ಸಿದ್ದರಾಮಯ್ಯ ಬಯೋಪಿಕ್‌ನಲ್ಲಿ ವಿಜಯ್‌ ಸೇತುಪತಿ?

Team Udayavani, Aug 2, 2023, 2:39 PM IST

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಜೀವನಗಾಥೆಯನ್ನು ಸಿನಿಮಾ ಮಾಡುತ್ತಿರುವ ವಿಷಯ ಕೆಲ ತಿಂಗಳ ಹಿಂದಷ್ಟೇ ಬಹಿರಂಗಗೊಂಡಿದ್ದು ನಿಮಗೆ ನೆನಪಿರಬಹುದು. ಸಿದ್ದರಾಮಯ್ಯ ಅವರ ಈ ಬಯೋಪಿಕ್‌ಗೆ “ಲೀಡರ್‌ ರಾಮಯ್ಯ’ ಎಂಬ ಟೈಟಲ್‌ ಕೂಡ ಫಿಕ್ಸ್‌ ಆಗಿದ್ದು, ಚಿತ್ರತಂಡ ಸಿನಿಮಾದ ಟೈಟಲ್‌ ಪೋಸ್ಟರ್‌ ಅನ್ನೂ ಬಿಡುಗಡೆ ಮಾಡಿತ್ತು.

ಸತ್ಯ ರತ್ನಂ ನಿರ್ದೇಶನ ಮಾಡಲು ಹೊರಟಿರುವ “ಲೀಡರ್‌ ರಾಮಯ್ಯ’ ಸಿನಿಮಾವನ್ನು ಪ್ಯಾನ್‌ ಇಂಡಿಯಾ ಲೆವೆಲ್‌ನಲ್ಲಿ ತೆರೆಗೆ ತರುವ ಯೋಜನೆಯಲ್ಲಿದೆ ಚಿತ್ರ ತಂಡ. ಅದಾದ ನಂತರ ರಾಜ್ಯ ವಿಧಾನಸಭೆ ಚುನಾವಣೆ ಗರಿಗೆದರಿ ದ್ದರಿಂದ “ಲೀಡರ್‌ ರಾಮಯ್ಯ’ ಸಿನಿಮಾದ ಬಗ್ಗೆಯೂ ಹೆಚ್ಚಿನ ಮಾಹಿತಿ ಹೊರಬಂದಿರಲಿಲ್ಲ.

ಇದೀಗ ಸಿದ್ದರಾಮಯ್ಯ ಮತ್ತೂಮ್ಮೆ ಮುಖ್ಯಮಂತ್ರಿಯಾಗುತ್ತಿದ್ದಂತೆ, “ಲೀಡರ್‌ ರಾಮಯ್ಯ’ ಸಿನಿಮಾದ ಕೆಲಸಗಳಿಗೆ ಮತ್ತಷ್ಟು ವೇಗ ಸಿಕ್ಕಿದೆ. ಕಳೆದ 7-8 ತಿಂಗಳಿನಿಂದ “ಲೀಡರ್‌ ರಾಮಯ್ಯ’ ಸಿನಿಮಾಕ್ಕೆ ತಯಾರಿ ಮಾಡಿಕೊಳ್ಳಲಾಗುತ್ತಿದ್ದು, ಸಿನಿಮಾವನ್ನು ಎರಡು ಭಾಗಗಳಲ್ಲಿ ತೆರೆಗೆ ತರಲು ಪ್ಲಾನ್‌ ಮಾಡಿಕೊಳ್ಳಲಾಗಿದೆ.

ಇನ್ನು “ಲೀಡರ್‌ ರಾಮಯ್ಯ’ ಸಿನಿಮಾದಲ್ಲಿ ತಮಿಳು ನಟ ವಿಜಯ್‌ ಸೇತುಪತಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಕೂಡ ಜೋರಾಗಿ ಹರಿದಾಡುತ್ತಿದೆ. ಈಗಾಗಲೇ “ಲೀಡರ್‌ ರಾಮಯ್ಯ’ ಸ್ಕ್ರಿಪ್ಟ್ ಕೇಳಿ ಮೆಚ್ಚಿಕೊಂಡಿರುವ ವಿಜಯ್‌ ಸೇತುಪತಿ, ಸಿನಿಮಾದಲ್ಲಿ ಅಭಿನಯಿಸಲು ಗ್ರೀನ್‌ ಸಿಗ್ನಲ್‌ ನೀಡಿದ್ದಾರೆ. ಆದರೆ ಸದ್ಯ ವಿಜಯ್‌ ಸೇತುಪತಿ ಬ್ಯಾಕ್‌ ಟು ಬ್ಯಾಕ್‌ ಸಿನಿಮಾಗಳಲ್ಲಿ ಬಿಝಿಯಾಗಿರುವುದರಿಂದ, ಅವರ ಡೇಟ್ಸ್‌ ಇನ್ನೂ ಫೈನಲ್‌ ಆಗಿಲ್ಲ ಎನ್ನಲಾಗಿದೆ.