ ಕ್ರಿಟಿಕಲ್ ಗೊಡ್ಡಾ ಪವರ್ ಪ್ಲಾಂಟ್‌ನ ಪೂರ್ಣ ಲೋಡ್ ಪ್ರಾರಂಭ ಮತ್ತು ಹಸ್ತಾಂತರದ ಕುರಿತು ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ ಅವರನ್ನು ಭೇಟಿಯಾಗಿದ್ದಕ್ಕೆ ಗೌರವವಿದೆ. ಮೂರುವರೆ ವರ್ಷ ದಾಖಲೆ ಸಮಯದಲ್ಲಿ ಸ್ಥಾವರವನ್ನು ಕಾರ್ಯಾರಂಭಿಸಲು ಕೋವಿಡ್ ಅನ್ನು ಧೈರ್ಯದಿಂದ ಎದುರಿಸಿದ ಭಾರತ ಮತ್ತು ಬಾಂಗ್ಲಾದೇಶದ ಸಮರ್ಪಿತ ತಂಡಗಳಿಗೆ ನಾನು ನಮಸ್ಕರಿಸುತ್ತೇನೆ” ಎಂದು ಅದಾನಿ ಟ್ವೀಟ್ ಮಾಡಿದ್ದಾರೆ.

ಅದಾನಿ ಪವರ್ ಜಾರ್ಖಂಡ್‌ನ ಗೊಡ್ಡಾದಲ್ಲಿ 1,600 MW ಥರ್ಮಲ್ ಪವರ್ ಅನ್ನು ಸ್ಥಾಪಿಸಿತ್ತು. ಇದನ್ನು ಬಾಂಗ್ಲಾದೇಶ ವಿದ್ಯುತ್ ಅಭಿವೃದ್ಧಿ ಮಂಡಳಿಗೆ (BPDB) ಮೀಸಲಾದ ಪ್ರಸರಣ ಮಾರ್ಗದ ಮೂಲಕ ಉತ್ಪಾದಿಸುವ ವಿದ್ಯುತ್ ಪೂರೈಸುತ್ತದೆ. ಅದಾನಿ ಪವರ್ ತನ್ನ ಗೊಡ್ಡಾ ಪ್ಲಾಂಟ್ ಸಂಪೂರ್ಣವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಜೂನ್‌ನಲ್ಲಿ ಹೇಳಿತ್ತು.

ಗೊಡ್ಡಾ USCTPP ಯಿಂದ ಬಾಂಗ್ಲಾದೇಶದ ಗ್ರಿಡ್‌ಗೆ ವಿದ್ಯುತ್ ಪೂರೈಕೆಯು ಬಾಂಗ್ಲಾದೇಶದಲ್ಲಿ ಇಂಧನ ಸುರಕ್ಷತೆಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ ಎಂದು ಕಂಪನಿ ಹೇಳಿದೆ.

ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ಭಾರತಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಅದಾನಿ ಬಾಂಗ್ಲಾದೇಶದ ಪ್ರಧಾನಿಯನ್ನು ಭೇಟಿ ಮಾಡಿದ್ದರು.