ರಸ್ತೆಯಲ್ಲಿ 10 ಕೋಟಿ ರೂ. ನಕಲಿ ನೋಟುಗಳು ಪತ್ತೆ!

Team Udayavani, Jul 26, 2023, 1:40 PM IST

ಬೆಂಗಳೂರು: ತಲಘಟ್ಟಪುರ ಠಾಣೆ ವ್ಯಾಪ್ತಿಯ ನೈಸ್‌ ರಸ್ತೆಯ ಬಳಿ 2,000 ರೂ. ಮುಖಬೆಲೆಯ ಬಣ್ಣದ ನಕಲಿ ನೋಟುಗಳು ಪತ್ತೆಯಾಗಿದ್ದು, ಈ ಬಗ್ಗೆ ಪ್ರಕರಣ ದಾಖಲಾಗಿದೆ.

ಕನಕಪುರ ರಸ್ತೆಗೆ ಹೊಂದಿಕೊಂಡಿರುವ ನೈಸ್‌ ರಸ್ತೆ ಬಳಿಯ ಪೊದೆಯಲ್ಲಿ ಒಂದು ಸೂಟ್‌ಕೇಸ್‌ ಮತ್ತು ಎರಡು ರಟ್ಟಿನ ಬಾಕ್ಸ್‌ ಗಳಲ್ಲಿ 2 ಸಾವಿರ ರೂ. ಮುಖ ಬೆಲೆಯ ನೋಟುಗಳ ಕಂತೆಗಳು ಪತ್ತೆಯಾಗಿವೆ. ಅದನ್ನು ಪರಿಶೀಲಿಸಿದ ಸ್ಥಳೀಯರು ನಕಲಿ ಎಂಬುದು ಗೊತ್ತಾಗಿ, ಅನುಮಾನಗೊಂಡು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಬಳಿಕ ಸ್ಥಳಕ್ಕೆ ಭೇಟಿ ನೀಡಿ 2,000 ಮುಖಬೆಲೆಯ ಜೆರಾಕ್ಸ್‌ ನೋಟುಗಳನ್ನು ವಶಕ್ಕೆ ಪಡೆಯಲಾಗಿದೆ. ಅವುಗಳ ಒಟ್ಟು ಮೊತ್ತ 10 ಕೋಟಿ ರೂ. ಎಂದು ಅಂದಾಜಿಸಲಾಗಿದೆ. ನಕಲಿ ಮಾಡಲೆಂದು ನಕಲಿ ನೋಟುಗಳ ಮುದ್ರಿಸಲಾಗಿದೆ ಎಂಬುದು ಗೊತ್ತಾಗಿದೆ.

ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ಹೇಳಿದರು. ತಲಘಟ್ಟಪುರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.