Actrees : ಸಂಬಂಧ ಬೆಳೆಸಿ ಖಾಸಗಿ ವಿಡಿಯೋ ಲೀಕ್; ಖ್ಯಾತ ನಿರ್ಮಾಪಕನ ವಿರುದ್ಧ ನಟಿ ದೂರು

Team Udayavani, Aug 1, 2023, 5:21 PM IST

ಭುವನೇಶ್ವರ: ನಿರ್ಮಾಪಕ ತನ್ನ ಖಾಸಗಿ ಫೋಟೋ ಹಾಗೂ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಲೀಕ್‌ ಮಾಡಿದ ಆರೋಪವನ್ನು ಮಾಡಿ ಖ್ಯಾತ ನಟಿಯೊಬ್ಬರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಒಲಿವುಡ್( ಒಡಿಶಾ ಸಿನಿಮಾರಂಗ) ನಲ್ಲಿ ತನ್ನ ನಟನೆಯಿಂದ ತನ್ನದೇ ಆದ ಛಾಪನ್ನು ಮೂಡಿಸಿರುವ  ನಟಿ ಶೀತಲ್ ಪಾತ್ರ ಒಲಿವುಡ್‌ ರಂಗದ ಖ್ಯಾತ ನಿರ್ಮಾಪಕ ದಯಾನಿಧಿ ಎಂಟರ್ಟೈನ್ಮೆಂಟ್ ನ ಮಾಲೀಕ ದಯಾನಿಧಿ ದಹಿಮಾ ಎಂಬವರ ವಿರುದ್ಧ ಕಿರುಕುಳ, ಬ್ಲ್ಯಾಕ್‌ ಮೇಲ್ ಆರೋಪವನ್ನು ಮಾಡಿದ್ದಾರೆ.‌

ನಟಿ ದಯಾನಿಧಿ ಎಂಟರ್ಟೈನ್ಮೆಂಟ್ ಬ್ಯಾನರ್‌ ನಡಿಯಲ್ಲಿ ಸಿನಿಮಾಗಳನ್ನು ಮಾಡಿದ್ದಾರೆ. ಈ ವೇಳೆ ನಿರ್ಮಾಪಕ ದಯಾನಿಧಿ ದಹಿಮಾ ಹಾಗೂ ನಟಿ ಶೀತಲ್‌ ಆತ್ಮೀಯರಾಗಿದ್ದಾರೆ. ಇಬ್ಬರ ನಡುವಿನ ಆತ್ಮೀಯತೆ ಪ್ರೀತಿಗೆ ತಿರುಗಿದೆ. ಈ ಕ್ಷಣದಲ್ಲಿ ಇಬ್ಬರು ಹಲವು ಕಡೆ ತಿರುಗಾಟ ನಡೆಸಿದ್ದಾರೆ. ಖಾಸಗಿಯಾಗಿ ಕ್ಷಣಗಳನ್ನು ಕಳೆದಿದ್ದಾರೆ.

ನಟಿ ಶೀತಲ್‌ ಅವರಿಗೆ ಇತರ ಸಿನಿಮಾಗಳ ಆಫರ್‌ ಗಳ ಬಂದಿದೆ. ಆದರೆ ಇದಕ್ಕೆ ನಿರ್ಮಾಪಕ ದಯಾನಿಧಿ ವಿರೋಧ ವ್ಯಕ್ತಪಡಿಸಿದ್ದಾರೆ. ನಟಿಗೆ ಬಂದ ಆಫರ್‌ ಗಳನ್ನು ತಾನೇ ತಿರಸ್ಕರಿಸಿ ನಟಿಯನ್ನು ನಿಯಂತ್ರಣದಲ್ಲಿ ಇಡಲು ಯತ್ನಿಸಿದ್ದಾರೆ. ನಿರ್ಮಾಪಕನ ವರ್ತನೆಗೆ ನಟಿ ಬೇಸರಗೊಂಡಿದ್ದಾರೆ. ಈ ವೇಳೆ ನಿರ್ಮಾಪಕ ನಟಿಯ ಬಳಿ ಈ ಹಿಂದೆ ಕೆಲಸ ಮಾಡಿದ ಪ್ರಾಜೆಕ್ಟ್‌ ಗಳ ಹಣವನ್ನು ವಾಪಾಸ್‌ ನೀಡುವಂತೆ ಬೆದರಿಕೆಯನ್ನು ಹಾಕಲು ಶುರು ಮಾಡಿದ್ದಾರೆ.

ನಟಿ ಶೀತಲ್‌ ನಿರ್ಮಾಪಕನ ಬೇಡಿಕೆಗಳನ್ನು ನೀಡಲು ನಿರಾಕರಿಸಿದಾಗ ನಿರ್ಮಾಪಕ ಆಕೆಯ ವಿರುದ್ದ ಅಪ್ರಚಾರ ಮಾಡಲು ಆಕೆಯ ಅರಿವಿಗೆ ಬಾರದೆ ತೆಗೆದ ಖಾಸಗಿ ಫೋಟೋ, ವಿಡಿಯೋಗಳನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಲೀಕ್‌ ಮಾಡಿದ್ದಾರೆ ಎಂದು ಆರೋಪಿಸಿ ನಟಿ ಪೊಲೀಸರಿಗೆ ದೂರು ನೀಡಿದ್ದಾರೆ.

ಸಂಬಂಧದಲ್ಲಿರುವಾಗ ನಟಿಯನ್ನು ಆರೋಪಿ ಭಾವನಾತ್ಮಕವಾಗಿ ಬಳಸಿಕೊಂಡಿದ್ದಾರೆ. ನಿರ್ಮಾಪಕನ ಈ ವರ್ತನೆಯಿಂದ ನಟಿಯ ವೃತ್ತಿಜೀವನದ ಮೇಲೆ ಪರಿಣಾಮ ಬೀರುವುದಲ್ಲದೆ ಭಾವನಾತ್ಮಕವಾಗಿ ಆಕೆಯನ್ನು ಕುಗ್ಗುವಂತೆ ಮಾಡಿದೆ. ಈ ಘಟನೆ ಮನರಂಜನಾ ಉದ್ಯಮದ ಕರಾಳ ಮುಖವನ್ನು ಬೆಳಕಿಗೆ ತಂದಿದೆ ಎಂದು ನಟಿಯ ಪರ ವಕೀಲ ಸೌಮ್ಯಜಿತ್ ಬಿಸ್ವಾಲ್ ಹೇಳಿದ್ದಾರೆ.

ಈ ವಿಚಾರದ ಬಗ್ಗೆ ನಟಿ ಶೀತಲ್‌ ಅವರು ಕೂಡ ಸೋಶಿಯಲ್‌ ಮೀಡಿಯಾದಲ್ಲಿ ಬರೆದುಕೊಂಡಿದ್ದು, ನಿರ್ಮಾಪಕನ ಹೆಸರನ್ನು ಕೂಡ ಉಲ್ಲೇಖ ಮಾಡಿದ್ದಾರೆ. ಈ ವಿಚಾರ ಬೆಳಕಿಗೆ ಬಂದ ಬಳಿಕ ನಟಿಯ ಪರವಾಗಿ ಹಲವು ಕಲಾವಿದರು ಅವರ ಜೊತೆ ನಿಂತಿದ್ದಾರೆ.