ಟ್ರಂಪ್‌ ವಿರುದ್ಧ ಮತ್ತೂಂದು ಗಂಭೀರ ಸಾಕ್ಷ್ಯ

Team Udayavani, Jul 29, 2023, 10:23 PM IST

ವಾಷಿಂಗ್ಟನ್‌: ಅಮೆರಿಕ ಮಾಜಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ವಿರುದ್ಧದ ವರ್ಗೀಕೃತ ದಾಖಲೆಗಳನ್ನು ತಪ್ಪಾಗಿ ನಿರ್ವಹಿಸಿದ ಆರೋಪಕ್ಕೆ ಪುಷ್ಟಿ ನೀಡುವ ಮತ್ತೂಂದು ಆರೋಪ ಕೇಳಿಬಂದಿದ್ದು, ಪ್ರಕರಣ ಸಂಬಂಧಿಸಿದ ಸಾಕ್ಷ್ಯ ನಾಶಕ್ಕೆ ಟ್ರಂಪ್‌ ಮುಂದಾಗಿದ್ದರು ಎಂದು ಅಮೆರಿಕ ಕಾನೂನು ಇಲಾಖೆಯ ವಿಶೇಷ ಸಲಹೆಗಾರ ಜ್ಯಾಕ್‌ ಸ್ಮಿತ್‌ ಆರೋಪಿಸಿದ್ದಾರೆ.

ಇತ್ತೀಚೆಗಷ್ಟೇ ನಡೆದ ಸಭೆಯೊಂದರ ಬಳಿಕ ಮಾತನಾಡಿ, ಸರ್ಕಾರಕ್ಕೆ ಸಂಬಂಧಿಸಿದ ಕೆಲ ರಹಸ್ಯ ದಾಖಲೆಗಳನ್ನು ತಮ್ಮೊಂದಿಗೆ ಟ್ರಂಪ್‌ ಕೊಂಡೊಯ್ದಿದ್ದರು. ಅದನ್ನು ಸಾಬೀತು ಪಡಿಸುವ ಕಣ್ಗಾವಲು ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಅಳಿಸಿಹಾಕಲು ತಮ್ಮ ಸಿಬ್ಬಂದಿಗೆ ಸೂಚಿಸಿದ್ದರು ಎಂಬುದು ತಿಳಿದುಬಂದಿದೆ. ಈ ಸಂಬಂಧಿಸಿದ ಸೂಕ್ತ ಸಾಕ್ಷ್ಯ ಸಿಕ್ಕ ಬಳಿಕ ವಿಚಾರ ಸ್ಪಷ್ಟಪಡಿಸುವುದಾಗಿ ಹೇಳಿದ್ದಾರೆ. ಈ ಸಂಬಂಧಿಸಿದಂತೆ ಟ್ರಂಪ್‌ ಕೂಡ ಪ್ರತಿಕ್ರಿಯಿಸಿ ಯಾವುದೇ ದೃಶ್ಯಾವಳಿಗಳನ್ನು ನಾಶಪಡಿಸಿಲ್ಲ, ಎಲ್ಲವನ್ನೂ ಕಾನೂನಿಗೆ ಒಪ್ಪಿಸಲಾಗಿದೆ. ಇದೂ ಕೂಡ ತನ್ನ ವಿರುದ್ಧ ಷಡ್ಯಂತ್ರದ ಭಾಗ ಎಂದಿದ್ದಾರೆ.