ಸ್ಯಾಟಲೈಟ್‌ ಇಂಟರ್‌ನೆಟ್‌: ಮೊದಲ ಹೆಜ್ಜೆ

Team Udayavani, Jul 27, 2023, 7:03 AM IST

ಇಡೀ ಜಗತ್ತು ಉಪ್ರಗಹ ಆಧಾರಿತ ಸಂವಹನ ವ್ಯವಸ್ಥೆಯ ಮೇಲೆ ಅವಂಬಿತವಾಗುತ್ತಿದೆ. ಭಾರತವೂ ಇದರಿಂದ ಹೊರ ಉಳಿದಿಲ್ಲ. ಇದೀಗ ಭಾರತವೂ ಗುಜರಾತ್‌ ಹಾಗೂ ತಮಿಳುನಾಡಿನಲ್ಲಿ ಕಡಿಮೆ ಎತ್ತರದ ಭೂಕಕ್ಷೆ (ಲಿಯೋ- ಲೋ ಅರ್ಥ್ ಆರ್ಬಿಟ್‌)ಯಲ್ಲಿ ಸ್ಯಾಟಲೈಟ್‌ ನೆಟ್‌ವರ್ಕ್‌ ಕೇಂದ್ರಗಳ ಸ್ಥಾಪನೆಗೆ ಮುಂದಾಗಿದೆ. ಇದರಂತೆ ಗುಜರಾತ್‌ನಲ್ಲಿ ದೇಶದ ಮೊದಲ ಸ್ಯಾಟಲೈಟ್‌ ನೆಟ್‌ವರ್ಕ್‌ ಪೋರ್ಟ್‌ಲ್‌ ಸೈಟ್‌ ನಿರ್ಮಾಣದ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಏನಿದು ಯೋಜನೆ ? ಎಂಬುದರ ಮಾಹಿತಿ ಇಲ್ಲಿದೆ.

ಏನು ಪ್ರಯೋಜನ ?
lಕಡಿಮೆ ದರದಲ್ಲಿ ಸುರಕ್ಷಿತ ಹಾಗೂ ನಿರಂತರ ಇಂಟರ್‌ನೆಟ್‌ ಲಭ್ಯ.
lಸರಕಾರ, ಶಾಲಾ-ಕಾಲೇಜುಗಳು, ಕಂಪೆನಿಗಳಿಗೆ ಅತೀ ವೇಗದ ಹಾಗೂ ಕಡಿಮೆ ದರದಲ್ಲಿ ಇಂಟರ್‌ನೆಟ್‌ ಸೇವೆ ಲಭ್ಯ.
lಡಿಜಿಟಲ್‌ ಇಂಡಿಯಾ ಯೋಜನೆಯಡಿ ಭಾರತದಾದ್ಯಂತ ಹಳ್ಳಿಗಳು, ಜಿಲ್ಲಾ ಪಂಚಾಯತ್‌ಗಳು, ಸ್ಥಳೀಯಾಡಳಿತಗಳಿಗೆ, ಸರಕಾರದ ವಿವಿಧ ಇಲಾಖೆಗಳಿಗೆ ಕೈಗೆಟಕುವ ದರದಲ್ಲಿ ನಿರಂತರ ಇಂಟರ್‌ನೆಟ್‌ ಸೇವೆ ಒದಗಿಸಲು ಸಹಾಯವಾಗಲಿದೆ.
lಈ ಯೋಜನೆಯಿಂದ ಅಂದಾಜು 500 ವಿವಿಧ ಉದ್ಯೋಗಾವಕಾಶಗಳು ದೊರೆಯಲಿದೆ.

