ಎಮರ್ಜಿಂಗ್‌ ಏಷ್ಯಾ ಕಪ್‌ ಕ್ರಿಕೆಟ್‌: ಭಾರತ-ಪಾಕ್‌ ಫೈನಲ್‌ ಸಮರ

Team Udayavani, Jul 22, 2023, 7:30 AM IST

ಕೊಲಂಬೊ: ಎಮರ್ಜಿಂಗ್‌ ಏಷ್ಯಾ ಕಪ್‌ ಕ್ರಿಕೆಟ್‌ ಕೂಟದಲ್ಲಿ ಶುಕ್ರವಾರ ನಡೆದ ಸೆಮಿಫೈನಲ್‌ ಹೋರಾಟದಲ್ಲಿ ಭಾರತ ಮತ್ತು ಪಾಕಿಸ್ಥಾನ “ಎ’ ತಂಡಗಳು ಗೆಲುವು ಸಾಧಿಸಿ ಫೈನಲಿಗೇರಿವೆ. ರವಿವಾರ ನಡೆಯುವ ಫೈನಲ್‌ನಲ್ಲಿ ಈ ಎರಡು ತಂಡಗಳು ಪ್ರಶಸ್ತಿಗಾಗಿ ಸೆಣಸಾಟ ನಡೆಸಲಿವೆ. ಈ ಪಂದ್ಯ ಮಧ್ಯಾಹ್ನ 2 ಗಂಟೆಗೆ ಆರಂಭವಾಗಲಿದೆ.

ಭಾರತ “ಎ’ಗೆ ಗೆಲುವು
ಎರಡನೇ ಸೆಮಿಫೈನಲ್‌ ಪಂದ್ಯದಲ್ಲಿ ಭಾರತ “ಎ’ ತಂಡವು ಬಾಂಗ್ಲಾದೇಶ “ಎ’ ತಂಡವನ್ನು 51 ರನ್ನುಗಳಿಂದ ಸೋಲಿಸಲು ಯಶಸ್ವಿಯಾಗಿದೆ. ಮೊದಲು ಬ್ಯಾಟಿಂಗ್‌ ಮಾಡಿದ ಭಾರತ “ಎ’ ತಂಡವು ನಾಯಕ ಯಶ್‌ ಧುಲ್‌ ಅವರ ಅರ್ಧಶತಕ ಹಾಗೂ ಅಭಿಷೇಕ್‌ ಶರ್ಮ ಅವರ 34 ರನ್‌ ನೆರವಿನಿಂದ 49.1 ಓವರ್‌ಗಳಲ್ಲಿ 211 ರನ್ನಿಗೆ ಆಲೌಟಾಯಿತು. ಮಹೆದಿ ಹಸನ್‌, ತಂಝೆಮ್‌ ಹಸನ್‌ ಮತ್ತು ರಕಿಬುಲ್‌ ಹಸನ್‌ ತಲಾ ಎರಡು ವಿಕೆಟ್‌ ಕಿತ್ತರು.

ಬಾಂಗ್ಲಾದ ಆರಂಭ ಉತ್ತಮವಾಗಿತ್ತು. ಆರಂಭಿಕರಾದ ಮೊಹಮ್ಮದ್‌ ನೈಮ್‌ ಮತ್ತು ತಂಝಿದ್‌ ಹಸನ್‌ ಮೊದಲ ವಿಕೆಟಿಗೆ 12.4 ಓವರ್‌ಗಳಲ್ಲಿ 70 ರನ್‌ ಪೇರಿಸಿದಾಗ ಬಾಂಗ್ಲಾ ಗೆಲ್ಲುವ ಸಾಧ್ಯತೆ ಹೆಚ್ಚಿತ್ತು. ಆದರೆ ಈ ಜೋಡಿ ಮುರಿದ ಬಳಿಕ ತಂಡ ಕುಸಿಯತೊಡಗಿತ್ತು. ಭಾರತೀಯ ಬೌಲರ್‌ಗಳು ಮೇಲುಗೈ ಸಾಧಿಸಿದ್ದರಿಂದ ಬಾಂಗ್ಲಾ 34.2 ಓವರ್‌ಗಳಲ್ಲಿ 160 ರನ್ನಿಗೆ ಆಲೌಟಾಯಿತು.

ಪಾಕಿಸ್ಥಾನಕ್ಕೆ ಜಯ
ಇನ್ನೊಂದು ಸೆಮಿಫೈನಲ್‌ ಪಂದ್ಯದಲ್ಲಿ ಪಾಕಿಸ್ಥಾನ “ಎ’ ತಂಡವು ಶ್ರೀಲಂಕಾ “ಎ’ ತಂಡವನ್ನು 60 ರನ್ನುಗಳಿಂದ ಸೋಲಿಸಿ ಫೈನಲ್‌ ಹಂತಕ್ಕೇರಿದೆ. ಮೊದಲು ಬ್ಯಾಟಿಂಗ್‌ ಮಾಡಿದ ಪಾಕಿಸ್ಥಾನ “ಎ’ ತಂಡವು ಒಮೈರ್‌ ಯೂಸುಫ್ (88) ಮತ್ತು ಮೊಹಮ್ಮದ್‌ ಹ್ಯಾರಿಸ್‌ (52) ಅವರ ಅರ್ಧಶತಕದಿಂದಾಗಿ 50 ಓವರ್‌ಗಳಲ್ಲಿ 322 ರನ್‌ ಗಳಿಸಿ ಆಲೌಟಾಯಿತು. ಇದಕ್ಕುತ್ತರವಾಗಿ ಅರ್ಷದ್‌ ಇಕ್ಬಾಲ್‌ ಅವರ ದಾಳಿಗೆ ಕುಸಿದ ಶ್ರೀಲಂಕಾ “ಎ’ ತಂಡವು 45.4 ಓವರ್‌ಗಳಲ್ಲಿ 262 ರನ್ನಿಗೆ ಆಲೌಟಾಗಿ ಸೋಲನ್ನು ಒಪ್ಪಿಕೊಂಡಿತು. ಅವಿಷ್ಕಾ ಫೆರ್ನಾಂಡೊ ಮತ್ತು ಸಹಾನ್‌ ಅರಚ್ಚಿಗೆ ಅವರು ತಲಾ 97 ರನ್‌ ಗಳಿಸಿದ್ದರು. ಬಿಗು ದಾಳಿ ಸಂಘಟಿಸಿದ ಅರ್ಷದ್‌ ಇಕ್ಬಾಲ್‌ ತನ್ನ 7.4 ಓವರ್‌ಗಳ ದಾಳಿಯಲ್ಲಿ 37 ರನ್ನಿಗೆ 5 ವಿಕೆಟ್‌ ಕಿತ್ತು ಗೆಲುವಿನ ರೂವಾರಿಯಾಗಿ ಮೂಡಿಬಂದರು.