Fraud: ಯುವತಿಯಿಂದ ದಿವ್ಯಾಂಗ ಆಟೋ ಚಾಲಕನಿಗೆ ವಂಚನೆ

Team Udayavani, Aug 10, 2023, 10:54 AM IST

ಸಾಂದರ್ಭಿಕ ಚಿತ್ರ

ಬೆಂಗಳೂರು: ಯುವತಿಯೊಬ್ಬಳು ಫೋನ್‌ ಪೇ ಮೂಲಕ ಹಣ ವರ್ಗಾವಣೆ ಮಾಡುವುದಾಗಿ ದಿವ್ಯಾಂಗ ಆಟೋ ಚಾಲಕನಿಂದ 23 ಸಾವಿರ ರೂ. ಪಡೆದು ವಂಚಿಸಿರುವ ಘಟನೆ ಗಿರಿನಗರ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ನಾಗರಬಾವಿ ಮಹದೇಶ್ವರ ಲೇಔಟ್‌ ನಿವಾಸಿ ಶಿವಕುಮಾರ್‌ ವಂಚನೆಗೊಳಗಾದವರು. ವಂಚಿಸಿದ ಯುವತಿಗಾಗಿ ಶೋಧ ಕಾರ್ಯ ನಡೆಯುತ್ತಿದೆ ಎಂದು ಪೊಲೀಸರು ಹೇಳಿದರು.

ಚಂದ್ರಾಲೇಔಟ್‌ ಬಳಿ ಯುವತಿಯೊಬ್ಬಳು ಶಿವಕುಮಾರ್‌ ಆಟೋ ಹತ್ತಿದ್ದಾಳೆ. ಮಾರ್ಗ ಮಧ್ಯೆ ಶಿವಕುಮಾರ್‌ಗೆ ಅಪರಿಚಿತ ವ್ಯಕ್ತಿಯೊಬ್ಬ 23 ಸಾವಿರ ರೂ. ಸಾಲದ ಹಣ ವಾಪಸ್‌ ಕೊಟ್ಟಿದ್ದಾರೆ. ಅದನ್ನು ಗಮನಿಸಿದ ಯುವತಿ, ತಾನೂ ಪ್ರತಿಷ್ಠಿತ ಕಾಲೇಜಿನಲ್ಲಿ ಓದುತ್ತಿದ್ದು, ಕಾಲೇಜಿನ ಶುಲ್ಕ ಪಾವತಿಸಬೇಕು, ಫೋನ್‌ ಪೇ ಮೂಲಕ ಕಾಲೇಜಿನವರು ಹಣ ಪಡೆಯುವುದಿಲ್ಲ. ನಿಮ್ಮ ಬಳಿಯಿರುವ ನಗದು ಕೊಟ್ಟರೆ, ಫೋನ್‌ ಪೇ ಮೂಲಕ ಹಣ ವರ್ಗಾವಣೆ ಮಾಡುತ್ತೇನೆ ಎಂದಿದ್ದಾಳೆ. ಅದಕ್ಕೆ ಒಪ್ಪಿದ ಶಿವಕುಮಾರ್‌ 23 ಸಾವಿರ ರೂ. ಕೊಟ್ಟಿದ್ದಾನೆ. ಕೆಲ ಹೊತ್ತಿನ ಬಳಿ ಆಕೆ ಫೋನ್‌ ಪೇ ಮಾಡಿದ್ದೇನೆ ಎಂದು ಆಟೋ ಇಳಿದು ಹೋಗಿದ್ದಾಳೆ. ಆಟೋ ಚಾಲಕ ಹಣ ಖಾತೆಗೆ ಬಂದಿದ್ದೇಯೇ? ಇಲ್ಲವೇ? ಎಂದು ನೋಡಿಕೊಳ್ಳುವಷ್ಟರಲ್ಲಿ ಆಕೆ ನಾಪತ್ತೆಯಾಗಿದ್ದಳು.ಬಳಿಕ ಆಕೆಯ ಮೊಬೈಲ್‌ ಸ್ವಿಚ್ಡ್ ಆಫ್ ಆಗಿತ್ತು. ಹೀಗಾಗಿ ಚಾಲಕ ದೂರು ದಾಖಲಿಸಿದ್ದಾರೆ.