ಯಾರು ?
ಗುಜರಾತ್‌ ಸರಕಾರ, ಭಾರತೀಯ ವಿಜ್ಞಾನ ಮತ್ತು ತಂತ್ರಜ್ಞಾನ ವಿಭಾಗವು ಲಂಡನ್‌ ಮೂಲದ ಒನ್‌ವೆಬ್‌ ಇಂಡಿಯಾ ಟೆಲಿ ಕಮ್ಯುನಿಕೇಶನ್‌ನ ಕಂಪೆನಿಯೊಂದಿಗೆ ಈ ನೆಟ್‌ವರ್ಕ್‌ ಪೋರ್ಟಲ್‌ ಅನ್ನು ನಿರ್ಮಾಣ ಮಾಡಲು ಒಪ್ಪಂದ
ಮಾಡಿಕೊಂಡಿದೆ.

ಎಲ್ಲಿ ?
ಗುಜರಾತ್‌ನ ಮೆಹಸಾಣಾ ಜಿಲ್ಲೆಯ ಓಟಾನಾದಲ್ಲಿ

– ವಿಸ್ತಾರವಾದ ಜಾಗದಲ್ಲಿ 20 ದೊಡ್ಡ ಆ್ಯಂಟೆನಾಗಳನ್ನು ಅಳವಡಿಸಲಾಗುವುದು.
- ಮೊದಲ ಹಂತದ ನಿರ್ಮಾಣಕ್ಕೆ 100 ಕೋಟಿ ರೂ. ವೆಚ್ಚ ಅಂದಾಜಿಸಲಾಗಿದೆ.
- 20ರಿಂದ 25 ಎಕ್ರೆ: ಅಂದಾಜಿಸಲಾಗಿರುವ ಜಾಗ

ಲೋ ಅರ್ಥ್ ಆರ್ಬಿಟ್‌ (ಲಿಯೋ) ಸಿಗ್ನಲ್‌ ಮತ್ತು ಡಾಟಾ ಡೌನ್‌ಲಿಂಕ್‌, ಅಪ್‌ಲಿಂಕ್‌ಗಳ ಬೇಸ್‌ ಸ್ಟೇಶನ್‌ ಆಗಿ ಈ ಲಿಯೋ ಕಾರ್ಯನಿರ್ವಹಿಸಲಿದೆ. ಸ್ಯಾಟಲೈಟ್‌ ಟ್ರ್ಯಾಕಿಂಗ್‌ ಆ್ಯಂಟೆನಾ ವ್ಯವಸ್ಥೆಯ ಮೂಲಕ ಡಾಟಾವನ್ನು ಪ್ರಸರಣ ಮಾಡಲಿದೆ.

ಒನ್‌ವೆಬ್‌
ಲಂಡನ್‌ ಮೂಲದ ಕಂಪೆನಿಯಾದ ಒನ್‌ವೆಬ್‌ ಭೂಮಿಯ ಮೇಲೆ ಕಡಿಮೆ ಎತ್ತರದ ವ್ಯವಸ್ಥೆಯಲ್ಲಿ ಸ್ಯಾಟಲೈಟ್‌ ಆಧಾರಿತ ಜಾಗತಿಕ ಸಂವಹನ ವ್ಯವಸ್ಥೆಯನ್ನು ಸ್ಥಾಪಿಸಲು ಕಾರ್ಯ ನಿರ್ವಹಿಸುತ್ತಿರುವ ಕಂಪೆನಿ. ಇದು ಈಗಾಗಲೇ 648 ಸ್ಯಾಟಲೈಟ್‌ಗಳನ್ನು ಹೊಂದಿದೆ. ಯುರೋಪ್‌ ಹಾಗೂ ಕೆನಡಾದಲ್ಲಿ ಈ ವ್ಯವಸ್ಥೆಯು ಈಗಾಗಲೇ ಕಾರ್ಯನಿರ್ವಹಿಸುತ್ತಿದೆ. ಒನ್‌ವೆಬ್‌ 27 ದೇಶಗಳೊಂದಿಗೆ 38 ಸ್ಯಾಟಲೈಟ್‌ ನೆಟ್‌ವರ್ಕ್‌ ಪೋರ್ಟ್‌ಲ್‌ಗ‌ಳನ್ನು ಸ್ಥಾಪಿಸಲು ಮಾತುಕತೆ ನಡೆಸಿದೆ.