ಅಧಿಕ ಮಾಸದಲ್ಲಿ ಸಾಮೂಹಿಕ ಶ್ರೀರಾಮ ಮಂತ್ರ ಜಪ: ಪೇಜಾವರ ಶ್ರೀಗಳ ಕರೆ

Team Udayavani, Jul 18, 2023, 7:20 AM IST

ಉಡುಪಿ: ಅಯೋಧ್ಯೆ ಯಲ್ಲಿ ಶ್ರೀರಾಮ ಮಂದಿರ ನಿರ್ಮಾಣದ ಹಿನ್ನೆಲೆಯಲ್ಲಿ ಮಂಗಳವಾರ ಆರಂಭವಾಗುವ ಅಧಿಕ ಮಾಸದಲ್ಲಿ ಸಾಮೂಹಿಕ ಶ್ರೀರಾಮ ನಾಮ ಜಪ ಮಾಡು ವಂತೆ ಪೇಜಾವರ ಮಠಾಧೀಶರಾದ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದರು ವೀಡಿಯೋ ಸಂದೇಶದ ಮೂಲಕ ಕರೆ ನೀಡಿದ್ದಾರೆ.

ಸನಾತನ ಧರ್ಮೀಯರ ಬಹು ಕಾಲದ ಕನಸು ನನಸಾಗುತ್ತಿದೆ. ಅಯೋಧ್ಯೆಯ ಶ್ರೀರಾಮನ ಜನ್ಮಭೂಮಿಯಲ್ಲಿ ಭವ್ಯ ಮಂದಿರ ನಿರ್ಮಾಣವಾಗುತ್ತಿದೆ. ಮುಂದಿನ ಮಕರ ಸಂಕ್ರಮಣದ ಹೊತ್ತಿಗೆ ಅಲ್ಲಿ ಶ್ರೀರಾಮನ ಪ್ರಾಣಪ್ರತಿಷ್ಠೆ ಆಗಲಿದೆ. ಈ ಕಾರ್ಯದಲ್ಲಿ ಎಲ್ಲರಿಗೂ ನೇರವಾಗಿ ಭಾಗವಹಿ ಸಲು ಆಗದೇ ಇರಬಹುದು. ಭಾವನಾತ್ಮಕವಾಗಿ ಪಾಲ್ಗೊಳ್ಳಲು 10 ಕೋಟಿ ರಾಮನಾಮ ಮಂತ್ರದ ಪಠನ ಮಾಡೋಣ. ಜು. 18ರಿಂದ ಅಧಿಕಮಾಸ (ಪುರುಷೋತ್ತಮ ಮಾಸ) ಆರಂಭವಾಗಲಿದ್ದು, ನಾವೆಲ್ಲರೂ ಸಾಧ್ಯವಿರು ಸ್ಥಳಗಳಲ್ಲೆಲ್ಲ ನಿತ್ಯವೂ 10 ನಿಮಿಷ ಸಾಮೂಹಿಕವಾಗಿ ರಾಮನಾಮ ಜಪ ಮಾಡೋಣ ಎಂದು ತಿಳಿಸಿದ್ದಾರೆ.