Pakistan: ಬಿಲಾವಲ್‌ ಭುಟ್ಟೋ ಹೇಳಿಕೆ ದುರಹಂಕಾರದ್ದು: ಕೇಂದ್ರ ಸರ್ಕಾರ

Team Udayavani, Aug 13, 2023, 7:11 AM IST

ಇಸ್ಲಾಮಾಬಾದ್‌/ನವದೆಹಲಿ: ಜುಲೈನಲ್ಲಿ ನಡೆದಿದ್ದ ಶಾಂಘೈ ಸಹಕಾರದ ಒಕ್ಕೂಟದ ಸಭೆಯನ್ನು ವರ್ಚುವಲ್‌ ಆಗಿ ಆಯೋಜಿಸಿದ್ದನ್ನು ಟೀಕಿಸಿದ ಪಾಕಿಸ್ತಾನದ ವಿದೇಶಾಂಗ ಖಾತೆ ಮಾಜಿ ಸಚಿವ ಬಿಲಾವಲ್‌ ಭುಟ್ಟೋ ಜರ್ದಾರಿ ಹೇಳಿಕೆ ದುರಹಂಕಾರತನದ್ದು ಎಂದು ಕೇಂದ್ರ ಸರ್ಕಾರ ಟೀಕಿಸಿದೆ. ಈ ಬಗ್ಗೆ ನವದೆಹಲಿಯಲ್ಲಿ ಮಾತನಾಡಿದ ಕೇಂದ್ರ ವಿದೇಶಾಂಗ ಸಚಿವಾಲಯದ ವಕ್ತಾರ ಅರಿಂದಂ ಬಗಚಿ “ಒಬ್ಬ ವ್ಯಕ್ತಿಯ ಕಾರಣದಿಂದ ಜು.4ರ ಎಸ್‌ಸಿಒ ಸಭೆಯನ್ನು ವರ್ಚುವಲ್‌ ಆಗಿ ಆಯೋಜನೆ ಮಾಡಲಾಯಿತು ಎಂಬ ಹೇಳಿಕೆ ಕೇವಲ ದುರಹಂಕಾರತನದ್ದು ಎಂದು ಹೇಳಬೇಕಾಗುತ್ತದೆ. ಯಾವ ಕಾರಣಕ್ಕೆ ವರ್ಚುವಲ್‌ ಆಗಿ ಸಭೆಯನ್ನು ನಡೆಸಲಾಯಿತು ಎಂಬ ಬಗ್ಗೆ ಹಲವು ಬಾರಿ ಸ್ಪಷ್ಟನೆ ನೀಡಲಾಗಿದೆ’ ಎಂದರು.

ಗೋವಾ ರಾಜಧಾನಿ ಪಣಜಿಯಲ್ಲಿ ಮೇನಲ್ಲಿ ನಡೆದಿದ್ದ ಶಾಂಘೈ ಸಹಕಾರ ಒಕ್ಕೂಟದ ಸಭೆಗೆ ತಾವು ಭಾರತಕ್ಕೆ ಹೋಗಿದ್ದ ಕಾರಣದಿಂದಲೇ ಜು.4ಕ್ಕೆ ಆಯೋಜಿಸಲಾಗಿದ್ದ ಒಕ್ಕೂಟದ ಸಭೆಯನ್ನು ಭಾರತ ಸರ್ಕಾರ ವರ್ಚುವಲ್‌ ಆಗಿ ನಡೆಸಲು ತೀರ್ಮಾನಿಸಿತ್ತು ಎಂದು ಕಿಡಿಗೇಡಿತನದ ಮಾತನಾಡಿದ್ದರು.