ವಿಶ್ವಸಂಸ್ಥೆಯಲ್ಲೂ ಭಾರತ ಭಾಷೆಯಲ್ಲೇ ಭಾಷಣ

Team Udayavani, Jul 29, 2023, 11:58 PM IST

ಹೊಸದಿಲ್ಲಿ: ಭಾರತವು ಹಲವು ಸಮೃದ್ಧ ಭಾಷೆಗ­ಳನ್ನು ಹೊಂದಿದ್ದರೂ, ನಾವು ಅವು ಅಷ್ಟು ಉಪ­ಯೋಗಕ್ಕಿಲ್ಲ ಎಂಬಂತಹ ಮನೋಭಾವ ಹೊಂದಿ­ದ್ದೇವೆ ಎಂದು ಪ್ರಧಾನಿ ನರೇಂದ್ರ ಮೋದಿ ಬೇಸರ ವ್ಯಕ್ತಪಡಿಸಿದ್ದಾರೆ.

ರಾಷ್ಟ್ರೀಯ ಶಿಕ್ಷಣ ನೀತಿ(ಎನ್‌ಇಪಿ)-2020ರ ಮೂರನೇ ವಾರ್ಷಿಕೋತ್ಸವದ ನಿಮಿತ್ತ ಪ್ರಗತಿ ಮೈದಾನದಲ್ಲಿ ಎರಡು ದಿನಗಳ ರಾಷ್ಟ್ರೀಯ ಕಾರ್ಯಕ್ರಮ ಆರಂಭವಾಗಿದೆ. ಇಲ್ಲಿ ಅವರು ಮೇಲಿನಂತೆ ಮಾತನಾಡಿದರು. “ಈ ಮೊದಲು ಇಂಗ್ಲಿಷ್‌ ಮಾತನಾಡಲು ಬರದಿದ್ದರೆ ಅಂಥವರ ಪ್ರತಿಭೆಯನ್ನು ಜನರು ಎಂದೂ ಒಪ್ಪುತ್ತಿ­ರಲಿಲ್ಲ. ಗ್ರಾಮೀಣ ಪ್ರದೇಶದಿಂದ ಬಂದವರು ಈ ಸಮಸ್ಯೆಯನ್ನು ಹೆಚ್ಚು ಅನುಭವಿಸುತ್ತಿದ್ದರು’ ಎಂದರು.

“ವಿಶ್ವಸಂಸ್ಥೆಯಲ್ಲಿ ನಾನು ಭಾರತೀಯ ಭಾಷೆ ಯಲ್ಲೇ ಮಾತನಾಡುತ್ತೇನೆ. ಕೇಳುಗರು ಇದನ್ನು ಅರ್ಥಮಾಡಿಕೊಂಡು, ಚಪ್ಪಾಳೆ ತಟ್ಟಲು ಕೆಲವು ಸಮಯ ತೆಗೆದುಕೊಳ್ಳುತ್ತಾರೆ. ಪರವಾಗಿಲ್ಲ, ಅವರು ಸಮಯ ತೆಗೆದುಕೊಳ್ಳಲಿ’ ಎಂದು ಹೇಳಿದರು. “ಪ್ರಾದೇಶಿಕ ಭಾಷೆಗಳಲ್ಲಿ ಶಿಕ್ಷಣ ನೀಡುವುದಕ್ಕೆ ಎನ್‌ಇಪಿ ಗಮನಹರಿಸುತ್ತದೆ. ಉನ್ನತ ಶಿಕ್ಷಣದವರೆಗೂ ಕೂಡ ಪ್ರಾದೇಶಿಕ ಭಾಷೆಗಳಲ್ಲೇ ಶಿಕ್ಷಣ ಪಡೆಯಬಹುದಾಗಿದೆ’ ಎಂದರು.