2024ಕ್ಕೆ BJP ಧೂಳೀಪಟ ಶತಃಸಿದ್ಧ: ನಿತೀಶ್‌

Team Udayavani, Aug 12, 2023, 5:13 AM IST

ಪಾಟ್ನಾ: ಪ್ರತಿಪಕ್ಷಗಳ ಒಕ್ಕೂಟ ಐಎನ್‌ಡಿಐಎ (ಇಂಡಿಯಾ) ರಚನೆಯಾದಾಗಿನಿಂದ ಬಿಜೆಪಿ ಭಯದಲ್ಲೇ ಇದೆ. ಈ ಭಯ ನಿಜವಾಗಲಿದ್ದು, 2024ರ ಸಾರ್ವತ್ರಿಕ ಚುನಾವಣೆಯಲ್ಲಿ ಬಿಹಾರದಲ್ಲಿ ಬಿಜೆಪಿ ಧೂಳೀಪಟವಾಗಲಿದೆ ಎಂದು ಬಿಹಾರ ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ ಹೇಳಿದ್ದಾರೆ.

ಮಾಧ್ಯಮಗಳೊಂದಿಗೆ ಮಾತನಾಡಿತ್ತಿದ್ದ ವೇಳೆ ಮುಂದಿನ ವರ್ಷ ನಡೆಯಲಿರುವ ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿ ಸೋಲಬಹುದೆಂದು ನೀವು ಏನಾದರೂ ಊಹಿಸಿದ್ದೀರಾ ಎಂದು ಪ್ರಶ್ನಿಸಲಾಗಿದೆ. ಈ ವೇಳೆ ಪ್ರತಿಕ್ರಿಯಿಸಿ ನಿತೀಶ್‌, ಖಂಡಿತವಾಗಿಯೂ ಹೌದು! ನಾವೆಲ್ಲರೂ ದೇಶದ ಒಳಿತಿಗಾಗಿ ಕೈಜೋಡಿಸಿ ಒಕ್ಕೂಟ ಕಟ್ಟಿದ್ದೇವೆ. ಆದರೆ, ಬಿಜೆಪಿಯ ಜತೆಗೆ ಈಗಿರುವ ಕೆಲ ಪಕ್ಷಗಳು ಭಯದಿಂದ ಮಾತ್ರವೇ ಅವರೊಟ್ಟಿಗಿವೆ. ಒಂದು ಬಾರಿ ಚುನಾವಣೆ ಘೋಷಣೆಯಾಗುತ್ತಿದ್ದಂತೆ ಆ ಪಕ್ಷಗಳೂ ಈ ಕಡೆಗೆ ಬರಲಿವೆ ಎಂಬುದು ಬಿಜೆಪಿಗೆ ತಿಳಿದಿಲ್ಲ ಎಂದಿದ್ದಾರೆ.

ಅಲ್ಲದೇ, ಮಣಿಪುರ ವಿಚಾರವಾಗಿ ಕೇಂದ್ರ ಸರ್ಕಾರದ ವಿರುದ್ಧ ಅವಿಶ್ವಾಸ ಗೊತ್ತುವಳಿ ಮಂಡಿಸುವ ಮೂಲಕ ಕೇಂದ್ರಸರ್ಕಾರದ ವೈಫ‌ಲ್ಯವನ್ನು ಎತ್ತಿತೋರಿಸುವ ಕೆಲಸವನ್ನು ಪ್ರತಿಪಕ್ಷಗಳು ಮಾಡಿವೆ. ಬಿಜೆಪಿ ಕೇವಲ ಪ್ರಚಾರದ ಬಗ್ಗೆ ಗಮನಹೊಂದಿದೆಯೇ ಹೊರತು ದೇಶದ ಅಭಿವೃದ್ಧಿಯ ಬಗ್ಗೆ ಅಲ್ಲ ಎಂಬುದು ದೇಶದ ಜನರಿಗೆ ತಿಳಿದಿದೆ ಎಂದೂ ನಿತೀಶ್‌ ಹೇಳಿದ್ದಾರೆ.

ರಾಗಾಗೆ ಯುವತಿಯರ ಕೊರತೆ ಇಲ್ಲ
ಸಂಸತ್‌ನಲ್ಲಿ ರಾಹುಲ್‌ ಫ್ಲೈಯಿಂಗ್‌ ಕಿಸ್‌ ನೀಡಿದ್ದರೆಂದು ಸಚಿವೆ ಸ್ಮತಿ ಇರಾನಿ ಆರೋಪಿಸಿ, ಈ ವಿಚಾರ ವಿವಾದಕ್ಕೆ ಗುರಿಯಾಗಿರುವ ನಡುವೆಯೇ, ಬಿಹಾರದ ಶಾಸಕಿಯೊಬ್ಬರು ರಾಹುಲ್‌ ಅವರನ್ನು ಸಮರ್ಥಿಸಿ ಹೇಳಿಕೆ ನೀಡಿ ಟೀಕೆಗೆ ಗುರಿಯಾಗಿದ್ದಾರೆ. ಶಾಸಕಿ ನೀತು ಸಿಂಗ್‌, ವಿಡಿಯೊ ಒಂದರಲ್ಲಿ ರಾಹುಲ್‌ ಗಾಂಧಿ ಅವರಿಗೆ ಯುವತಿಯರಿಗೆ ಬರವಿಲ್ಲ, ಫ್ಲೈಯಿಂಗ್‌ ಕಿಸ್‌ ನೀಡುವುದಾದರೂ ಯುವತಿಯರಿಗೆ ನೀಡುತ್ತಿದ್ದರು. ಆ 50 ವರ್ಷದ ಹೆಂಗಸಿಗಲ್ಲ, ಇದೆಲ್ಲವೂ ಆಧಾರವಿಲ್ಲದ ಆರೋಪ ಎಂದಿದ್ದಾರೆ. ಈ ಬಗ್ಗೆ ಬಿಜೆಪಿಗರು ಕಿಡಿ ಕಾರಿ, ರಾಹುಲ್‌ ದುಷ್ಕೃತ್ಯವನ್ನೂ ಸ್ವತಃ ಪಕ್ಷದ ಮಹಿಳೆಯರೇ ಸಮರ್ಥಿಸಿಕೊಳ್ಳುತ್ತಾರೆ ಎಂದು ಟೀಕಿಸಿದ್ದಾರೆ.