ವಿಶ್ವ ಆ್ಯತ್ಲೆಟಿಕ್ಸ್‌ ಭಾರತದ ಮಿಶ್ರ ರಿಲೇ ತಂಡಕ್ಕೆ ಅವಕಾಶ ಕಡಿಮೆ

Team Udayavani, Jul 30, 2023, 11:02 PM IST

ಹೊಸದಿಲ್ಲಿ: ಭಾರತದ 4×400 ಮೀ. ಮಿಶ್ರ ರಿಲೇ ತಂಡ ಮುಂದಿನ ವಿಶ್ವ ಆ್ಯತ್ಲೆ ಟಿಕ್ಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಅವಕಾಶ ವಂಚಿತವಾಗುವ ಸಾಧ್ಯತೆ ದಟ್ಟವಾಗಿದೆ.

ಶ್ರೀಲಂಕನ್‌ ನ್ಯಾಶನಲ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ ರಿಲೇ ತಂಡ ತನ್ನ ರ್‍ಯಾಂಕಿಂಗ್‌ ನಲ್ಲಿ ಸುಧಾರಣೆ ಕಾಣದಿದ್ದುದೇ ಇದಕ್ಕೆ ಕಾರಣ. ಸದ್ಯ ವಿಶ್ವ ರ್‍ಯಾಂಕಿಂಗ್‌ನಲ್ಲಿ ಭಾರತದ ಮಿಶ್ರ ರಿಲೇ ತಂಡ 17ನೇ ಸ್ಥಾನದಲ್ಲಿದೆ.

ಅಗ್ರ 16 ರ್‍ಯಾಂಕಿಂಗ್‌ ತಂಡಗಳಿಗಷ್ಟೇ ವಿಶ್ವ ಆ್ಯತ್ಲೆಟಿಕ್ಸ್‌ನಲ್ಲಿ ಭಾಗವಹಿಸುವ ಅವಕಾಶ ಲಭಿಸುತ್ತದೆ. ರವಿವಾರ ಮಧ್ಯರಾತ್ರಿ ಇದರ ಅಂತಿಮ ಗಡುವು ಮುಗಿಯಲಿದೆ. ಈ ಡೆಡ್‌ಲೈನ್‌ ಮುಗಿದ ಕೂಡಲೇ “ವರ್ಲ್ಸ್‌ ಆ್ಯತ್ಲೆಟಿಕ್ಸ್‌’ ಎಲ್ಲ ರಾಷ್ಟ್ರೀಯ ಆ್ಯತ್ಲೆಟಿಕ್ಸ್‌ ಮಂಡಳಿಗಳನ್ನು ಸಂಪರ್ಕಿಸಿ 16 ತಂಡಗಳನ್ನು ಅಂತಿಮಗೊಳಿಸಲಿದೆ.

ಅಕಸ್ಮಾತ್‌ ಯಾವುದಾದರೊಂದು ತಂಡ ಹಿಂದೆ ಸರಿದರಷ್ಟೇ ಆಗ ಭಾರತಕ್ಕೆ ಅವಕಾಶ ಒದಗಿ ಬರಲಿದೆ. ವಿಶ್ವ ಆ್ಯತ್ಲೆಟಿಕ್ಸ್‌ ಚಾಂಪಿಯನ್‌ಶಿಪ್‌ ಆ. 17ರಂದು ಹಂಗೇರಿಯ ಬುಡಾಪೆಸ್ಟ್‌ನಲ್ಲಿ ಆರಂಭವಾಗಲಿದೆ.